Azərbaycan Mətbuat Şurası (MŞ) jurnalist Elmar Hüseynovun qətli ilə bağlı məsələnin araşdırılması, günahkarların tapılaraq cinayət məsuliyyətinə cəlb edilməsi işinin sürətləndirilməsi ilə bağlı Azərbaycan Respublikası Dövlət Təhlükəsizliyi Xidmətinə müraciət ünvanlayıb.
Müraciətdə bildirilir ki, MŞ mayın 3-də Ümumdünya Mətbuat Azadlığı Gününə həsr olunmuş “Mətbuat azadlığı: bəşəri mahiyyət və Azərbaycan reallıqları” mövzusunda konfrans keçirib. Ölkənin tanınan, ictimai fikrə təsir göstərən kütləvi informasiya vasitələrinin rəhbərlərinin, media ekspertlərinin və jurnalist birliklərinin təmsilçilərinin qatıldığı toplantının iştirakçıları bu qərara gəliblər ki, “Monitor” jurnalının baş redaktoru Elmar Hüseynovun 2005-ci il mart ayının 2-də törədilmiş qətlinin araşdırılması sürətləndirilməli və cinayəti törədən(lər) tezliklə tapılmalı, layiqli cəzalarını almalıdır. Müraciətdə Elmar Hüseynovun 2005-ci il martın 2-də törədilmiş qətli ilə bağlı cəzasızlığın davam etməsinin narahatlıq doğurduğu vurğulanıb. Bildirilib ki, jurnalist qətli hər bir ölkənin beynəlxalq imicinə mənfi təsir göstərən hadisədir: “Bu mənada, müəyyən siyasi qüvvələrin günahkar(lar)ın hələ də tapılıb cinayət məsuliyyətinə cəlb edilməmələri səbəbilə manipulyasiyalara yol vermələri də narahatlıq doğurmaqdadır”. DTX rəisi, general-polkovnik Mədət Quliyevə ünvanlanmış müraciətdə, həmçinin, ölkə jurnalistikası üçün böyük önəm daşıyan məsələyə həssas yanaşılacağına inam ifadə olunub.
Qeyd edək ki, bəzi qüvvələr MŞ-nın bu addımına ironik yanaşmağa cəhdlər edir. Sosial şəbəkələrdə aparılan müzakirələrdən görünür ki, MŞ-nın təşəbbüsünə qarşı çıxanların arqumentləri elə də tutarlı deyil. Məsələn, onlar qeyd edirlər ki, qətlin üstündən bu qədər vaxt keçibsə, hazırkı məqamda belə məzmunlu müraciətin edilməsi nəyə lazımdır və hansısa effekt verən deyil. Ancaq onlar unudurlar ki, əslində MŞ bununla bağlı müraciət etmək üçün tamamilə doğru bir ünvan seçib. Çünki Elmar Hüseynovla bağlı cinayət işinin istintaqı uzun müddət ləğv edilmiş MTN tərəfindən aparılıb. Həmin qurumun da necə fəaliyyət göstərdiyi bəlli oldu. Məhz bu baxımdan yanaşdıqda , DTX-nın yeni səyləri Elmar Hüseynovun qatillərinin tapılması ilə bağlı cinayət işinə yeni impuls verə bilərmi?
Mətbuat Şurası İdarə Heyətinin üzvü Azər Həsrət “Bakı-Xəbər”ə açıqlamasında bildirdi ki, rəhbərliyində təmsil olunduğu qurum həqiqətən də 3 may Ümumdünya Mətbuat Azadlığı Gününə həsr olunmuş tədbirdə bu məsələni yenidən qaldırıb: “Keçirdiyimiz tədbirdə hörmətli Əflatun Amaşov bu məsələnin üstünə gəldi, mən özüm də mövqeyimi bildirdim ki, Elmarın qatilləri və onun qətlini sifariş edənlər mütləq tapılıb cəzalandırılmalıdır. Qətlin üstündən 14 il keçdikdən sonra məsələni sərt qoymağımıza gəldikdə, bunun da izahı var. Bilirsiniz ki, bu cinayət işinin istintaqını ləğv edilmiş MTN aparırdı. Həmin qurum Azərbaycanın milli təhlükəsizliyini risqlər qarşısında qoymuşdu. Xüsusən də orda çalışan kriminal dəstənin ifşası və qanun qarşısında cəzalandırılmaları dediklərimizi tam sübut etmiş olur. Biriləri yüksək dövlət qurumunu kriminal münasibətlərin aydınlaşdırıldığı bir məkana çevirmişdi. Təbiidir ki, bəlli reputasiyada olan bir qurumun Elmar Hüseynovun qatillərini tapması gözlənilən deyildi. Ancaq Mədət Quliyevin rəhbərliyi ilə həmin qurum yenidən qurulandan sonra Azərbaycanda DTX-ya olan ümidlər artıb. Biz artıq hiss edirik ki, DTX həqiqətən də Azərbaycanın təhlükəsizliyinin keşiyində mətin dayanır. Xüsusilə də Mədət Quliyevin şəxsi personası, dövlət qarşısındakı xidmətləri bizi daha da ümidləndirir ki, onlar bu işin öhdəsindən gələ bilərlər. Məhz bu səbəbdən də Əflatun Amaşov Mədət Quliyevə müraciət etməyi məqsədəuyğun saydı. Bunu çox doğru addım kimi dəyərləndirirəm. Məsələnin sona çatdırılması, bu eyibin üzərimizdən götürülməsi üçün konkret addımlar atılmalıdır. Elmar Hüseynovu kimsə sevə və ya sevməyə bilər. Şəxsən mənim özüm də dəfələrlə demişəm ki, ideoloji olaraq onunla yollarım ayrı olub. Bunlara baxmayaraq, hər zaman demişəm ki, bu qətlin üstü mütləq açılmalıdır. Təkcə icraçılar deyil, eyni zamanda sifarişçilər də tapılıb qanun qarşısında dayanmalıdır. Çünki həmin qətlin törədilməsini Azərbaycan dövləti və dövlətçiliyinə qarşı bir qəsd olub. Bu qəsdin tam ifşası lazımdır. Biz Mədət Quliyev və onun peşəkar komandasına inanır və güvənirik”.
Məhəmmədəli QƏRİBLİ
