Hər valideyn övladının sağlam olmasını, peşəkar və ya həvəskar səviyyədə idmançı kimi yetişməsini arzulayır. Elə buna görə də bir çox valideynlər övladlarının hər hansı idman növü ilə məşğul olması üçün onları kiçik yaşlarından idman məktəblərinə yazdırırlar.
Ancaq bəzi valideynlər azyaşlı uşaqlarının məşğul olacağı idman növünü öz həvəs və istəklərinə görə seçirlər. Bəziləri isə uşaqları çox kiçik yaşlarından idmanla məşğul olmağa məcbur edirlər. Düzdür, bütün bunlar valideynlərin uşaqlarının daha sağlam və idmançı kimi yetişməsi istəyindən irəli gəlir. Ancaq bəzən bu istək xoş olmayan sonluqla bitir. Belə ki, 2016-cı il təvəllüdlü Fərid Bakarov Avropa oyunlarının bürünc mükafatçısı, tanınmış idmançı Mehman Xəlilovun keçirdiyi sambo məşqləri zamanı həyatını itirib. M.Xəlilov azyaşlıya qarşı təhlükəli fənd işlədib və 7 yaşlı Fəridin başı bədəninin altında qalması səbəbindən boyunu qırılıb. Azyaşlı dərhal Sumqayıt Şəhər Uşaq Xəstəxanasına çatdırılsa da, orada vəfat edib. Məlum hadisə ilə bağlı sosial şəbəkədə video görüntülər yayıldı. Görüntülərdən də açıq-aşkar bəllidir ki, məşqçi 7 yaşlı uşaqla normal şəkildə davranmayıb, ona fiziki işgəncələr verib.
Hadisə ilə bağlı elm və təhsil naziri Emin Əmrullayev media nümayəndələrinə açıqlamasında bildirib ki, qanunvericiliyə əsasən məşqçilərin fəaliyyətində lisenziya tələb olunmur: “Biz də fəaliyyətimizi buna uyğun qururuq. Təbii ki, sabah belə bir tələb olarsa, biz də həmin şəxsləri işə götürəndə həmin tələblərə əməl edəcəyik”.
Maraqlıdır, məşqçi kimi fəaliyyət göstərmək üçün niyə lisenziya tələb olunmur? Bu məsələnin rəsmi şəkildə olması üçün hansı işlər görülməlidir?
Kamran Əsədov: “Azyaşlı uşaqlara dərs keçən repetitor və kurslar, idman mərkəzləri məcburi lisenziyalaşmaya cəlb olunmalıdır”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, azyaşlı uşaqlara dərs keçən repetitor və kurslar, idman mərkəzləri məcburi lisenziyalaşmaya cəlb olunmalıdır: “Mütəmadi monitorinqlər keçirilməlidir. Hərə 3-4 partanı yanaşı qoyur, bir zal götürür yığır azyaşlıları ora, heç bir yoxlama aparılmır, dərs keçir, idman keçir. Baxın son 3 il ərzində azyaşlıların iştirakı ilə baş verən zorakılıq hallarına. Dərs, təlim keçənlərin fiziki, tibbi, psixoloji yoxlaması aparılmır. Eyni zamanda ictimai-iaşə xidmətlərinin göstərilməsi qaydaları var. Bu qaydalar dəyişilməlidir. Bütün xidmət göstərilən yerlərin hamısı kamera ilə təmin olunmalıdır. Valideynlərin rahat şəkildə izləmək imkanı olacaq qurğular quraşdırılmalıdır. Bu, əslində çox ucuzdur. Eləcə də ictimai iaşə xidməti göstərilən yerlərin hər birində ilkin tibbi yardım göstərilməsi üçün infrastruktur olmalıdır və bu mütləqdir. Bundan başqa, hər ay ictimaiyyət nümayəndələrinin, bu sahə üzrə mütəxəssislərin iştirakı ilə müstəqil şəkildə yoxlamalar aparmalıdır. Elm və Təhsil Nazirliyi böyük qazanc əldə etdiyi bu yerləri kimlərin icarəyə götürüb işlətdiyini bilməlidir. Ancaq nazirlik bununla maraqlanmır. Yəni həmin şəxsin orada xidmət apara, təlim verə, dərs deyə biləcək biliyi, bacarığı, psixoloji vəziyyəti varmı? Çox təəssüf ki, maraqlanmırlar".
Aydın Bağırov: “Kimliyindən, qazandığı nəticədən asılı olmayaraq, professional idmanda olduğu kimi, uşaq idmanında da məşqçiliyə yalnız lisenziyası olan şəxslər buraxılmalıdır”
Tanınmış idman şərhçisi, “qol.az” saytının baş redaktoru Aydın Bağırov bildirdi ki, kimliyindən, qazandığı nəticədən asılı olmayaraq, professional idmanda olduğu kimi, uşaq idmanında da məşqçiliyə yalnız lisenziyası olan şəxslər buraxılmalıdır: “Son hadisə isə dövlətin idmana cavabdeh qurumu olan Gənclər və İdman Nazirliyi, idman federasiyaları üçün SOS siqnalı olmalıdır. Ayılmaq lazımdır. Özünüreklamla yox, məsuliyyət sahənizə aid işlərlə məşğul olun”.
Günel CƏLİLOVA
