Fələstin Futbol Federasiyasının prezidenti Cibril Radjubun 2026-cı il FIFA Dünya Kubokuna rəsmi dəvət almasına baxmayaraq, ABŞ-dan viza ala bilməməsi ilə bağlı qalmaqal davam edərkən, FIFA prezidenti Canni İnfantinodan yeni sensasiyalı bir təklif gəlib.
FİFA prezidenti sentyabr ayında ABŞ-da keçiriləcək ilk 15 yaşadək futbolçular arasında futbol festivalının açılış oyununun İsrail və Fələstin arasında keçirilməsini təklif edib.
30 apreldə Vankuverdə keçirilən illik konqresdə FİFA prezidenti İnfantino Fələstin Futbol Federasiyasının prezidenti Cibril Radjub və İsrail Futbol Federasiyasının vitse-prezidenti Bəsim Şeyk Sulimanı dəvət edərək onları əl sıxıb, şəkil çəkdirmələrini təklif edib. Lakin Radjubun yüzlərlə nümayəndənin qarşısında "Biz əziyyət çəkirik!" deyə qışqırıb İnfantino ilə qızğın mübahisəyə başlaması ilə FİFA prezidentinun cəhdi fiaskoya uğrayıb.
İsrail təmsilçisi Sulimanın səhnədə bir neçə metr aralıda tək qalması ilə nəticələnən fiaskodan sonra, İnfantino 211 ölkənin uşaqlarını dəvət edəcəyi bu turniri zəruri bir sülh təşəbbüsü kimi irəli sürüb.
Turnir planları mətbuata sızdırıldıqdan sonra İsrail Futbol Federasiyasının (İFA) sözçüsü Federasiya prezidenti Moşe Zuaresin normallaşma və sülhü təşviq etmək üçün futbolu bir vasitə kimi istifadə etməyə hazır olduğunu açıqlayıb. "Hər kəs üçün daha yaxşı bir gələcək üçün həmişə əlimizi uzadırıq, qarşı tərəflə cəsarətli bir ortaq tapmağa ümid edirik" - deyən İsrail tərəfi topu Fələstinə ötürüb. Fələstin Futbol Federasiyası isə (FFF) FIFA-nın sensasion oyun təklifi ilə bağlı açıqlama verməkdən imtina edib.
Tahir TAĞIYEV
