Başlığa çıxardığım fikri ona görə xüsusi vurğulayıram ki, ölkədə tam bunun əksini düşünən və işlər görmək istiyənlər də var. Bu məsələni daha da böyük hay-küy dalğasının içinə qataraq beynəlxalq təşkilatların gündəm məsələsinə çevirməklə eyni vaxtda iki hədəfi vurmaq istəyirlər. Həm Tofiq Yaqublunun azadlığa çıxmasını beynəlxalq təşkilatların səmərəli fəaliyyətilə izah edir, həm də bu işi bacarmış siyasi təşkilat olaraq müxalifətçilik reytinqinin artırılması qayğısına qalırlar. Nəticədə nə onu, nə də bunu əldə edə bilir, üstəlik bu istiqamətdə nə qədər çox iş görməyə çalışırlarsa, Tofiq Yaqublunun işini bir o qədər dərinə və çıxılmaza salırlar.
Təcrübə göstərir ki, Azərbaycanda siyasi məhbus adlandırılaraq şəxsi işi Avropanın ən müxtəlif təşkilatlarının dəhliz və otaqlarında bir nömrəli müzakirə mövzusu edilmiş şəxslər sonda azadlığa çıxmağa nail olsalar da, buna məhbus illərinin say etibarilə bir neçə dəfə uzanması bahasına nail ola biliblər. Başqa sözlə desək, hər kiminsə azadlığının qısa yolu mövcud olsa da, onun işinin lüzumsuz şəkildə bir Avropa təşkilatından digərinə dartılıb aparılması məhbəs həyatının daha da uzanmasına gətirib.
Bu gün Tofiq Yaqublunun həbs və azadlııq məsələsi ilə bağlı iki müstəvidə iş getdiyini görmək mümkündür. Birinci müstəvi, Prezidentə və Birinci vitse-prezidentə müraciətlər də daxil olmaqla, daxili və ya milli hüquq çərçivəsində sivil addımların atıldığı prosesdir. Jurnalistlər, hüquq müdafiəçiləri, tanınmış ziyalılar, şair və yazıçılar, deputatlar, partiya xadimləri müraciətlər edərək apelyasiya qaydasında Tofiq bəyin öz azadlığına qovuşmasına qədər yeni və həlledici hüquqi mərhələnin həyata keçirilməsini xahiş edirlər. Bu yolla gedənlərin gücü ondadır ki, onlar hər hansı bir Avropa komissarının gəlib Tofiq Yaqublunun məhbəs qapısını sehrli çubuqla açacağına yox, bu qapının Azərbaycanın öz milli hüquq sisteminin AÇARI ilə açılacağına inanırlar. İkinci müstəvi isə, artıq deyildiyi kimi, məsələni beynəlxalq təşkilatlara daşıyaraq, guya "Tofiqə azadlıq, bizə isə daha çox siyasi reytinq" taktikası ilə düşünən və hərəkət edənlərin müstəvisidir.
Bu sətirlərin müəllifi olaraq, mən də özümü birinci müstəvidə görürəm və Tofiq Yaqublunun azadlığına gedən ən qısa yolun açarının məhz ölkənin öz milli hüquq sisteminin içində olduğuna şübhə etmirəm. Hətta əminəm ki, Tofiq bəy indi olduğu yerə təkbaşına getmiş olmasa da, oradan təkbaşına qısa müddətdə çıxmaq şansına daha çox malikdir. Daha konkret desəm, indi Tofiq bəyin özündən çox şey asılıdır və onun azadlıq məsələsinin ətrafında "izafi hay-küyçü müdafiəçiliyin" daha çox ziyana işlədiyinin fərqinə varmalıdır. İllər öncə Azərbaycanda Tofiq bəy kimi taleyi mürəkkəb vəziyyətlə qarşılaşmış başqa bir xətrinə dəyər verdiyim tanınmış məhbus da var idi. Onun barəsində də eynən bunun kimi Avropa təşkilatlarına qalaq-qalaq sənədlər göndərilmişdi, siyasətçilər və hüquq müdafiəçiləri bu yöndə inanılmaz bir bəhsə-bəhslə işə girişmişdilər. Proses aylar və illərlə uzanır, sonunu görmək getdikcə çətinləşirdi. Günlərin birində onun sözünü eşitdiyi bir yaxın adamına qısa fikrimi dedim: "Onun azadlığının açarı ölkənin içindədir və özünüzü beynəlxalq təşkilatların qapılarında, onu isə içəridə çürütməyin"....Sonrası isə......effekt dərhal göründü....
Tofiq Yaqublu azadlığına aparan ən qısa yolu ilk əvvəl özü görməlidir. Əminəm ki, bunu bacarsa, tezliklə azadlığına qovuşacaq. Əslində məhkəmə hökmü olsa da, Tofiq bəyi sona qədər həbsdə saxlamağın hakimiyyətin maraqlarına qəti uyğun olmadığına əminəm. İndi onun həbs müddətinin mümkün qədər uzanması yalnız və yalnız mübahisəli həbsləri özü üçün reytinq mənbəyinə və hakimiyyətlə köhnə haqq-hesabların çürüdülməsi üsuluna çevirmək istəyənlərə lazımdır. İnanmıram ki, məhbəsdə daha çox qalmaq Tofiq Yaqublunun özünə hətta zərrə qədər gərəkli olsun.
Sonda onu əlavə edim ki, Azərbaycana intellektual və gücünü yalnız cəmiyyətimizin özündən alan demokratik müxalifət gərəkdir, bu yolun alternativi yoxdur. Lakin müxalifət, hətta sivil radikal müxalifət bir şeydir, leksikonu təkcə söyüş və təhqirlərdən ibarət şəxslərin özlərini müxalifət kimi təqdim etməsi isə tam başqa şeydir...
