Ticarət Mərkəzinin yanması nəticəsində ziyan çəkmiş sahibkarların Azərbaycan Prezidentinin hərtərəfli himayəsi altına alınacağı çox real və gözlənilən idi.
Bu sözləri baki-xeber.com-a eyniadlı qəzetin və saytın Baş redaktoru, politoloq Aydın Quliyev deyib. Onun sözlərinə görə, böyük və rəngarəng sosial paketin aylardı ki, fasiləsiz olaraq aparılması, ehtiyacı olan bütün həssas təbəqə təmsilçilərinin Prezident himayəsinə alınması, rayonlarda son zəlzələdən zərər çəkmiş insanlara köməklik göstərilməsi bu dəfə də sahibkarların diqqətdən kənatda qalmayacağını qətiyyətlə deməyə əsas verirdi:”Ticarət mərkəzində yanğın nəticəsində əmlakını itirmış ınsanlara dövlətin dəstəyi Azərbaycan Prezidentinin iradəsinin, humanist xarakter və davranışlarının, dövlətimizin iqtisadi gücünün və sosial mudafiənin daimi işləyən instituta çevrilməsinin birbaşa təzahürüdür. Azərbaycanda qanuni sahibkarlığın dövlətin leqal maliyyə və siyasi dəstəyi altında olduğu növbəti dəfə nümayiş etdirildi. İstehsal, xidmət və ticarət sahəsində həqiqətən vətənpərvər və sırf milli kapitala söykənən sahibkarlar sinfinin yaradılmasının milli strategiya olaraq vacibliyi növbəti dəfə ortaya qoyuldu. Haqsız rəqabət, texnogen qəzalar, kriminal proseslər və sair kimi fövqəladə hallarda sahibkarların ən ardıcıl himayədarının məhz Prezident olmasının bir daha şahidi olduq. Prezidentin yanında keçirilən müşavirədə dövlət başçısının öz çıxışında yanğının nəticələrinə qarşı təsvir etdiyi təkmil mexanizmin təhlili göstərir ki, Azərbaycan dövləti fövqəladə hallar üçün yetərli təcrübəyə malikdir”.
Aydın Quliyev onu da bildirdi ki, bununla dövlətçilik strukturunda, xüsusilə polisin, fövqəladə xidmətlərin və digər bəzi icra orqanlarının hazırlıqlı və peşəkar olduqlarını gördük:”Prezidentin müşavirədə yanğından zərər çəkmiş sahibkarların dövlət orqanları tərəfindən bir-bir qəbul edilməsinə göstəriş verməsi, habelə hər kəsə dəymiş ziyana görə yardım göstəriləcəyini bildirməsi xüsusi məzmuna malik sosial-humanitar fenomenlərdi. Bu fenomenin mahiyyəti odur ki, Azərbaycanda hər bir insanın mülkiyyətinə dövlətin gücü daxilində təminat var və ölkəmizdə sosial müdafiənin strateji hədəfi prinsipial şəkildə dəyişərək, dünyada tək-tək dövlətlərdə olan xarakteri almaqdadır. Azərbaycan dövlətinin unikal nailiyyəti sayıla bilən bu dəyişiklik o deməkdir ki, indi məqsəd cəmiyyətimizin nisbi və ya mütləq əksəriyyətini yox, hər bir fərdi dövlətin sosial müdafiəsi altına almaqdır. Yanğında zərər çəkmişlərə yardım göstərilməsi sübut edir ki, heç bir Azərbaycan vətəndaşının sosial himayədən kənarda qalmayacağına təminat verən dövlət kursu götürülüb. Bu kursun müəllifi və əsas icraçısı Prezidentin özüdür. Azərbaycan dünyaya əhalinin əksər hissəsinin sosial himayə altına alındığı sistemdən hər bir vətəndaşın sosial himayəyə alındığı sistemə uğurlu keçidi nümayiş etdirmək istəyir. Kurs elə icra edilir ki, onun tam uğurla həyata keçiriləcəyinə böyük təminatlar var. Sonda sosial himayədən bircə nəfərin də kənarda qalmadığı bir inkişaf modelinin şahidi ola biləcəyik”.
