25/08/2019 22:56
728 x 90

Paşinyan yallı ilə rəqs etdi, bunu bildik, ancaq ölkəmizin QHT sektorunun susması başa düşülmədi...

img

Ermənistanın baş naziri Nikol Paşinyanın mayın 8-də işğal altında olan torpaqlarımızda səfər edib, orda göstərdiyi əxlaq bir daha sübut etdi ki, o, sülh prosesinə sadiq adam deyil. Ermənistan rəhbərliyinin belə təxribatçı cəhdləri çox olub və onlara lazımi səviyyədə siyasi qiymət verilib. Ancaq budəfəki səfərində Paşinyan daha bir abırsızlığa imza atdı. Ermənistan baş naziri Azərbaycanın Şuşa şəhərinin işğalı şərəfinə düzənlənən mərasimə qatıldı. Erməni çaxırını başına çəkdikdən sonra Azərbaycan milli musiqisinin sədaları altında oynayan ermənilərə qoşulub yallı getdi. Kadrlardan göründü ki, erməni işğalçıları, torpaqlarımızla bərabər, həyasızcasına mahnılarımızı da işğal etməkdə davam edirlər.

 Paşinyanın bu addımı Azərbaycan tərəfində kəskin reaksiya doğurub. Azərbaycan Xarici İşlər Nazirliyi (XİN) hadisələrin bundan sonrakı mümkün inkişafı ilə bağlı bütün məsuliyyətin Ermənistan rəhbərliyinin üzərinə düşdüyünə dair bəyanat yayıb: “Paşinyanın Azərbaycanın Dağlıq Qarabağ bölgəsinə, Şuşaya qanunsuz səfəri onun xarici siyasətində heç nəyin dəyişmədiyini göstərir. Gözləmək olardı ki, keçmiş prezident Sarkisyanın siyasətinə etiraz edən xalqın dəstəyi ilə hakimiyyətə gələn bu az tanınan siyasətçi Ermənistanın xarici siyasətində müəyyən dəyişikliklər edəcək. Amma zaman keçdikcə məlum olur ki, bu dəyişikliklər yoxdur və məhz bunun nəticəsidir ki, Ermənistanın özündə Paşinyanın reytinqi günü-gündən azalmaqdadır”. Ancaq ən maraqlısı budur ki, Paşinyanın milli musiqimizin sədaları altında işğal edilmiş ərazilərimizdə yallı getməsinə milli-mənəvi dəyərlərin təbliği və qorunması istiqamətində fəaliyyət göstərən QHT-lər tərəfindən reaksiya verilmədi. Onlar tərəfindən Ermənistanın torpaqlarımızın işğalı ilə yanaşı milli musiqimizə də sahib çıxmaq cəhdlərinə etirazı özündə ehtiva edən hər hansı bəyanat vermək və ya vasitəçi ölkələrin səfirliyi önündə etiraz aksiyaları keçirmək kimi cəhdlərinə rast gəlmədik. QHT-lərin bu passivliyini nə ilə izah edə bilərik? Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, bu mövzu bizim üçün çox ağırdı: “Həmin kadrları seyr etmək hər bir qeyrətli vətəndaşımıza təsir edir. Buna hamı etiraz etməlidir. Mən inanmıram ki, peşəsindən, əqidəsindən asılı olmayaraq , kimsə buna ürək ağrısı ilə yanaşmasın. İnsafən deməliyəm ki, bizim QHT-lər Ermənistanla aparılan mübarizənin daim önündə olublar. 30 illik dönəmdə bizim QHT-lər bütün mümkün vasitələrdən istifadə edərək, düşmənlə mübarizə aparıb. Mədəniyyətimiz, tarixi abidələrimizin məhvi ilə bağlı daim haqq səslərini ucaldıblar. Biz bu mübarizəni həm də beynəlxalq səviyyədə aparmışıq. Araşdırsanız görərsiniz ki, QHT-lərimizin fəaliyyəti yetərincədir. Hamımız da gözəl bilirik ki, dünya ictimaiyyəti bizim etirazlarımıza nə cür cavab verir. Biz bir laqeydliyin şahidi oluruq. Əlbəttə, çox acınacaqlıdır ki, mənfur düşmən bu üsullara əl atır. Onlar bütün varlıqları ilə bizə məxsus nə varsa mənimsəmək istəyirlər. Düşünürəm ki, artıq mənfur düşmənlə bəyanat dili ilə danışmağın vaxtı keçib. Paşinyanın son hərəkətləri bir daha bunu sübut edir. Bizim ölkə olaraq onlara bir cavabımız olmalıdır. Bütün qüvvələrimizi səfərbər edib, ölkə başçısının əmrinə əsasən torpaqlarmızı işğaldan azad etməliyik. Düşmənin siyasi, mədəni müstəvidə etdiyi təxribatların bir cavabı var, o da hərbi yolla torpaqlarmızı işğaldan azad etməkdir. Mən bu məsələdə QHT-ləri passivlikdə günahlandırmazdım. Onlar görürlər ki, əlaqədar qurumların cavabları onların demək istədiyini də tam əhatə edir. Bundan əlavə, biz bəyanatlar verməklə Paşinyanın Şuşada yallı oynamasının qarşısını ala bilməyəcəyik. Bu da lazımdı, ancaq artıq harınlamış düşmənə layiqli cavab verməyin vaxtı tam yetişib. Onların ayağını Şuşadan kəsmək lazımdır ki, gedib orda yallı oynaya bilməsinlər. Onlar bizim mətbəxtimizdən tutmuş, bütün mədəni irsimizə iddia edir. Sübutlar və dəlillər ortaya qoysaq da, bunu davam etdirirlər. Deməli , bu cür ölkə ilə başqa dildə danışmaq lazımdır”.

Məhəmmədəli QƏRİBLİ

Son xəbərlər