Azərbaycan idmançıları Tokioda Rio-2016-nın rekordlarını qəti yeniləyə bilmədi - idmanımızda tənəzzül...

img

Natiq Muxtarlı: “İdmanımızın görəcəkli günləri hələ qarşıdadır”
Aydın Bağırov: “Milli komandamızın təmsilçilərinin Tokio-2020-də Rio-2016-nın rekordunu təkrarlaya bilməməsinin səbəbləri var”

Medal sıralamasında Çinin liderlik etdiyi, Yaponiyanın ikinci, ABŞ-ın isə üçüncü yerdə olduğu Tokio-2020–də Azərbaycanın yalnız bir bürünc medalı var, onu da milli komandamızın üzvü qadın cüdoçu İrina Kindzerskaya qazanıb. Azərbaycan boksçusu Alfonso Dominqes isə Tokio-2020 Yay Olimpiya Oyunlarında yarımfinala çıxmaqla medalı təmin edib.

Hazırda isə 24 idmançımız mübarizəni dayandırıb və Tokio-2020-də 20 idmançımız mübarizə aparacaq. Bu kiçik statistikanı verməklə Tokio olimpiadasındakı vəziyyətimizi sizə göstərmək istədik. Reallıq bundan ibarətdir ki, Azərbaycanın milli komandası Rio-2016-dakı medal rekordunu Tokio-2020-də hələ ki, təkrarlaya bilməyib, ekspertlərə görə, təkrarlamaq şansı da çox azdır.

Qeyd edək ki, Azərbaycanın Milli komandası 2016-cı ildə Braziliyanın Rio-di-Janeyro şəhərində keçirilən XXXI Yay Olimpiya Oyunlarında - Rio – 2016-da 17 idman növü üzrə 56 idmançı ilə iştirak edirdi və  1-i qızıl, 7-si gümüş, 10-u bürünc olmaqla 18 medal qazanmışdı.  Tokio-2020-də isə cəmi bir medalımız var, biri isə təmin edilib.

Milli komandamızın Tokio-2020-də Rio-2016-dakı medal rekordunu təkrarlaya bilməməsinin səbəbi nədir?

Ekspertlər bunun başlıca səbəblərinin pandemiyadan daha çox federasiyaların daxilindəki problemlərlə, qarşıdurmalarla, korrupsiya halları, maliyyə yeyintiləri, xüsusən də idmançıların haqqının yeyilməsi ilə əlaqələndirirlər. Ekspertlərin dediyinə görə, Azərbaycanın milli komandasının Tokio-2020-də uğurlu çıxışı üçün dövlət tərəfindən lazımi şərait yaradılıb, dəstək göstərilib, lakin bəzi federasiyaların və Gənclər və İdman Nazirliyində bu işə məsul olan bəzi vəzifəli şəxslərin səhlənkarlığı, korrupsiya əməlləri nəticəsində milli komandamız bu kimi uğursuzluqlarla qarşılaşıb.

Tanınmış idman eksperti Natiq Muxtarlı baki-xeber.com-a bunları dedi: “İdman təsərrüfatımızın yalnız bir problemi var: qeyri-peşəkar idarəçilik. Naşı idarəçilər bu illər ərzində Azərbaycan idmanının strategiyasını qura bilmədilər. Ya da qurmaq istəmədilər. Onların yanaşması belə oldu: bu gün nəticə olsun, sabah Allah kərimdir. Biz uzun illərdir yazırdıq ki, “Kərimin quyusu dərindir”, əvvəl-axır ora düşəcəyik. Bax, biz indi o quyudayıq. Bu illər ərzində ölkənin kənd və qəsəbələrində infrastruktur qurulmadı. Hər rayon mərkəzində bir olimpiya kompleksi tikildi ki, onlar da təyinatı üzrə fəaliyyət göstərmədi. Yerli idmançıları yetişdirmək əvəzinə başqa ölkələrdən 2-3-çü dərəcəli legionerləri gətirdilər ölkəyə. Dövlətin, idmanın inkişafı üçün ayırdığı vəsaiti keyfiyyətə yox, kəmiyyətə sərf etdilər. Azərbaycan üçün ənənəvi olan idman növlərini - hansı ki, olimpiadada o idman növlərində medal gözləyirik - inkişaf etdirmək əvəzinə İndoneziyadan badmintonçu, Efiopiyadan yüngül atlet gətirdilər. Bu yanaşmanın da nəticəsi belə olmalı idi. Azərbaycanda milli idman strategiyası yaradılmalıdır. Amma bu strategiyanı Gənclər və İdman Nazirliyində, federasiyalarda çalışan, havayı məvacib alan minlərlə kadr qura bilməz. Bu, onların potensialı xaricindədir. Onlar cirkli vəsait "yumaq"dan başqa nəsə bacarmırlar. İdman təsərrüfatında köklü kadr islahatlarına ehtiyac var, özü də təcili. Yoxsa idmanımızın görəcəkli günləri hələ qarşıdadır”.

Qol.az saytının baş redaktoru, Əməkdar jurnalist Aydın Bağırovun sözlərinə görə, burada səbəblər çoxdur: “Milli komandamızın təmsilçilərinin Tokio-2020-də Rio-2016-nın rekordunu təkrarlaya bilməməsinin səbəbləri var. Əvvəla, biz burada çox az sayda idmançı ilə təmsil olunurduq, olimpiya oyunlarına cəmi 44 idmançımız qatılmışdı. Bunun da müəyyən səbəbləri oldu. Həm idmançılarımızın xeyli hissəsi Tokio-2020-yə lisenziya qazana bilmədi, həm də pandemiya təsir etdi. Bu bir az qarışıq durumdur. Müəyyən federasiyalarda həm məşqçi işi ilə bağlı problem var. Yaxud idmançının özünün hazırlığı olmayıb, deyək ki, fiziki hazırlığı yerində olsa da, psixoloji, texniki-taktiki hazırlığı qaydasında olmayıb. Yəni problem həm məşqçilər, həm də idmançılar tərəfindən də olub. Amma federasiyalarla bağlı da problemlər var. Bir federasiya deyil, bir neçə federasiyada problemlər mövcuddur, əlbəttə, bəzi idmançıların haqqı da yeyilib. Bu yeni fakt deyil, bu neçə illərdir danışılır. Elə idmançılar var ki, yerli idmançıdır, amma o yarışa aparılmır, onun çəkisində əcnəbi idmançı çıxış edir. Yaxud yerli idmançıdır öz çəkisində qalib olur, amma öz çəkisi üzrə yarışa aparılmır, əvəzinə onun çəkisində məğlub olan idmançı aparılır. Yəni bu tipli məsələlərdə bir qədər ədalətsizliklər var”.

A.Bağırov qeyd etdi ki, bu konkret olaraq olimpiya oyunlarına aid deyil, bu isə daha geniş bir problemdir, başqa bir söhbətin mövzusudur.

İradə SARIYEVA

Son xəbərlər