Türkiyənin İstanbul şəhərində keçirilən Parabadminton üzrə Avropa çempionatı davam edir. Yeniyetmə paralimpiyaçımız Zəhra Salmanlı kişi və qadın idmançıların birgə mübarizə apardığı qoşa yarışda (SH-6 kateqoriyası) ingiltərəli komanda yoldaşı Krysten Coombs ilə korta çıxıb. Onlar qrup mərhələsində türkiyəli rəqiblərinə 2:0 hesabı ilə (Sudenaz Şanlı, Ali Altıparmak) qalib gələrək ilk qələbəsini qazanıb, ikinci görüşdə isə şotlandiyalı və polşalı duetə (Andrew Davies, Darija Bujnicka) 1:2 məğlub olub.
1/4 finalda fransalı rəqiblərini (Maxime Greboval, Pauline Pelle) 2:1 məğlub edən Z.Salmanlı və K.Coombs Avropa çempionatında yarımfinala vəsiqə qazanıb. Beləliklə, onlar özləri üçün ən azı bürünc medalı təmin ediblər.
20 yaşlı gənc parabadmintonçumuz İbrahim Əliyev də eyni uğuru təkrarlayıb. İbrahim Əliyev kişi idmançıların birgə mübarizə apardığı qoşa yarışda (SU-5 kateqoriyası) polşalı komanda yoldaşı Bartlomiej Mroz ilə korta çıxıb. Onlar qrup mərhələsində ingiltərəli rəqiblərinə 2:0 hesabı ilə (Antony Forster, Jack Isaacs) qalib gələrək ilk qələbəsini qazanıb, ikinci görüşdə isə fransalı duetə (Meril Loquette, Lucas Mazur) 0:2 məğlub olub.
1/4 finalda qrupdakı fransalı rəqiblərindən məğlubiyyətin əvəzini çıxaraq 2:1 qalib gələn İ.Əliyev və B.Mroz Avropa çempionatında yarımfinala vəsiqə qazanıb. Beləliklə, onlar özləri üçün ən azı bürünc medalı təmin ediblər. Qeyd edək ki, yarımfinal görüşləri sabah baş tutacaq.
