İslahatların intellektual mərhələsi: korrupsiyasız cəmiyyət quruculuğu
Son illər Azərbaycan Respublikasının Prezidenti tərəfindən həyata keçirilən dərin iqtisadi-siyasi və demokratik islahatlar kursu ölkənin bütün sahələrini - sosial, iqtisadi, siyasi, ictimai, mədəni həyatını əhatə edir. Prezident İlham Əliyev cənabları özünün növbəti yeni islahatları ilə şəffaf və ədalətli idarəçilik sisteminin daha da gücləndirilməsini, vətəndaş məmnunluğunun təmin edilməsini başlıca vəzifələrdən biri kimi qarşıya qoyur ki, bu amil də geniş ictimaiyyətimizin dərin rəğbətini qazanmış olur.
Bütün dünyada olduğu kimi, bir sıra məmurların bürokratik maraqlarından irəli gələn, korrupsiya, rüşvətxorluq, bürokratiya, süründürməçilik və digər neqativ halların Azərbaycanda aradan qaldırılması əsas hədəflərdən biri kimi götürülən islahatlara qarşı cəmiyyətin mənfi ünsürlərinin dezinformasiyası göz qabağındadır. O kəslərin dövlətçiliyimizə qarşı çıxış etməsi, sabotaj və qara əməlləri vətəndaş cəmiyyətinin aktivistlərinin qəti etirazı və müqaviməti ilə rastlaşır.
Dövlət başçımızın siyasi-demokratik iradəsindən qaynaqlanan Azərbaycanın korrupsiyaya qarşı mübarizə təcrübəsi sistemli, hərtərəfli və innovativ xarakter daşıyır, nəinki respublikamızda, həm də beynəlxalq aləmdə ciddi araşdırılır, ardıcıl izlənilir.
Ümummilli Lider Heydər Əliyevin vaxtında başlamış, daha sonra Prezident İlham Əliyev tərəfindən dərinləşdirilərək ardıcıl həyata keçirilən islahatlar - korrupsiya ilə mübarizə sahəsində müvafiq proqramların, qanunvericilik aktlarının qəbul edilməsi, iriranqlı məmurların işdən azad edilməsi, ictimai qınağa məruz qalan icra başçılarının həbsi yuxarıda qeyd edilənlərin sadəcə sözdə deyil, həm də əməli hərəkətlə həyata keçirildiyinə əyani sübutdur.
Cəmiyyətşünasların, politoloqların və sosialoqların da ciddi izlədikləri proseslərdə, Prezident İlham Əliyevin siyasi iradəsinə uyğun olaraq, bu sahədə yeni strateji baxışlar və vəzifələr müəyyən edilib, korrupsiyaya qarşı mübarizə keyfiyyətcə yeni müstəviyə keçib, beynəlxalq təcrübələr ümumiləşdirilib, nüfuzlu qlobal təşkilatların tövsiyyələri nəzərə alınıb. Dövlət orqanlarının fəaliyyətində şəffaflığın daha da artırılması üçün ictimai nəzarət mexanizmlərinin tətbiqi genişləndirilir, ictimai şuraların fəaliyyətinin səmərəliliyi təmin olunması istiqamətində tədbirlər görülür.
Bu yaxınlarda isə ASAN xidmətin nəzdində cəmiyyətin geniş təbəqələrinin də ictimai nəzarətdə fəallığını artıracaq İnternetüstü virtual ictimai məlumatlandırma mexanizmi yaradılıb. Ölkə başçısının tapşırığı əsasında, ictimai nəzarət mexanizmlərinin formalaşdırılması və bu sahədə vətəndaş cəmiyyəti institutlarının fəallığının təşviq edilməsi üçün Prezidentin köməkçisi Hikmət Hacıyevin ölkədə fəaliyyət göstərən QHT liderləri ilə ardıcıl virtual konfransları, digər iriranqlı məmurun – Ədalət Vəliyevin respublikada fəaliyyət göstərən siyasi partiya rəhbərləri ilə fərdi qaydada ikitərəfli görüşlərini islahatların daha da genişlənməsi baxımından əhəmiyyətini xüsusi vurğulamaq olar.
Azərbaycan Prezidentinin korrupsiya ilə mübarizə sahəsində bəyan etdiyi prinsiplər, qarşıya qoyduğu yeni vəzifələr və əldə olunmuş nəticələri ictimai müzakirəyə çıxarılması bir daha onu göstərir ki, vətəndaşlarımız da islahatların qızğın tərəfdarlarıdır. İstər ənənəvi mətbuatda, istər elektron KİV-də - TV və radioda, istərsə də yeni mediada – İnternet saytları, sosial şəbəkələrdə aparılan diskussiyalar bir daha islahatların dekorativ xarakter daşımadığını, əksinə səmərəli və məhsuldar nəticələri ilə inkişafımıza təkan verdiyini sübut edir.
Ciddi qanun pozuntularına yol vermiş vəzifəli şəxslərin məsuliyyətə cəlb olunması istiqamətində aparılan işlər geniş əhali kütləsi tərəfindən tam dəstəklənir. Dünyanın hər yerinə səpələnmiş 55 milyonluq diaspor nümayəndələrimiz də islahatların dərinləşməsindən məmnunluq duyduqlarını, Azərbaycanın inkişaf etmiş sivil ölkələr sırasına qoşularaq qlobal, planetar xarakterli antikorrupsiya islahatlarına qatıldığını, bu vacib proseslərdə fəallığını xüsusi dəyərləndirirlər.
Bu günlərdə üzvlərinin əksəriyyəti dəyişdirilmiş Azərbaycan Respublikasının Korrupsiyaya qarşı mübarizə üzrə Komissiyasının yeni tərkibdə ilk iclasının keçirilməsi genişləndirilən islahatların daha da dərinləşməsini, ciddi nəticələr əldə etmək üçün sürətləndirildiyindən xəbər verir. Xəbər verildiyi kimi, korrupsiyaya qarşı mübarizənin ölkədə gerçəkləşdirilən islahatlar kursuna tam cavab verməsi üçün yeni Milli Fəaliyyət Planının işlənməsinə başlanılıb. Komissiya yanında ekspertlərdən və ictimai aktivistlərdən ibarət işçi qruplarının da yaradılması maraqlı addımdır. Belə ki, korrupsiyaya qarşı mübarizə sahəsində beynəlxalq əməkdaşlığın gücləndirilməsi vacib addım sayılsa da, respublikanın geniş ictimaiyyətinin nümayəndələrinin, xüsusən vətəndaş cəmiyyəti təsisatlarının fəal liderlərinin, QHT rəhbərlərinin bu dövləti proseslərə cəlb olunması islahatların uğurlu nəticələrindən xəbər verir.
Bu istiqamətdə ardıcıl qəbul olunmuş qərarların və verilən tapşırıqların korrupsiyaya qarşı mübarizənin səmərəliliyini yüksəldən addımlar kimi də qarşılamaq lazımdır. Müasir informasiya-kommunikasiya texnologiyalarından yararlanmaq, kreativ-innovativ həllərin tətbiqinin genişləndirilmək, ictimai nəzarətin təmin edilməsi məqsədilə mövcud mexanizmlərin tətbiqinin təkmilləşdirilmək, vətəndaş cəmiyyəti təsisatları ilə əməkdaşlığı sürətləndirmək, korrupsiyaya qarşı mübarizə sahəsində ixtisaslaşan qeyri-hökumət təşkilatlarına dəstək verilməsi və ictimai əhəmiyyətli qərarların qəbulunda onların rolunun artırmaq, maarifləndirmə tədbirlərinin davam etdirmək korrupsiyaya qarşı mübarizədə vacib və əhəmiyyətli amillər sayılmalıdır.
Azərbaycanın korrupsiyaya qarşı mübarizə tədbirləri ardıcıl, sistemli, hərtərəfli xarakter daşıdığını nəzərə alaraq bir qrup vətəndaş cəmiyyəti təsisatları Vətəndaş Cəmiyyəti Alyansı adlı platformada birləşərək dövlətə, ölkənin siyasi rəhbərliyinə ictimai-sosial dəstək verdiyini bəyan edir.
Bir ay müddətində 50 vətəndaş cəmiyyəti təsisası – QHT, yazılı və elektron KİV, İnternet saytı, yeni media qurumlarını sıralarında birləşdirməyi bacaran Vətəndaş Cəmiyyəti Alyansının Təşkilat Komitəsi olaraq yeni islahatların müəlliflərini - Prezident İlham Əliyev cənablarının, onların həyata keçirilməsində ölkə başçısı ilə çiyin-çiyinə dayanan I Vitse-Prezident Mehriban xanım Əliyevanın korrupsiyaya qarşı mübarizə keyfiyyətcə yeni müstəvidəki islahatlarının tərəfdarları kimi geniş ictimaiyyətimizə üzümüzü tutub bildiririk: ölkəmizdə korrupsiyaya və rüşvətxorluğa qarşı aparılan ciddi mübarizəyə dəstək verək, islahatların daha da dərinləşməsi üçün səyimizi əsirgəməyək.
Aydın Xan Əbilov
Vətəndaş Cəmiyyəti Alyansının TK rəhbəri,
Yeni Yazarlar və Sənətçilər İctimai Birliyinin sədri,
yazıçı-kulturoloq
