Beynəlxalq təşkilatlar Azərbaycanda korrupsiyaya qarşı mübarizə sahəsində görülmüş işləri yüksək qiymətləndirir.
Trend-in məlumatına görə, 2015-ci ilin birinci rübünün yekunlarına həsr olunmuş mətbuat konfransında Baş prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev bildirib ki, Avropa Yenidənqurma və İnkişaf Bankı ölkəmizdə korrupsiyaya qarşı mübarizə sahəsində mühüm uğurlar əldə edildiyini, Azərbaycan Hökumətinin korrupsiyaya qarşı yönəlmiş addımlarını, o cümlədən yeni qanunvericiliyin qəbul olunmasını və Baş prokuror yanında Korrupsiyaya qarşı Mübarizə Baş İdarəsinin fəaliyyətini yüksək qiymətləndirib.
Qeyd olunan məlumat 09.04.2015-ci il tarixdə Avropa Yenidənqurma və İnkişaf Bankının rəsmi saytında (www.ebrd.com ) yerləşdirilib.
K.Əliyev həmçinin qeyd edib ki, İqtisadi Əməkdaşlıq və İnkişaf Təşkilatı (OECD) Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsini uğurlu model kimi dəyərləndirərək digər ölkələr üçün nümunə olduğunu bildirib.
Bundan başqa, İqtisadi Əməkdaşlıq və İnkişaf Təşkilatı (OECD) tərəfindən Azərbaycan prendi olan ASAN xidmət mərkəzlərinin fəaliyyəti ən uğurlu qabaqlayıcı tədbir kimi qiymətləndirilib.
Azərbaycan Respublikası Avropa Şurasının Korrupsiya Əleyhinə Dövlətlər Qrupunun (GRECO) 4 dəyərləndirmə raundunu uğurla keçən ölkələrdən biridir. Hər bir dəyərləndirmə mərhələsində ölkəmiz üzrə uyğunluq hesabatları qəbul edilib.
Azərbaycan Respublikası Birləşmiş Millətlər Təşkilatının Korrupsiya əleyhinə konvensiyası (UNCAC) üzrə müsbət dəyərləndirmədən keçən ilk ölkələrdən biridir.
Beynəlxalq Prokurorlar Assosiasiyası (IAP) və digər ixtisaslaşmış qurumların prokurorlar üçün antikorrupsiya alt domeninin yaradılması və Böyük Britaniya Krallığı Prokurorluğu Xidməti və Braziliyanın Baş Prokurorluğu ilə birgə aparılması beynəlxalq təşkilatlar tərəfindən böyük etimad göstərilərək Baş prokuror yanında Korrupsiyaya qarşı Mübarizə Baş İdarəsi həvalə edilib.
