“Yeni iqtisadi modelin həyata keçirilməsində məqsəd həm də insan kapitalının inkişaf etdirilməsidir”
“Seçkilər ərəfəsində bildirmişdim ki, biz yeni iqtisadi modelə keçid edəcəyik”. Bunu Prezident İlham Əliyev Kürdəxanı qəsəbəsində 810 məcburi köçkün ailəsi üçün salınan yeni yaşayış kompleksinin açılış mərasimində deyib. Ölkə başçısının sözlərinə görə, ölkədə indi çox ciddi iqtisadi islahatlar aparılır: “Bu islahatlar bizim maliyyə imkanlarımızı genişləndirir. Biz bu əlavə vəsaiti, ilk növbədə, sosial məsələlərə yönəldirik. Beləliklə, keçən il prezident seçkilərində xalqın mənə verdiyi dəstək imkan verir ki, biz bütün vədləri icra edək. Seçkilər ərəfəsində bildirmişdim ki, biz yeni iqtisadi modelə keçid edəcəyik, bütün sosial məsələlərin həllinə çalışacağıq. Yəni ciddi islahatların, iqtisadi və sosial sahədə islahatların anonsu prezident seçkiləri ərəfəsində verilmişdir. Seçkilərdən sonra ciddi islahatlara start verildi. Bu islahatlar çoxşaxəlidir. Siz və ictimaiyyət, təbii ki, bu islahatları izləyirsiniz. Verdiyim qərarlar, imzaladığım sərəncamlar həyatımızın hər bir sahəsinə müsbət təsir göstərəcək. Ölkəmiz yeniləşir, müasirləşir”. Prezident onu da qeyd edib ki, biz yeni iqtisadi model üzərində işlədiyimiz ümün elə etməliyik ki, ölkə iqtisadiyyatı bundan sonra da dayanıqlı şəkildə inkişaf etsin: “Biz bütün dövrlərdə, hətta böhranlı illərdə də sosial məsələlərə böyük diqqət göstərmişik. Keçən il artıq iqtisadi inkişaf başlamışdır, bu ilin iki ayının yekunları var. Bu yekunlar çox müsbətdir, iqtisadi artım kifayət qədər yüksəkdir, 3 faizə yaxındır. Qeyri-neft sektorunda sənaye istehsalı 15 faizdən çox artıbdır. Əhalinin gəlirləri artır, inflyasiya çox aşağı səviyyədədir, 2 faizdən aşağıdır, istehlak qiymətlərinə çox ciddi nəzarət edilir. Yəni, demək istəyirəm ki, iqtisadi və sosial islahatların yeni mərhələsinin startı prezident seçkilərindən sonra verilmişdir və bu gün biz bunun nəticəsini görürük”. Maraqlıdır, ötən il keçirilən prezident seçkilərindən indiyə qədər ölkədə yeni iqtisadi modelə keçid hansı addımlarla xarakterizə olunur və ümumiyyətlə, bu iqtisadi modelin hələlikdə hansı xüsusiyyətləri özünü göstərir?
Sözügedən məsələ ilə bağlı fikirlərini “Bakı-Xəbər”lə bölüşən iqtisad elmləri doktoru Müslüm İbrahimovun sözlərinə görə, yeni iqtisadi modelin əsas hədəfi daha səmərəli idarəçiliyi tətbiq etmək və iqtisadi artıma nail olmaqdır: “Eyni zamanda, ölkənin hər bir vətəndaşının iqtisadi inkişafda rolunu müəyyən etməkdir. Ölkədə ümumi daxili məhsul istehsalında hər bir vətəndaş iştirak etməlidir. Yeni modeldə sosial istiqamətlərə önəm verilib. Təkcə neft sektorunun inkişaf etdirilməsi yox, qeyri-neft sektorunun inkişaf etdirilməsi də prioritetdir. Sahibkarlıq fəaliyyətinin daha da genişləndirilməsi qarşıya məqsəd qoyulub. Artıq ötən ildən başlayaraq iqtisadi artım müşahidə olunur. Ən başlıcası iqtisadiyyatın təkcə neft sektoru deyil, qeyri-neft sektoru da inkişaf edir. İqtisadiyyatda qeyri-neft sektorunun çəkisi artır. Dövlət tərəfindən kənd təsərrüfatının, xidmət sektorunun inkişafına göstərilən dəstək xeyli artıb. Bununla bağlı bir sıra proqramlar həyata keçirilir. Bütün bunlarda əsas məqsəd ondan ibarətdir ki, ölkə vətəndaşlarının məşğulluğu daha geniş müstəvidə təmin edilsin. Yeni iqtisadi modelin həyata keçirilməsində məqsəd həm də insan kapitalının inkişaf etdirilməsidir. Aparılan instisional islahatlar nəticəsində bu məqsədlərə çatmaq olar. Cənab president bəyan etdi ki, inistisional idarəetmə sistemi daha da modernləşdirilməlidir. Bu qeyri-neft sektorunun inkişafında daha mühüm rol oynayacaq. Qarşıdakı dövrdə yeni iqtisadi model öz konturlarını daha qabarıq şəkildə göstərəcək. Qoyduğumuz məqsədlərə çatmaq üçün orbitr rolunu oynayacaq”.
Vidadi ORDAHALLI
