“Bu, Azərbaycanın dünyada daha da tanıdılmasına xidmət edəcək”
Kino hər bir ölkənin dünyada tanıdılmasında, mədəniyyətinin təbiğində mühüm rol oynayır. Azərbaycanın zəngin kino ənənələri var. Bütün bunların yaşadılması və inkişafı üçün dövlət öz qayğısını əsirgəmir. Məlum olduğu kimi, Prezident İlham Əliyev mədəniyyətə dövlət qayğısının daha da artırılması, kino sənəti ənənələrinin yaşadılması və film istehsalı sahəsinin modernləşdirilməsi ilə bağlı sərəncam imzalayıb. Sərəncamda Mədəniyyət Nazirliyinə “Azərbaycan kinematoqrafiyasının inkişaf konsepsiyası” layihəsini üç ay müddətində Azərbaycan Respublikası Kinematoqrafçılar İttifaqının və digər aidiyyəti qurumların təkliflərini nəzərə almaqla hazırlamaq tapşırılıb. Sərəncama əsasən, dövlət sifarişi ilə film istehsalını və gənc kinematoqrafçıların yaradıcılığının dəstəklənməsi ilə bağlı layihələrin həyata keçirilməsini təmin etmək məqsədi ilə Azərbaycan Respublikasının 2019-cu il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Mədəniyyət Nazirliyinə 5 milyon manat ayrılıb. Görünən odur ki, dövlət büdcəsi xəttilə kino çəkilişi mütləq bərpa olunmalıdlr. Sözügedən sahəyə büdcədən daha çox vəsait ayrılmalıdır və bu minvalla daha çox kino sifariş verilməlidir. Ümumilikdə bunu mütəxəssislər necə dəyərləndirir? Bunun nə faydası olacaq?
Məsələyə münasibət bildirən Azərbaycanda Atatürk Mərkəzinin şöbə müdiri Əkbər Qoşalının sözlərinə görə, bunun faydası çox böyük olacaq: “Əvvəla, Prezident İlham Əliyev hər zaman mədəniyyətə qayğı göstərib. Ən çətin dövrlərdə belə, qayğısını əsirgəməyib. Tarixi 121 il öncədən – fotoqraf və nasir Aleksandr Mişon tərəfindən çəkilmiş xronika süjetlərindən başladığı rəsmi təsdiq edilən Azərbaycan kinematoqrafiyası özünəməxsus inkişaf yolu keçib. Çar dövrü, Cümhuriyyət dövrü, Zaqfederasiya dövrü, II Dünya müharibəsinədək və müharibədən sonrakı dövr də daxil olmaqla Sovetlər dövrü, müstəqillik dövrü kimi şərti mərhələlərdən keçmiş Azərbaycan kinematoqrafiyasının artıq yeni bir mərhələyə keçdiyinə ümid edir və inanırıq. Bu ümid və inam haqqında danışdığımız Sərəncamla biləvasitə möhkəmlənir. Bütövlükdə, dövlət büdcəsindən bu sahəyə nə qədər çox vəsait ayrılsa, bu bir o qədər mili kinomuzun inkişafına öz töhvəsini verər. Bu, Azərbaycanın dünyada daha da tanıdılmasına xidmət edəcək. Bu məsələdə kinonun rolu böyükdür. O baxımdan dövlət sifarişi ilə film istehsalı və gənc kinematoqrafların yaradıcılığının dəstəklənməsi ilə bağlı ilkin olaraq beş milyon manat ayrılması fərqləndirilməli hadisələrdir. Müstəqil dövlətin vətənpərvərlik, qəhrəmanlıq tarixinin qabardılması vacibdir. Ölkə ekran-efirlərinin, kinoteatrlarının dünya kino sənayesinin nadir inciləri, çağdaş şedevrləri ilə yanaşı, milli düşüncəni, bəşəri çağırışları bir axarda təqdim edən Azərbaycan sənət hadisələri ilə süslənməsi günümüzə, güzəranamıza rəng qatar. Gözəllik, necə deyərlər, zövqü-səfa bəxş edər. Belə bir müdrik söz var: sənət öz estetik dəyərləri ilə inkişaf etməlidir. Bu baxımdan, dövlət sifarişləri ilə dəstəklənən milli kinematoqrafiya təsərrüfatımız canlandıqca özəl sektorun kinoya dəstəyi, reklam işi və başqa dəstəklər də özünü göstərəcək”.
Vidadi ORDAHALLI
