Mətləb Salahov: "Həm Ermənistandakı revanşistlərin "belini qırmaq", həm də Azərbaycanla sülh sazişi imzalamaq üçün Nikol Paşinyan Konstitusiya dəyişikliyində israrlıdır"
Ermənistanın baş naziri Nikol Paşinyanın Ermənistanın Müstəqillik Bəyannaməsinin qəbul edilməsinin 34-cü ildönümü münasibətilə dərc olunmuş təbrik mətni erməni cəmiyyətində qızğın müzakirələrə səbəb olub. N.Paşinyan hökümətindən narazı qüvvələr bu müraciəti eninə-boyuna "müzakirə" edərək, erməni ictimaiyyətini hazırkı hökümətə qarşı yönəltmək istəyirlər. Xüsusilə baş nazirin Ermənistan konstitusiyasında ciddi dəyişikliyə ehtiyac olması barədə səsləndirdiyi fikirlər və bu yöndə apardığı siyasət radikal erməni klanları tərəfindən qəzəblə qarşılanır. Bəs ermənistandakı revanşistləri qəzəbləndirən məqam hansıdır? Onları narahat edən məqam, ilk növbədə N. Paşinyanın 1990-cı il avqustun 23-də qəbul edilmiş Bəyannamənin 5-ci maddəsinə əsasən silahlı qüvvələr, daxili qoşunlar, dövlət və ictimai təhlükəsizlik orqanları o vaxtkı Ermənistan SSR Ali Sovetinə tabe olması barədə dedikləri olub. Halbuki Ermənistanın hazırkı Konstitusiyasına görə onlar əvvəlcə ölkə prezidentinə, 2018-ci ilin aprelindən sonra isə hökumətə tabe olublar. Bir məsələni xatırladaq ki, hələ fevralın 1-də N.Paşinyan Ermənistan "İctimai Televiziyası"na müsahibəsində əsas qanunun yarıtmazlığını bir daha bəyan edib. O bildirib ki, Ermənistanın Müstəqillik Bəyannaməsi Azərbaycanla sülhə maneədir. SİTAT: "Dövlət siyasəti Müstəqillik Bəyannaməsinə, Qarabağın Ermənistana birləşdirilməsinə əsaslanırsa, müharibə olacaq və heç vaxt sülh yaranmayacaq". Jurnalist – ekspert Mətləb Salahov Bakı-xəbər-ə açıqlamasında bildirdi ki, erməni cəmiyyəti üçün ən qızğın müzakirə predmeti məhz konstitusiya dəyişikliyi məsələsidir: "Əlbəttdə ermənilərin özləri də hamıdan əla anlayır ki, Ermənistanın hazırkı konstitusiyasındakı bir sıra maddələr birbaşa Azərbaycanla sülh sazişi imzalamaq üşün ən böyük maneədir. Çünki bu sənəddə 30 ildən çox Ermənistanın işğalı altında saxlanılan, yalnız 44 günlük zəfər müharibəsindən sonra azad edilmiş ərazilərimiz barədə sərsəm "bəyannamə" yer alır. Hazırda iqtisadi və sosial böhranın dibinə yuvarlanmış, demoqrafik çöküntü yaşayan bir ölkə üçün onun konstitusiyasında yer alan işğalçılıq müddəaları qonşu ölkələrlə münasibətlər yaratmaqda ən böyük problemdir. Dünya siyasəti artıq elə bir mərhələdədir ki, dövlətlərarası münasibətlərdə ən xırda detal belə gözdən qaçmır. N.Paşinyan anlayır ki, Ermənistanı sosial və qitisadi zibillikdən xilas etmək üçün qonşularla iqtisadi əlaqələr olduqca önəmlidir. Xüsusilə regionun iqtisadi lokomotivi sayılan Azərbaycanla iqtisadi münasibətlər Ermənistan üçün hava və su qədər önəmlidir. Revanşistlər gözəl başa düşürlər ki, Azərbaycanla iqtisadi fəallıq Ermənistandakı sosial durumu yaxşılaşdıracaq, revanşist düşüncə aradan qalxacaq və bununla da N.Paşinyanın ictimai rəydəki təsiri güclənəcək. Bu fakt onları ən çox qorxudan amildir. Bir başqa səbəb də odur ki, Konstitusiya dəyişikliyinə nail olmaqla N.Paşinyan Ermənistandakı revanşist ideologiyaya qarşı başlatdığı işi sona çatdırmaq üçün böyük imkan qazanır. Həm hüquqi həm də siyasi mənada. Düşünürəm ki, hazırkı konstitusiyaya dəyişiklik təşəbbüsləri revanşistlərin cığır-bağırlarına rəğmən erməni cəmiyyətində getdikcə ciddi siyasi zərurət kimi qarşılanır."
Namiq Quliyev
