Uruqvayın Xarici Əlaqələr naziri vəzifəsini icra edən səfir Ariel Berqamino ilə Azərbaycan Respublikasının Şərqi Uruqvay Respublikasında akkreditə olunmuş səfiri Rəşad Aslanov arasında görüş keçirilib. Xarici İşlər Nazirliyinin yaydığı məlumata görə, Azərbaycan səfirinin müraciəti əsasında keçirilən bu görüşün başlıca məqsədi ikitərəfli gündəlikdə duran bir sıra məsələlərin müzakirəsi, o cümlədən, Azərbaycanın işğal olunmuş ərazilərində yaradılmış qondarma rejimin “nümayəndəsinin” Uruqvaya gəlməsi və burada guya ki, ölkə rəsmiləri də daxil olmaqla görüşlərin keçirilməsi ilə bağlı mətbuatda yayılan məlumatlara aydınlıq gətirilməsi olub.
Azərbaycanın işğal edilmiş ərazilərində yaradılan saxta qurumun qondarma “xarici işlər nazirinin” Uruqvaya səfəri məsələsi də sözügedən görüşdə müzakirə edilib. Uruqvayın Xarici işlər Nazirliyinin rəsmisi bəyan edib ki, Uruqvay Azərbaycanın ərazi bütövlüyünü tanıyır. Qurum rəsmisi onu da bildirib ki, Uruqvay beynəlxalq hüququn aliliyinə və dövlətlərin ərazi bütövlüyünə hörmətlə yanaşır və Uruqvay Dağlıq Qarabağın müstəqilliyini tanımır. O, həmçinin, münaqişənin sülh yolu ilə həll edilməli olduğu və Uruqvayın ATƏT-in Minsk Qrupunun səylərini və BMT Təhlükəsizlik Şurasının müvafiq qətnamələrini dəstəklədiyi vurğulayıb.
Qeyd edək ki, bu günlərdə qondarma Dağlıq Qarabağ rejiminin mümayəndəsi Uruqvayda olub və orada bəzi görüşlər keçirib. Hətta erməni saytlarında bu ölkənin vitse-perzidenti ilə həmin şəxsin şəkilləri də yayılıb. Bu olaydan sonra
Uruqvay höküməti bəyan edir ki, biz Azərbaycanın ərazibütövlüyünü tanıyırıq. Uruqvay Azərbaycanın ərazibütövlüyünü tanıyırsa, bəs onda nə üçün bu ölkənin vitse-prezidenti ilə separatçı rejimin rəhbərlərindən kiminsə görüşünə aydınlıq gətirilmir? Bu, Uruqvay hökümətindəki ikibaşlı oyununun əlaməti ola bilərmi?
Tanınmış politoloq Mübariz Əhmədoğlu baki-xeber.com-a bildirdi ki, Uruqvay höküməti separatçı rejimin müstəqilliyini tanımır və qondarma rejimin təmsilçisi Masis Mailyanın da sözügedən ölkəyə səfəri rəsmi xarakter daşımır. M.Əhmədoğlunun sözlərinə görə, M.Mailyan Uruqvayın vitse-prezidenti ilə deyil, bu ölkənin keçmiş prezidenti ilə görüşüb. “Separatçı rejimin nümayəndəsi Uruqvayın vitse-prezidenti ilə deyil, eks prezidenti Jose Mujica ilə görüşüb. O çox saf, təmiz adamdır və belə adamları da aldatmaq olduqca asandır. Uruqvay 1965-ci ildə ilk qondarma erməni soyqırımını tanıyan dövlətdir. Yəni o vaxt ermənilər Latın Amerikasına getdilər və həmin dövlətə sığındılar, bunun nəticəsində də qondarma soyqırımı tanıtdılar. İndi ermənilərin xəyalından keçir ki, Uruqvay qondarma erməni soyqırımını ilk tanıyıbsa Dağlıq Qarabağın müstəqilliyini (?) də bu ölkə tanısın. Uruqvayla ermənilər arasında uzun müddət əlaqə olub. Bu 5-10 il bundan əvvələ qədər belə idi. Lakin bizim dövlətimiz gücləndikdən sonra qitədən kənara çıxıb daha iri dövlətlərlə əməkdaşlıq əlaqələri yaratdı. Bizim xarici işlər nazirliyinin ilk rəsmi səfər etdiyi ölkələr də Latın Amerikası ölkələri, eləcə də Uruqvay oldu. Elə həmin dövrdə Uruqvay höküməti Azərbaycan hökümətinə vəd verdi ki, Dağlıq Qarabağ adlı qondarma rejimi tanımayacaq. O vaxtdan bu günə qədər də Uruqvay sözünün üstündə durub və ermənilərin saysız cəhdlərinə baxmayaraq, qondarma rejimin müstəqilliyini tanımır. Aprelin 24-ü ərəfəsində Uruqvay “erməni soyqırımı”nı rəsmən qeyd edir deyə Masis Mailyanı Uruqvaya göndərdilər. Ermənilərin məqsədi o səfərə Azərbaycanı qorxutmaq donu geydirmək idi ki, Uruqvay qondarma erməni soyqırımını birinci tanıyıbsa qondarma rejimin də müstəqilliyini birinci tanıyacaq. Mailyanın Uruqvaya səfərinin və ermənilərin bununla bağlı verdikləri bəyanatların heç bir siyasi gücü yoxdur”.
Ay yarım bundan əvvəl Azərbaycanın xarici işlər naziri Elmar Məmmədyarovun Latın Amerikasına, eləcə də Uruqvaya səfərini xatırladan M.Əhmədoğlu qeyd etdi ki, Latın Amerikasında erməni məsələsini tam nəzarət altına ala bilmişik. Onun sözlərinə görə, bu gün artıq ermənilər bizə cavab verməli olurlar. Azərbaycanın mövqeyinin Uruqvayda və digər Latın Amerikası ölkələrində ermənilərin mövqeyindən daha üstün olduğunu vurğulayan M.Əhmədoğlu qeyd etdi ki, bu gün Azərbaycan Uruqvay üçün qiymətli dövlətdir. “Bizim Uruqvayla həm siyasi, həm də iqtisadi əlaqələrimiz var. Eyni zamanda, Uruqvay da daxil olmaqla, bir neçə Latın Amerikası ölkəsinin Azərbaycanla yeni iqtisadi əməkdaşlıqlar qurmaq niyyətləri var. Yenə də deyirəm, Uruqvayda ermənilən planı baş tutmadı, verilən bəyanatlar blef idi. Separatçı rejimin nümayəndəsinin Uruqvaya səfəri rəsmi xarakter daşımayıb və Uruqvay höküməti birmənalı olaraq Azərbaycanın ərazi bütövlüyünü tanıyır”-deyə M.Əhmədoğlu bildirdi.
İradə SARIYEVA
