Azərbaycan Mərkəzi Bankının (AMB) apardığı cari nəzarət tədbirləri çərçivəsində iki bank olmayan kredit təşkilatının (BOKT) vəzifəli şəxsləri inzibati məsuliyyətə cəlb olunub.
AMB-nin məlumatına görə, “Embafinans” QSC və onun vəzifəli şəxsi cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin tələblərinin pozulmasına görə cərimələnib.
Bakı şəhəri Yasamal Rayon Məhkəməsinin qərarı ilə “Embafinans” QSC 20 min manat, onun vəzifəli şəxsi isə 4 min manat məbləğində cərimə edilib.
Bundan başqa, “Caspian İnvest” MMC-nin vəzifəli şəxsi də eyni qanunvericiliyin tələblərinin pozulmasına görə inzibati məsuliyyətə cəlb olunub.
Bakı şəhəri Nərimanov Rayon Məhkəməsinin qərarına əsasən, “Caspian İnvest” MMC-nin vəzifəli şəxsinə 2 min manat məbləğində cərimə tətbiq edilib.
Məhkəmə qərarları İnzibati Xətalar Məcəlləsinin 598.1.1, 598.1.2 və 598.1.6-cı maddələri əsasında qəbul edilib. Bu maddələr cinayət yolu ilə əldə edilmiş əmlakın leqallaşdırılmasının və terrorçuluğun maliyyələşdirilməsinin qarşısının alınması üzrə tələblərin pozulmasına görə məsuliyyəti nəzərdə tutur.
Hazırda Azərbaycanda Mərkəzi Bankın reyestrində 50-dən çox lisenziyalı BOKT fəaliyyət göstərir. Bunlar arasında "Aqrarkredit" QSC BOKT, "PARA" BOKT ASC, "FİNCA Azerbaijan" QBKT, "KredAqro" BOKT MMC, "FinEx Kredit" BOKT ASC, "AzFinans" BOKT MMC, "İrşad BOKT" MMC, "AZPUL" BOKT MMC, "Nova Credit BOKT" MMC və digər təşkilatlar yer alır.
Azərbaycan Mərkəzi Bankının sədri Taleh Kazımov ötən il mətbuat konfransında bildirmişdi ki, tənzimləyici qurum üçün əsas prioritet kreditlərin sürətlə artması deyil, maliyyə sabitliyinin qorunması və dayanıqlı kreditləşmənin təmin edilməsidir.
"Biz bank olmayan kredit təşkilatları (BOKT), ümumiyyətlə, mikromaliyyələşdirilmə sahəsində kifayət qədər çox yeniliklər gətirəcəyik. BOKT-larla bağlı qaydalara etdiyimiz dəyişikliklər hesab edirik ki, sektorun inkişafına dəstək olacaq. Gündəlik kreditlərin inkişafı, onların sürətlə artırılması Mərkəzi Bankın marağında deyil. Çünki həm maliyyə institutu, həm də istehlakçı kifayət qədər risklərlə üzləşə bilər. Ona görə də həmin sahələrdə risklərin yüksək olduğunu nəzərə alaraq ehtiyat tələblərini artırmışıq. Gündəlik kreditlərin artımı Mərkəzi Bankın strateji sektorun inkişafı baxımından maraqlı deyil", – deyə AMB sədri vurğulayıb.
