İtalyanın Milan şəhərində Xocalı soyqırımının 23-cü ildönümü münasibətilə keçirilmiş sərgi və "Xocalıdakı qırmızı mələk” tamaşasının premyerası ilə bağlı bu şəhərdəki erməni diasporu təxribat törədib.
"APA-Holdinq"in Milana ezam olunmuş xüsusi müxbirinin məlumatına görə, ermənilərin tamaşanın premyerası öncəsi təşkil etmək istədikləri təxribat baş tutmayıb. Onlar tamaşanın və sərginin keçirilməsinə mane ola bilməyiblər.
Lakin tamaşadan sonra Milanın mərkəzi meydanında və əhalinin gur olduğu yerlərdə ermənilər təxribat xarakterli vərəqələr yaymağa başlayıblar.
Bu vərəqlərdə Azərbaycanı "tarixi saxtalaşdırmaq”da ittiham edən ermənilər Xocalı soyqırımı və Dağlıq Qarabağla bağlı tarixi faktları saxtalaşdırıblar. Onlar bir qədər də uzağa gedərək, "Cəhənnəmdə böyük çığırtı” kitabında danışmış girov şahidlərin və "Xocalıdakı qırmızı mələk” tamaşasındakı personajların da "saxta” olduğunu iddia ediblər.
