«AST Telman» tam sıradan çıx(arıl)ır

Tarix: 30.03.2015 / 03:55
Bölmə: Gündəm

Son günlərdə xüsusi diqqət cəlb edən olaylardan biri də azərbaycanlı oliqarx Telman İsmayılov ətrafında baş verən hadisələrdir. Hazırda baş verənlər bu qənaətə gəlməyə əsas verir ki, Telman İsmlayılovun biznesi heç də yolunda getmir və bu şəxsin müflislik həddinə yaxınlaşması hazırda Rusiya və Türkiyə mediasında müxtəlif rakurslardan işıqlandırılır. Təbii ki, bu fonda Türkiyənin Antalya bölgəsində yerləşən və dünyanın ən dəbdəbəli otellərindən olan «Mardan Palace» otelinin satışa çıxarılması ilə də bağlı fərqli fikirlər səsləndirilir.

Yeri gəlmişkən qeyd edək ki, Türkiyə mediasının yazdığına görə, Antalya bələdiyyəsi otelin satışına dair birinci tenderi iyunun 3-də, ikincini isə iyunun 30-da keçirəcək. Tenderin hərrac yolu ilə keçiriləcəyi bildirilir. Təkliflər elektron qaydada da verilə biləcək. Birinci hərracda alıcı tapılmasa, elektron qayda ilə ilk hərracdan beş gün keçəndən ikinci hərraca 10 gün qalana qədər təkliflər qəbul ediləcək. Otelə alıcı tapılarsa, onun dəyəri hərracdan sonrakı 10 gün ərzində nağd olaraq Antalya bələdiyyəsinin hesabına ödənilməlidir. Xatırladaq ki, otel Antalya bələdiyyəsinə olan vergi və torpaq icarəsi borcuna görə müsadirə edilib və satışa çıxarılıb. 2009-cu ildə böyük dəbdəbə ilə istifadəyə verilən «Mardan Palace»ın ərazisi 94 min kvadratmetrə yaxındır, oteldə 365 ədəd ikinəfərlik otaq, 43 ədəd dördnəfərlik suit otaq, 5 ədəd dördnəfərlik villa və 12 nəfərlik apartament yerləşir. Oteldə bütün lüks xidmətlər var.

Telman İsmayılov bu oteli həyatının ən önəmli layihəsi kimi inşa etmişdi və ona atasının adını vermişdi. Lakin Moskvadakı «Çerkizovsk» bazarının bağlanmasından və nəticədə ən böyük nağd gəlir mənbəyini itirməsindən sonra T.İsmayılovun müflisləşmə dövrü başlayıb. Onun Rusiyada çoxlu iş adamına və banklara böyük məbləğlərdə kredit borcu var. Elə bu şəxs Türkiyə banklarına da borcludur. 1,4 milyard dollara inşa edilən «Mardan Palace»ın borca görə satışa çıxarılması xəbərlərinə «AST» şirkətlər qrupunun təmsilçisi Natiq Abbasov və icracı direktor Çetin Pehlivan da münasibət bildirib. N.Abbasov fərqli sahələrdə fəaliyyət göstərən şirkətlər qrupunun turizm sahəsindəki ilk layihəsi olan «Mardan Palace» otelin həm də onun qürur qaynağı olduğunu deyib: «Bank rəsmiləri ilə hüquqşünaslarımız arasında aparılan danışıqlar son mərhələyə çatıb. Bu prosesin ən geci gələn həftəyə qədər yekunlaşmasını gözləyirik. Prosesinin «Mardan Palace»ın qonaqlara göstərdiyi VİP xidmətlə heç bir əlaqəsi yoxdur». «Mardan Palace» otelinin icraçı direktoru Çetin Pehlivan isə fəaliyyətə başladıqları 2009-cu ildən bu yana bu cür xəbərlərin gündəmə gəldiyini deyib. O bildirib ki, bu cür xəbərlər xidmətin keyfiyyətinə qəti təsir etmir: «Əksinə, hər il artan tələblərlə, ilə 144 fərqli ölkədən minlərlə qonağa xidmət edirik».

Əslində, «AST Telman»ın «Mardan Palace» hotelinə görə borclu olması yeni xəbər deyil. Hələ bir neçə ay əvvəl məlum olmuşdu ki, T.İsmayılov hotelin tikintisi zamanı Türkiyənin məşhur «Halk Bank»ından 62,5 milyon dollar kredit alaraq geri qaytarmayıb. T.İsmayılov hotelin inşası üçün başqa türk banklarından da kredit alıb. Lakin bu kreditlərin məbləği məlum deyil.

Kreditin geri qaytarılmasında problem yarandıqdan sonra «Halk Bank» oteli araşdırmağa başlamışdı. Məlum olmuşdu ki, hotelin yerləşdiyi ərazinin bir hissəsi, yəni 914 kvadratmetrlik ərazi dövlətə məxsus olub və T.İsmayılov bu ərazini sadəcə olaraq zəbt edib. Ərazi dövlətə məxsus olduğu üçün bank ödənilməyən kreditə görə həmin ərazini ala bilməz. Araşdırma zamanı o da məlum olub ki, «Mardan Palace»in yerləşdiyi ərazinin bəzi hissələrinin sənədləri də qaydasında deyil. Belə ki, otelin yerləşdiyi ərazinin 3 hektara yaxını Antalyanın Aksu bələdiyyəsinin mülkiyyətidir. Həmçinin otelin inşasına dair icazə sənədinin də yoxa çıxdığı deyilirdi. T.İsmayılovun Rusiyada da biznesi heç də yaxşı getmir. Qeyd edək ki, 2009-cu ildə «Çerkizovsk» bazarının Putinin göstərişilə bağlanmasından sonra T.İsmayılov Rusiyanı tərk edib və faktiki olaraq Moskvadakı biznes fəaliyyətini dayandırıb. «AST Telman» Rusiyadakı biznes aktivlərini oğulları Ələkbər və Sərxanın, habelə qohumu Zaur Mərdanovun adına rəsmiləşdirib. T.İsmayılovun əsas nağd gəlirləri «Çerkizovsk» bazarından daxil olduğu üçün bazarın bağlanmasından sonra onun gəlirləri kəskin azalıb. Bu yaxınlarda məlum olub ki, T.İsmayılov «Bank Moskva»ya olan 107 milyon dollar kredit borcunu ödəmək üçün Moskvada ona məxsus olan «Praqa» restoranını və «Tropikano»nu satmağa hazırlaşır.

Ötən ilin iyul ayında isə Kiyevin keçmiş meri Leonid Çernovetskinin kürəkəni Sergey Yançukovun «Manqazeya» şirkəti T.İsmayılov barəsində Kipr məhkəməsinə şikayət edib. İddiada T.İsmayılovun şirkətə olan 100 milyon dollar borcunun geri qaytarılması tələb olunur. Kredit müddətinin 2013-cü ildə bitməsinə baxmayaraq, T.İsmayılov heç bir geri ödəniş etməyib. Məhz bu səbəbdən məhkəmə tərəfindən «Mardan Palace» otelinin və Moskvadakı bəzi binalarının üzərindəki bank hesabları dondurulmuşdu. Müvəqqəti dondurulan hesablar və həbs qoyulan əmlaklar sırasında T.İsmayılovun Fransada bir malikanəsinin, 90 otaqlı ticarət mərkəzinin də olduğu bildirilirdi. Bütün bunlar T.İsmayılovun artıq gündəmdən tam çıxmaqda olduğunu göstərir.