Azərbaycanın işğaldan azad edilmiş rayonları ilə bağlı marağını nümayiş etdirən xarici dövlətlərin niyyəti hələlik daha çox o istiqamətdədir ki, investisiya yatırsınlar, yəni pul qoyub pul götürsünlər. Burada söhbət bizə qardaş Türkiyədən getmir. İnvestisiyaların əleyhinə olmadığımızı dövlət başçısı özü də dilə gətirib və Azərbaycana dost və dost olmaq istəyən ölkələrə "qapı ilk növbədə sizlərin üzünə açıqdı" mesajını verib...
Bu sözləri özünün Facebook səhifəsində “Bakı Xəbər” media qrupunun rəhbəri, politoloq Aydın Quliyev yazıb. Politoloq həmin statusunda təəssüflə bildirir ki, Ermənistan ordusunun viran qoyduğu ərazilərimizin bərpasında və öz yurduna dönmək ərafəsində olan köçkünlərimizə əməli bir dəstək (dilənçi payı, ya ərzaq yardımı yox) verilməsində təmənnasız iştirak etmək istəyən bir ölkə görmədik: “İnvestisiya yatırmaq sadəcə bazar davranışıdı və onun humanizmlə, qlobal rifahlara təmənnasız dəstək fəaliyyətləri ilə əlaqəsi yoxdu. Bu jestləri ilk növbədə Avroittifaq ölkələri (Fransa, Yunanıstan, Benilüks ölkələri xaric) etməli idilər. Təəssüf...”
Politoloq daha sonra qeyd edir ki, Avropa dövlətləri və ABŞ-ın 1-ci və 2-ci Dünya müharibələrində imperialist və faşist Almaniyasının viran qoyduğu Avropanın bərpasında hansı təşəbbüsləri göstərdiklərini bilirik:
“1-ci müharibədən sonrakı Daues planı, Yunq planı, 2-cidən sonrakı məşhur Marşal planından xəbərimiz var. Ancaq ölkəmizlə bağlı belə PLANLARA hələ rast gəlmirik”.
Politoloq deyir ki, Azərbaycanın dağılmış torpaqlarının bərpasına xaricdən laqeydliyin səbəbləri çox ola bilər - alman faşizmi ilə erməni faşizminin oxşar təbiətə malik olduğunu görməmək, ya görmək istəməmək, ikili standartlar, Azərbaycan hakimiyyətinə bədxah münasibət, bir də maraqların dəyərləri üstələməsi...”
Aydın Quliyev sonda bildirir ki, Azərbaycanın öz ərazilərini təkbaşına bərpa etməyə yəqin gücü yetəcək. “Ancaq əlimizə o dövlətlər üçün "pul qoyub pul götürməkdən" başqa hərəkət motivi olmadığına bir daha əmin olmaq şansı düşür...”- deyə politoloq qeyd edir.
