Məhərrəm Zülfüqarlı:”Azərbaycanda indiyə qədər şəffaflığın tam şəkildə təmin edilməməsinin əsas səbəbi bütün sahələrdə bəzi rüşvətxor, korrupsioner məmurların olmasıdır”
Azərbaycanda bütün sahələrdə şəffaflığın təmin edilməsi istiqamətində addımlar atılır.
Prezident İlham Əliyev ölkəmizdə şəffaflığın bərqərar edilməsi üçün gərək olan bütün tədbirlərin həyata keçirlməsini diqqətdə saxlayır. Aprelin 5-də paytaxtın Sabunçu rayonunun Kürdəxanı qəsəbəsində 810 məcburi köçkün ailəsi üçün salınan yeni yaşayış kompleksinin açılışında iştirak edən Prezident İlham Əliyev öz çıxında bir sıra məsələrə toxunub. Prezident çıxışında əsasən dövlətimizin daha yüksək səviyyədə inkişafına nail olmağın yollarını göstərib. “...Azərbaycanı inkişaf etdirməliyik. Elə etməliyik ki, bütün problemlər öz həllini tapsın. İqtisadi, sosial sahələrdə, məhkəmə-hüquq, dövlət orqanları sahələrində bütün xoşagəlməz hallara son qoyulmalıdır. Azərbaycanda şəffaflıq tam təmin edilməlidir və biz buna nail olacağıq. Bu bizə əlavə imkanlar verəcək. Büdcə daxilolmaları daha da artacaq, sosial məsələlərin həlli daha sürətlə gedəcək”.
Azərbaycanda hazırda hansı səbəbdən tam şəffaflıq təmin edilməyib?
“İki sahil” qəzetinin baş redaktoru, tanınmış ictimai xadim Vüqar Rəhimzadə baki-xeber.com-a bildirdi ki, ölkəmizdə şəffaflığın təmin edilməsi sahəsində davamlı olaraq tədbirlər həyata keçirilir. “Cənab Prezidentin bu bəyanatı, təbii ki, müəyyən sahələri nəzərdə tutan bətyanatdır. Düşünürəm ki, bununla bağlı artıq lazımı islahatlar gerçəkləşdirilməkdədir. Kadr islahatları ilə əlaqədar son günlər çox uğurlu addımlar atılıb. Vətəndaşların sosial həyat şəraitinin yaxşılaşdırılması ilə bağlı kifayət qədər risqli, eyni zamanda da dünya üçün nümunə olan layihələr həyata keçirilir. Bir çox islahlatlar var ki, buna doğrudan da vətəndaşların bir şəkki-şübhəsi olmasın, birmənalı olaraq bu proseslərin həmin sahələrdə təkmilləşdirilməsi, tətbiq olunması istiqamətində uğurlu işlər görülüb. Cənab Prezident yəqin ki, özü bilir və bu sahələr onun dəqiqliklə nəzərdə tutduğu sahələrdir. Hesab edirəm ki, bu islahatlar deyilən proseslərin məhz sürətlə reallaşmasına təminat verən islahatlardır Mən ona görə konkret olaraq sahələrin adlarını çəkmədim ki, cənab Prezident hansı sahələrdə şəffaflığın təmin olunmadığını bizdən də yaxşı bilir. Hər halda, iqtisadi islahatlarla, kifayət qədər şəffaflığın təmin olunması ilə bağlı işlər reallaşdırlıb. Əhalinin sosial vəziyyətinin yaxşılaşması istiqamətində kifayət qədər uğurlu işlər görülüb. Fikrimcə, bu sahələrdə şəffaflığın təmin olunması ilə bağlı nailiyyətlər əldə olunub, biz onların şahidiyik. Ancaq digər məsələlər var ki, onu cənab Prezident bizdən qat-qat yaxşı bilir və onlarla bağlı nəzərdə tutduğu fikirlər var və o, bunları da reallşadıracaq, bunu bütün cəmiyyət, xalq görəcək”-deyə V.Rəhimzadə bildirdi.
Tarix elmələri doktoru, siyasi icmalçı Məhərrəm Zülfüqarlı isə bildirdi ki, Prezident “iqisadi, sosial sahələrdə, məhkəmə-hüquq, dövlət orqanları sahələrində bütün xoşagəlməz hallara son qoyulmalıdır” fikrini bildirməklə bütün sahələrdə şəffaflığın tam təmin olması istiqamətində fəaliyyət göstərdiyini bir daha vurğuladı. M.Zülfüqarlı hesab edir ki, səhiyyə, məhkəmə-hüquq, təhsil, mədəniyyət, eləcə də digər sahələrdə məmurlar var ki, onlar bu istiqamətlərdə şəffaflığın tam təmin olunmasını ləngidirlər. “Cənab Prezidentin vurğuladığı kimi, bütün sahələrdə şəffaflığın təmin edilməsi olduqca vacib bir məsələdir. Azərbaycanda indiyə qədər şəffaflığın tam şəkildə təmin edilməməsinin əsas səbəbi bütün sahələrdə bəzi rüşvətxor, korrupsioner məmurların olmasıdır. Həmin məmurlar öz xoşagəlməz fəaliyyətləri ilə şəffaflığın tam təmin olunmasına imkan vermirlər. Bu gün səhiyyədə, təhsildə, məhkəmədə və s. sahələrdə belə məmurlar var və onlar şəffaflığın tam bərqərar olmasına maneə törədirlər”.
Bütün sahələrdə rüşvətxor məmurların sıradan çıxarılmalı olduğunu deyən V.Zülfüqarlı hesab edir ki, bundan sonra bütün sahələrdə şəffaflıq tam şəkildə təmin ediləcək. O qeyd etdi ki, belə məmurlar olmasa Azərbaycanda şəffaflıqla bağlı heç bir problem olmayacaq. Ölkədə şəffaflığın təmin edilməsi istiqamətində Prezident İlham Əliyevin məqəsdyönlü və uğurlu addımlar atdığını deyən M.Zülfüqarlının sözlərinə görə, bu öz müsbət nəticəsini daha yüksək səviyyədə verəcək.
İradə SARIYEVA
