“Onun özü tərəfindən verilən açıqlama da bunu iddia etməyə əsas verir”
Xəbər verdiyimiz kimi, Bakının Kürdəxanı qəsəbəsində 810 məcburi köçkün ailəsi üçün salınan yeni yaşayış kompleksi aprelin 5-də istifadəyə verilib. Prezident İlham Əliyev açılış mərasimində iştirak edib. Prezident məcburi köçkünlərlə görüşüb və çıxış edərək deyib ki, Sabunçu rayonunda məcburi köçkünlər üçün salınmış yeni qəsəbənin açılışını biz birlikdə qeyd edirik: “Bu münasibətlə sizi ürəkdən təbrik edirəm. Mən çox şadam ki, belə gözəl qəsəbə salınıb, burada 810 ailə yaşayacaq... Bildiyiniz kimi, sonuncu çadır şəhərciyi 2007-ci ildə ləğv edildi. O vaxta qədər köçkünlərimizin böyük əksəriyyəti çadırlarda yaşayırdı. Təkcə keçən il məcburi köçkünlər üçün 5 mindən çox mənzil inşa edilmişdir. Onlar bu mənzillərə köçürülürlər. Bu il isə bizim planlarımızda minimum 6 min mənzilin istifadəyə verilməsi nəzərdə tutulub. Artıq bu prosesə start verilib və əminəm ki, ilin sonuna qədər biz buna nail olacağıq. Təkcə iki il ərzində təqribən 11 min məcburi köçkün ailəsi yeni evlərə köçürüləcək. Doğrudan da böyük işlərdir və orta hesabla bu mənzillərdə təqribən 50 minə yaxın insan yaşayacaq və öz məişət problemini həll edəcək... Əlbəttə ki, bizim əsas məqsədimiz Ermənistan-Azərbaycan Dağlıq Qarabağ münaqişəsinin həllidir. Bu istiqamətdə ardıcıl işlər aparılır. Bizim prinsipial mövqeyimizdə heç bir dəyişiklik yoxdur. Keçən il prezident seçkilərində xalqın mənə verdiyi dəstək imkan verir ki, biz bütün vədləri icra edək. Seçkilər ərəfəsində bildirmişdim ki, biz yeni iqtisadi modelə keçid edəcəyik, bütün sosial məsələlərin həllinə çalışacağıq. Yəni ciddi islahatların, iqtisadi və sosial sahədə islahatların anonsu prezident seçkiləri ərəfəsində verilmişdir. Seçkilərdən sonra ciddi islahatlara start verildi. Bu islahatlar çoxşaxəlidir... Deyə bilərəm ki, bütün addımlar əhali tərəfindən yüksək qiymətləndirilir. Yerlərdən gələn məktublar və müraciətlər deməyə əsas verir ki, islahatlar xalq tərəfindən dəstəklənir, buna yüksək qiymət verilir və bu bizə əlavə imkanlar yaradır”.
Ölkə başçısının çıxışında yerlərdən gələn məktublara istinad etməsi onu deməyə əsas verirmi ki, Prezident həmin məktublarla şəxsən tanış olur? Sosial məsələlər üzrə ekspert İlqar Hüseynli qəzetimizə açıqlamasında bildirdi ki, ölkə başçısının məlum çıxışı ilə o da yaxından tanışdı: “Yadınızdadırsa, biz məhz sizinlə bu mövzunu işləmişdik. Həmin yazıda qeyd edilmişdi ki, ölkə başçısının bütün vətəndaşların problemləri ilə şəxsən məşğul olmağa vaxtı yoxdur. Amma biz Prezidentin rayonlara etdiyi səfərlər zamanı əhalinin məktubları şəxsən onun özünə verməkdə maraqlı olduğunu müşahidə etdik. Ölkə başçısı burada fərdi məsələ ilə bağlı fikirini bildirmir. Ümumiləşdirilmiş halda danışır. Sözsüz ki, son vaxtlar əhalinin böyük hissəsi tərəfindən rəğbətlə qarşılanan problemli kreditlərlə bağlı məsələnin həlli, çoxmərtəbəli binaların sənədləşmə məsələsinin həllini tapması ilə bağlı ölkə başçısının adına çoxlu sayda minnətdarlıq məktubları göndərilir. Buna heç kimin şübhəsi ola bilməz. Təbiidir ki, ölkə başçısının ona müxtəlif kanallarla ünvanlanan məktubların hər biri ilə tanış olmaq kimi fiziki imkanı da yoxdur. Ancaq əminliklə demək olar ki, ona əlbəəl verilən məktubların əksəriyyəti ilə şəxsən tanış olur. Onun özü tərəfindən verilən açıqlama da bunu iddia etməyə əsas verir. Ancaq hansı sayda məktubun şəxsən Prezident tərəfindən oxunduğunu dəqiq demək, həmin prosesi yaxından izləmək bizim imkanlarımız xaricindədir".
Məhəmmədəli QƏRİBLİ
