Zakir Əhmədov: "Ölkənin valyuta gəlirlərinin xaricə axınının qarşısını alacaq"
Məlum olduğu kimi, Prezident İlham Əliyev "İcra hakimiyyəti orqanlarının və dövlət büdcəsindən maliyyələşən təşkilatların fəaliyyətində satınalmaların səmərəliliyinin artırılması ilə bağlı əlavə tədbirlər haqqında" Fərman imzalayıb.
Məqsəd icra hakimiyyəti orqanlarının və dövlət büdcəsindən maliyyələşən təşkilatların fəaliyyətində səmərəliliyi artırmaq, ölkədə sahibkarlıq fəaliyyətini genişləndirmək, habelə biznes və investisiya mühitinin əlverişliliyini və rəqabət qabiliyyətini daha da gücləndirməkdir.
Sənədə əsasən, icra hakimiyyəti orqanları və dövlət büdcəsindən maliyyələşən təşkilatlar tərəfindən 2018-ci il 1 yanvar tarixinədək idxal mallarının (işlərinin, xidmətlərinin) satın alınması dayandırılıb. Bu müddət ərzində həmin malların (işlərin, xidmətlərin) satın alınmasına razılıq verilməsi barədə qərarı ölkə Prezidenti ilə razılaşdırmaqla İqtisadiyyat Nazirliyi qəbul edir.
Sözügedən fərmanın mahiyyəti ondan ibarətdir ki, 2018-ci il yanvarın 1-nə qədər icra hakimiyyəti orqanları və büdcə təşkilatları öz ehtiyacları üçün hansısa mal və xidmətlər sifariş versə, bunu ancaq yerli istehsal və xidmətlər hesabına etməli olacaq. Məsələn, hansısa dövlət qurumunun binasında mebellərin yenilənməsinə zərurət yaransa, həmin nazirlik İtaliya mebeli deyil, ancaq Azərbaycan mebeli almalı olacaq. Eləcə də xidməti avtomobilləri yeniləmək və ya yeni avtomobillər almaq lazım gəlsə, onlar "Mercedes" və ya BMW limuzinləri deyil, "NAZ-Lifan" sifariş verməli olacaq.
Onu da qeyd edək ki, Prezident İlham Əliyevin ilin əvvəlində keçirdiyi müşavirələrdə yerli istehsalın dəstəklənməsinin vacibliyi barədə çıxışlarında bu məqama xüsusi toxunub. Dövlət başçısı yerli avtomobil istehsalını dəstəkləmək üçün Naxçıvan Avtomobil Zavodunun istehsalı olan "NAZ-Lifan" avtomobillərini almağa çağırmışdı. Eyni zamanda o, Azərbaycanda mebel sənayesinin keyfiyyətli məhsul buraxdığını qeyd edərək büdcədən maliyyələşən təşkilatlara xaricdən bahalı mebel sifariş vermək əvəzinə, bu məhsullara üstünlük verməyi tapşırıb. Görünən odur ki, bunun qanunla tənzimlənməsi daha məqbul variantdır və Prezidentin aylar öncəki məlum çıxışının davamıdır.
Maraqlıdır, bəs ekspertlər fərmandan irəli gələn məsələləri necə dəyərləndirir?
Məsələyə münasibət bildirən ekspert Zakir Əhmədovun sözlərinə görə, sözügedən fərmanın mühüm əhəmiyyəti var: "Əhəmiyyəti ondan ibarətdir ki, bunun qanun çərçivəsində tənzimlənməsi yerli istehsalın önəmini artıracaq. Büdcədən maliyyələşən təşkilatların yerli istehsala üstünlük verməsi və yerli şirkətlərin xidmətlərindən istifadə etməsi nəticəsində ölkədə sahibkarlıq, istehsal fəaliyyəti üçün əlavə stimul yaranmış olacaq. Nəticədə həmin sahələrdə sifarişlər artacaq ki, bu da birbaşa olaraq istehsalın canlanmasına və yeni iş yerlərinin açılmasına təkan verəcək. Bununla yanaşı, bu, iqtisadiyyatın şaxələnməsinə öz müsbət təsirini göstərəcək. Belə ki, bu istiqamətdə ciddi işlər görülür, struktur islahatları aparılır. Sözügedən qərar həm də ölkənin valyuta gəlirlərinin xaricə axınının qarşısını alacaq. İndiki məqamda bu amilin nə qədər vacib olduğu göz qabağındadır. Həmin vəsaitlər manat şəklində yerli istehsalçılara və xidmət şirkətlərinə dövr edəcək. Bu da real iqtisadiyyatın canlanmasına öz təsirini göstərəcək. Bu həm də əhalinin məşğulluq səviyyəsinə öz müsbət təsirini göstərəcək".
Vidadi ORDAHALLI
