Vüqar Bayramov: “Bu platforma çərçivəsində iki ölkə sahibkarlıq subyektlərinin aqrar-sənaye kompleksi, energetika, bağçılıq...”
“Biz birgə Azərbaycan-Qırğız İnvestisiya Fondunun maliyyə vəsaitinin iki dəfə - 200 milyon dollara qədər artırılması barədə razılıq əldə etdik”. Bunu Prezident İlham Əliyev Qırğızıstan Prezidenti Sadır Japarov ilə mətbuata birgə bəyanatında bildirib.
Daha sonra Prezident Əliyev bunları qeyd edib: “Əminəm ki, bu da son hədd deyil, çünki Fondun fəaliyyəti üzrə bizə nümayiş etdirilən təqdimat konkret məzmunla zənginləşir. Qırğızıstanda həyata keçirilən çoxlu layihə var və onlar birgə istehsal, yeni iş yerləri yaradır, qarşılıqlı fəaliyyətimizin iqtisadi potensialını möhkəmləndirir”.
Onu da qeyd edək ki, mətbuata bəyanatda Prezident Sadır Japarov bildirib ki, Azərbaycan-Qırğızıstan Fondunun fəaliyyəti çərçivəsində 3 birgə layihənin açılışı oldu və 8 təşəbbüsün həyata keçirilməsinə start verildi.
Maraqlıdır, iki ölkə arasında birgə İnvestisiya Fondu iqtisadiyyatın konkret olaraq hansı sahələrinə sərmayə qoymağı özündə ehtiva edir? Bunun iki ölkə üçün faydaları nə ola bilər?
Sözügedən məsələyə aydınlıq gətirən millət vəkili Vüqar Bayramov baki-xeber.com-a açıqlamasında bildirdi ki, Azərbaycanla Qırğızıstan arasında iqtisadi əlaqələr yalnız ticarət dövriyyəsi ilə məhdudlaşmır: “Eyni zamanda, investisiya qoyuluşlarının artırılması ilə müşahidə edilir. Birgə İnvestisiya Fondunun yaradılmasında da məqsəd məhz qarşılıqlı sərmayə layihələrinin maliyyələşdirilməsindən ibarətdir. Artıq iki ölkə arasında İnvestisiya Fondu fəaliyyət göstərir. Bu da birgə sərmayə qoyuluşları baxımından vacib əhəmiyyət kəsb edir. Söhbət iqtisadiyyatın fərqli sektorlarında təqdim olunan layihələrin maliyyələşdirilməsindən gedir. Əslində imzalanan anlaşmalarda da praktik olaraq bu istiqamətlər qeyd olundu. Fondun vəsaitinin 200 milyon dollara çatdırılması sahibkarlar üçün yeni fürsətdir. Çünki, sahibkarlar öz layihələrini təqdim etməklə fonddan maliyyə cəlb edə bilirlər və bu imkan daha da genişlənməkdədir. Fond tərəfindən artıq bir sıra layihələrin maliyyələşdirilməsi həyata keçirilməkdədir. Bu platforma çərçivəsində Azərbaycan və Qırğızıstan sahibkarlıq subyektlərinin aqrar-sənaye kompleksi, energetika, bağçılıq, tekstil, turizm və digər sahələr üzrə prioritet layihələrin maliyyələşdirilməsi həyata keçirilir. Daha öncə, Fond Qırğızıstanda kiçik su elektrik stansiyasının (SES) və müasir tikiş fabrikinin tikintisini maliyyələşdirilməsi barədə qərar qəbul edib. Bütövlükdə, fondun nizamnamə kapitalı Azərbaycan, beynəlxalq maliyyə institutları, xarici hökumətlərin maliyyə təşkilatları tərəfindən, habelə Qırğız Respublikasının qanunvericiliyi ilə qadağan olunmayan digər mənbələrdən formalaşır. Fondun imkanlarının genişləndirilməsi iki ölkə arasındakı strateji tərəfdaşlığı daha da gücləndirir”.
Vidadi ORDAHALLI
