"Biz Azərbaycanda rəqəmsal yayıma keçmək üçün prosesin başa çatmasını istəyirik. Bu məsələ ilə də bağlı heç bir narahatlığımız yoxdur. Çünki artıq Azərbaycan ərazisi rəqəmsal yayımla tam əhatə olunub. Sadəcə, bizim sosial cəhətdən imkansız insanlarımız var ki, onların rəqəmsal yayımla təmin olunması üçün dekoderlərə, tunerlərə, resiverlərə ehtiyacı var".
Baki-xeber.com xəbər verir ki, bu barədə Milli Televiziya və Radio Şurasının sədri Nuşirəvan Məhərrəmli APA-ya müsahibəsində deyib.
Sədr daha sonra bildirib: "Biz bu məsələ ilə bağlı cənab Prezidentə müraciət etdik ki, sosial cəhətdən problemli insanlara müəyyən qədər kömək göstərilsin. Bildiyimə görə, bu məsələ həll olunmaq ərəfəsindədir. Nazirlər Kabineti bundan irəli gələn məsələləri həll etmək üçün müəyyən işlər görür. Konkret nə vaxt olacaq, bu haqda dəqiq bir söz deyə bilmərəm. Amma biz istəyirik ki, 2015-ci ilin yayında bu məsələlər bitsin. Bilirsiniz, əsas məsələ rəqəmsal yayımın ölkə boyu əhatə olunmasıdır. Biz də bu məsələni artıq həll etmişik. O ki qaldı analoq yayımın dayandırılmasına, biz analoq yayımı istənilən an, bu gün və yaxud bir ildən sonra dayandıra bilərik. Bu bizim üçün problem deyil. Bu saat analoq yayımın dayandırılması Rabitə və Yüksək Texnologiyalar Nazirliyi üçün daha çox lazımdır. Çünki bu yayım onlar tərəfindən aparılır və maliyyə cəhətdən də onlar hər gün ziyana düşür. Biz hər şeydən qabaq əhalini nəzərə alırıq. Birinci problem sosial cəhətdən imkansız insanlardır. Onların da sayı təqribən 130 minə yaxındır".
