“Azərbaycanın beynəlxalq nüfuzu, eyni zamanda Çinlə və “Bir kəmər, bir yol” layihəsində yer alan ölkələrlə ikitərəfli əlaqələrinin yüksək səviyyədə olması Ermənistana bu imkanı tanıtmır”
Çinin paytaxtı Pekin şəhərində İpək yolu layihəsi təşəbbüsü çərçivəsində “Bir kəmər, bir yol” beynəlxalq konfransı keçirilir. Artıq ikinci dəfədir təşkil edilən konfransda Azərbaycan Prezidenti İlham Əliyev Rusiya prezidenti Vladimir Putin, Qazaxıstanın keçmiş prezidenti Nursultan Nazarbayev də iştirak edir. Ümumilikdə tədbirdə 40-a yaxın ölkə dövlət başçıları səviyyəsində təmsil olunur.
ABŞ höküməti konfransla bağlı bəyan edib ki, bu konfransda iştirak etmək üçün yüksək səviyyəli nümayəndə heyəti göndərəcək. Ermənistana gəldikdə isə, bu ölkə həmin konfransda iştirak etmir.
Ermənistan mətbuatı hazırda Baş nazir Nikol Paşinyanın İrəvanda olduğunu yazır. Ermənistan mətbuatının yaydığı məlumata görə, 2017-ci ildə keçirilən ilk konfransda həmin dövrdə Ermənistan prezidenti olan Serj Sarkisyan Qətərdə səfərdə olduğu üçün iştirak etməmişdi. Ümumiyyətlə, S.Sarkisyan 2017-ci ildə keçirilən konfransda iştirak etməyən Avrasiya İttifaqının dövlət başçılarından yeganə prezident idi.
Ermənistan nə üçün Çinin təşəbbüsü ilə keçirilən konfranslarda iştirak etmir? Erməni mətbuatı yazır ki, böyük ehtimalla, Çin rəhbərliyi Ermənistan rəhbərliyinə də dəvət göndərib, lakin nə o konfrans Ermənistan, nə də Ermənistan həmin konfrans üçün əhəmiyyətlidir. Yazılanlara görə, bu konfransda müzakirə edilənlər Ermənistana aid olmayan məsələlərdir. Yazıda qeyd edilir ki, Çinin baş naziri N.Paşinyanı Ermənistanın baş naziri seçilməsi münasibətilə təbrik etmişdi və bu ölkə ilə əməkdaşlıq etmək istədiklərini bildirmişdi. “Ancaq son dövrlər Çin - Ermənistan münasibətlərində heç bir yaxınlıq hiss olunmur.
Başqa istiqamətlərdə Ermənistanın Çinlə bağlı planları nədən ibarət ola bilər? Böyük ehtimalla, İrəvan Avrasiya İttifaqı ilə Çin arasında əməkdaşlığın böyüməsini gözləyir. Çünki həmin bu məsələ Ermənistan parlamentində də təsdiq olunub. Ancaq Avrasiya İttifaqından kənarda olan Çin - Ermənistan münasibətlərinə də nəzər salmaq olar. Çünki Çinin Avrasiya ölkələri arasında səfirliyi Rusiyadan sonra Ermənistanda inşa edilir”-deyə erməni mətbuatı yazır.
Ermənistan Çinin İpək yolu təşəbbüsünə niyə qoşula bilmir?
Mövzunu baki-xeber.com-a şərh edən “Xalq cəbhəsi” qəzetinin baş redaktoru, poltoloq Elçin Mirzəbəyli bildirdi ki, Paşinyanın sözügedən konfransda iştirak etməməsinin səbəbi hazırda çox yüksək səviyydə olan Azərbaycan - Çin münasibətləri ilə bağlıdır. “Paşinyanın belə nüfuzlu konfransda iştirak etməməsinin səbəbi Azərbaycanla Çin arasındakı yüksək səviyyəli münasibətlə bağlıdır. Əvvəla, “Bir kəmər, bir yol” layihəsinin tərkib hissəsinə çevirilmək, prosesə dəstək vermək üçün kifayət qədər ciddi iqtisadi potensiyala, həmçinin də böyük loqistik mərkəzlərə malik olmalısan. Ermənistanın isə belə imkanları yoxdur. Azərbaycan torpaqlarını işğal etməsi nəticəsində Ermənistan bölgədə həyata keçirilən bütün proseslərdən, layihələrdən kənarda qalıb. Əlbəttə, ölkəmizin bu istiqamətdə atdığı addımlar faktiki olaraq Ermənistanın bütün istiqamətlərdən yollarını bağlayıb. Azərbaycanın ərazisindən isə bir neçə nəqliyyat dəhlizi keçir və nəqliyyat dəhlizlərinin arasında əlaqə var. Ölkəmizin yerləşdiyi əlverişli coğrafi mövqe imkan verir ki, Azərbaycnın ərazisi “Bir kəmər, bir yol” layihəsinin tərkib hissəsi kimi fəaliyyət göstərsin. Təsadüfi deyil ki, Azərbaycanı layihənin qızıl mərkəzi adlandırırlar. Digər tərəfdən, ölkəmizin bu günə kimi həyata keçirdiyi layihələr var. Konkret olaraq Bakı-Tiflis-Qars dəmiryolu layihəsi heç bir beynəlxalq dəstək olmadan Azərbaycan tərəfindən həyata keçirildi. Bunun baş verməsi əslində ölkəmizin nəqliyyat dəhlizlərinə verdiyi önəmi və eyni zamanda bu dəhlizlərin reallaşması üçün güc, iradə, qətiyyət və təbii ki, iqtisadi potensialı ortaya qoydu. Bu baxımdan, Azərbaycan həmişə cəlbedici olub”.
E.Mirzəbəyli qeyd etdi ki, Ermənistan tərəfindən Çin - Azərbaycan münasibətləri çox böyük qısqanclıqla qarşılanır və ermənilər çox vaxt münasibətlərin mahiyyətini başa düşmədiklərini bəyan edir. “Çünki Çin BMT Təhlükəsizlik Şurasının üzvü kimi Azərbaycanın ərazi bütövlüyünü, müstəqilliyini, suverenliyini birmənalı şəkildə dəstəkləyir və daim eyni mövqedən çıxış edir. Bu aspektdən də, Ermənistanın indiki rəhbərliyi başa düşür ki, onun “Bir kəmər, bir yol” layihəsində iştirak etməsinin hər hansı bir perspektivi yoxdur. Nə qədər ki, işğala son qoymayıb, Ermənistan regiondakı bütün proseslərdən kənarda qalacaq, hətta Çin kimi nəhəng bir dövlətin irəli sürdüyü beynəlxalq təşəbbüslərdə də iştirak etmək imkanı əldə etməyəcək. Çünki Azərbaycanın beynəlxalq nüfuzu eyni zamanda Çinlə və “Bir kəmər, bir yol” layihəsində yer alan ölkələrlə ikitərəfli əlaqələrinin yüksək səviyyədə olması Ermənistana bu imkanı tanıtmır”-deyə E.Mirzəbəyli vurğuladı.
İradə SARIYEVA
