“Prezidentin mədəniyyət xadimləri ilə görüşü, eləcə də burada mədəniyyətin bizi düşündürən problemlərinin səsləndirilməsi və onların aradan qaldırılması üçün operativ reaksiyanın verlməsi çox əhəmiyyətlidir”
“Bu görüş, orada aparılan açıq söhbət mədəniyyətimizə yalnız inkişaf bəxş edəcək”.
“Cənab Prezident hamını dinlədi, hər kəsə diqqət yetirdi, heç kəsin sözünü kəsmədi...”
Prezident İlham Əliyevin və ölkəmizin Birinci Vitse-Prezidenti Mehriban Əliyevanın bir qrup mədəniyyət xadimini qəbul etməsi və burada mədəniyyət sahəsi ilə bağlı aparılan müzakirələr effektivdir. Görüşdə iştirak edən mədəniyyət xadimləri hesab edir ki, bu görüş mədəniyyətimizin çağdaş vəziyyətinin yüksəlməsinə səbəb olacaq.
Azərbaycan Bəstəkarlar İttifaqının sədri, xalq artisti Firəngiz Əlizadə baki-xeber.com-a bildirdi ki, bu görüş mədəniyyətimizdə yeni tarixi səhifə açıb.
“Prezidentin mədəniyyət xadimləri ilə görüşü, eləcə də burada mədəniyyətin bizi düşündürən problemlərinin səsləndirilməsi və onların aradan qaldırılması üçün operativ reaksiyanın verilməsi çox əhəmiyyətlidir. Bu görüş, orada aparılan açıq söhbət mədəniyyətimizə yalnız inkişaf bəxş edəcək. Bilirsiz ki, cənab Prezident hamını dinlədi, hər kəsə diqqət yetirdi, heç kəsin sözünü kəsmədi. Biz mədəniyyətin, mədəniyyət xadimlərinin, eləcə də gənclərin qarşılaşdığı problemlərlə bağlı fikirlərlə çıxış etdik. Əlbəttə, bu şəraiti bizə cənab Prezident yaratdı. Mən çox ölkələrdə olmuşam, çox insanlarla ünsiyyətdə olmuşam, ancaq heç bir dövlət başçısının insanlarla, mədəniyyət xadimləri, ziyalılarla belə açıq müstəvidə danışmasını görməmişəm. Prezidentin bizimlə təması, hər bir çıxış edən sənətkara diqqətlə qulaq asması, səsləndirilən fikirləri qeyd etməsi, başlıcası isə bütün vacib və əhəmiyyətli işlərindən vaxt ayırıb bizimlə görüşməsi çox unikal bir haldır. Bilirsiz ki, cənab Prezidentin göstərişi ilə Bəstəkarlar İttifaqı, Rəssamlar İttifaqı və Yazıçılar Birliyinin birgə Yaradıcılıq Evi inşa olunur. Bu barədə görüşdə Anar müəllim danışdı. Mən orada bir sıra məsələlərə toxundum və onların hamısı da elə yerindəcə Prezident tərəfindən öz həllini tapdı. Prezident bizi maraqlandıran, qayğılandıran bütün məsələlərə, təkliflərə diqqətlə yanaşdı və onları həll etdi. O görüşdə iştirak edən heç bir mədəniyyət xadimi öz şəxsi xahişini ortaya qoymadı, hamı mədəniyyətin inkişaf etdirilməsi yolları haqqında danışdı, təkliflər verdi. Ümumiyyətlə, biz mədəniyyət xadimləri ölkədə həyata keçirilən islahatları, onun uğurlarını ictimaiyyətə çatdırmalıyıq. Mədəniyyətimizdə də islahatlar həyata keçirilir.
Mən orada 90 yaşlı bəstəkar, Abxaziya qaçqını Yaşar İmanovun problemindən danışdım. Onun evinin olmamasını cənab Prezidentə dedim. O da bundan xəbərsiz olduğunu dedi. Bu problem öz həllini tapdı.
Gənc bəstəkarların da mənzillə təmin edilməsi məsələsini səsləndirdim, ona da müsbət cavab aldıq. Bizim musiqidə son illər islahatlar aparılır. Mən burada Heydər Əliyev Fondunun işini xüsusi vurğulamaq istəyirəm”- deyə F.Əlizadə bildirdi.
Ümumiyyətlə, bu görüşün mədəniyyətin inkişafına, onun xarici ölkələrdə yüksək səviyyədə keçirilməsinə böyük təkan olduğunu deyən F.Əlizadə bildirdi ki, uzun illərdir öz şəxsi vəsaiti hesabına keçirdiyi “İpək yolu” Musiqi festivalı bundan sonra dövlət tərəfindən ayrılan maliyyə ilə keçiriləcək.
İradə SARIYEVA
