“Belə təəssürat yaranır ki, onlar Prezidentin məsləhətlərinə qulaq asmaq istəmirlər”
Hakim komandada təmsil olan tanınmış bir şəxsin öz oğluna dəbdəbəli toy etməsi haqda məlumat yayılıb ( etik qaydalara görə adını yazmırıq-red). Həmin şəxsin özü məlumatı təsdiqləyib və bildirib ki, toy aprelin 19-da Bakıdakı dəbdəbəli şadlıq saraylarından birində olacaq: “Bəli, inşaallah, bu ayın 19-u oğlumun toy mərasimini edəcəyəm”. Həmin şəxs ziyafətin baş tutacağı şadlıq sarayının adını və tarixini qeyd etdiyi səbəbindən, media təmsilçiləri həmin restoranla əlaqə saxlayıb, güya toy etmək adı ilə bəzi detalları dəqiqləşdiriblər. Jurnalistlər məhz həmin gündə, yəni aprelin 19-da toy etmək istədiklərini bildiriblər. Restoranın Fərid adlı müdiri deyib ki, bu ayın 19-na artıq mühüm toy sifarişimiz var: “Toyun vaxtını dəyişdirmək mümkünsüzdür. Masanın qiymətlərinə gəldikdə isə, qiymətlər fərqlidir. Bir nəfərlik masanın qiyməti 220 manatdan başlayır, 300 manata qədər dəyişir”. Qeyd edək ki, bu məlumat sosial şəbəkəlrdə bomba effekti verib. Vətəndaşlar bu qiymətə toy etməyə hazırlaşan şəxsi israfçılıqda günahlandırırlar. Bəs görəsən siyasilər bu mövzu ilə bağlı nə düşünür? Azərbaycan Sosialist Partiyasının sədri Elşən Həsənov “Bakı-Xəbər”ə bildirdi ki, bu məlumatı görəndən sonra xeyli təəccüblənib və hətta əsəbdən təzyiqi qalxıb: “Əgər söhbət hansısa bir tanınmış, gəlirləri leqal olan iş adamından getsəydi buna veriləsi cavab vardı. Deyərdi ki, lap istəyirəm 1000 manatlıq toy edirəm, kimə nə var? Şəxsən mən bir dəfə xarici ölkədə yaşayan, uşaqlıq dostum olan bir nəfərin övladına etdiyi toya dəvət edilmişəm. Qiymət bundan da baha idi. Amma adını çəksəm, bəlkə də onu ölkədə heç kim tanımayacaq. Belə adamların bahalı toy etməsi qıcıq yarada bilməz. Mən həmin toya həyat yoldaşımla getdim. Məntiqlə ən aşağısı 1000 manat pul salmalıydım. Amma kiçik bir hədiyyə alıb apardıq. Çünki əvvəlcədən bizə demişdilər ki, toyda pul yığılmayacaq. Sizi inandırım ki, heç verilən hədiyyələrə belə baxmırdılar. Bu tamamilə başqa məsələdi. Sizin dediyiniz məsələdə isə söhbət cəmiyyətə örnək olmalı peşə, vəzifə sahibindən gedir. Onların bu cür hərəkəti əhalidə qıcıq yaradır. Ən əsası isə belə təəssürat yaranır ki, onlar Prezidentin məsləhətlərinə qulaq asmaq istəmirlər. Çünki cənab Prezident dəfələrlə deyib ki, məmurlar, hakim komandanın təmsilçiləri harın, dəbəbəli həyat tərzi keçirməməlidir. Sadəlikləri ilə seçilməli, xalqın xidmətində olmalıdırlar. Ölkə başçısının özü və ailəsinin keçirdiyi ad günləri sosial şəbəkələrdə paylaşılır. Olduqca sadə üsulda qeyd edirlər. Axı bir adam 300 manatlıq yeyə bilməz. Bunun bir adı da israfdır. Ölkədə çox böyük əksəriyyət elə o civarda maaş və ya pensiya alır. Əgər bu adam toya 500 adam çağırsa, təkcə restorana 150 min ödəməlidir. Bunun hələ başqa xərclərini demirəm. Bir sözlə, biabırçı mənzərədi”.
Məhəmmədəli QƏRİBLİ
