ABŞ prezidenti Trampın Colan Təpəliyi üzərində İsrailin süverenliyini tanımaq barədə bəyanatı Ermənistanda da reaksiya doğurub.
Məlumdur ki, Colan Təpəliyi tarixən Suriyaya məxsusdur və İsrail bu ərazini 1967-ci ildə hərbi güclə işğal edərək özünə birləşdirib. O vaxtdan BMT TŞ dəfələrlə qərar qəbul etsə də, İsrail ərəb torpaqlarını azad etmir. Eynilə Ermənistanın Qarabağda apardığı işğalçı siyasəti İsrail Yaxın Şərqdə aparır. Tramp öz tvitter səhifəsində yazıb ki, İsrailin Colan üzərində süverenliyini tanımadığımız 52 il yetər. Beləliklə, Tramp Qüdsü İsrailin paytaxtı kimi tanıyandan il yarım sonra ikinci dəfə belə ədalətsiz, beynəlxalq hüquqa zidd və işğalçıya dəstək xarakterli addım atır. Bütün dünya şokdadı ki, Tramp Amerikanın dünyada olan-qalan nüfuzunu da uç qəpiklik edən bu irticaçı bəyanatı niyə verir. Amerikanın belə addımların ağrısını çəkəcəyi şübhəsizdir. Çünki tək İsraili yox, dünyada İsrail kimi digər təcavüzkar ölkələri də həvəsləndirir. Ermənistanın bu bəyanatdan necə ruhlandığı bunu təsdiq edir. Erməni siyasətçilər daha uzağa gedərək ABŞ-ın bir gün işğal edilmiş Dağlıq Qarabağ üzərində Ermənistanın da süveren hüququnu tanıyacağını ehtimal edirlər. Hətta sübut da tapıblar ki, ABŞ-ın artıq 49 ştatı qondarma erməni genosidini tanıyıb və Missisipi ştatı da bu addımı atandan sonra Amerika separatçı rejimi Ermənistanın bir hissəsi kimi tanıyacaq.
Lakin separatçıların və təcavüzkarların unutduğu şeylər var. Ermənistan İsrail deyil, Azərbaycan xalqı isə Suriya xalqı deyil ki, buna dözsün, həm də Tramp bilməmiş deyil ki, Colan qərarı ilə onsuz da Yaxın Şərqi yeni alovlara çəkdiyi yetər, belə bir addımı Qarabağa münasibətdə atacağı halda bütün Azərbaycan xalqının və bölgə xalqlarının misilsiz nifrətini qazana bilər. Bir sözlə, ermənilərin həvəslənməsi boşunadır...
Ramil QULİYEV
