Bu gün ulu öndər Heydər Əliyevin Naxçıvan Ali Məclisinin Sədri seçildiyi gündür. “Azərxalça” Açıq Səhmdar Cəmiyyətinin mətbuat katibi, “Şərq qapısı” qəzetinin keçmiş baş redaktoru, tanınmış jurnalist Tural Səfərov öz facebook səhifəsində həmin tarixi dövrlə bağlı maraqlı paylaşım edib. Tural Səfərov ilk dəfə Heydər Əliyevin Ali Məclisin Sədri vəzifəsinə namizədliyini irəli sürən keçmiş deputatın adını açıqlayıb və onun bu gün nə işlə məşğul olduğunu yazıb. Həmin statusu oxuculara təqdim edirik:
“3 sentyabr müstəqil, müasir Azərbaycan dövlətinin tarixində əlamətdar günlərdən biridir. Ulu öndər Heydər Əliyevin 1991-ci il sentyabrın 3-də Naxçıvan Muxtar Respublikası Ali Məclisinin Sədri seçilməsi Azərbaycan xalqının taleyində böyük siyasi əhəmiyyətə malik olan tarixi hadisədir. Naxçıvandan başlanan xilaskarlıq yolu Azərbaycanın şanlı tarixində yeni səhifə açmaqla müstəqil ölkəmizin işıqlı gələcəyini təmin etmişdir.
Ulu öndər Heydər Əliyevin Naxçıvan Muxtar Respublikası Ali Məclisinin Sədri seçilməsindən sonra ölkəmizdə milli dirçəliş prosesi sürətlənmiş, həmin gündən başlayaraq elmi əsaslara söykənən dövlət quruculuğu prosesinə start verilmişdir. Bu mənada, 3 sentyabr, əslində, həm də siyasi və iqtisadi cəhətdən etibarlı dayaqlar üzərində qurulmuş müstəqil Azərbaycan dövlətinin təməllərinin atıldığı gün kimi tarixdə öz yerini tutmuşdur.
Ümummilli lider dövlətçiliyimizin gələcəyi baxımından əlamətdar olan həmin gün barədə danışarkən deyirdi: “Bu zamanın, bu dəqiqələrin, bu saatın hökmünü nəzərə almaya bilməzdim... Xalqın bu əhval-ruhiyyəsini, tələblərini, sonra sessiyadakı çıxışları nəzərə alaraq bütün məsələləri götür-qoy etdim. Yəqin etdim ki, mən öz prinsiplərimə sadiq qalaraq, eyni zamanda indi Azərbaycanın, Naxçıvanın belə vəziyyətində, çətin günündə, dövründə mənim üzərimə nəinki deputatların, binanın qarşısında, ətrafına toplaşan naxçıvanlıların qoyduqları vəzifənin ifasından geri çəkilsəm, bu, xalqın ağır günündə qaçmaq deməkdir... Mən öz taleyimi xalqa tapşırmışam və xalqın iradəsini, yəqin ki, indi bu müddətdə, bu çətin dövrdə yerinə yetirməliyəm”.
Bütün bunlar Azərbaycan xalqına məlum olan hadisələrdir. Mən bu gün hər kəsin bilmədiyi, mediamızın heç vaxt işıqlandırmadığı bir məsələ – Ulu Öndərin Naxçıvan Ali Məclisinin Sədri vəzifəsinə namizədliyini irəli sürən keçmiş deputatın kimliyi barədə oxuculara məlumat vermək istəyirəm. Bu, həmin dövrdə Naxçıvan Ali Məclisinin deputatı olmuş Əziz Orucovdur.
Ali Məclisin həmin sessiyası barədə çoxları məlumatlıdır. Naxçıvan əhalisinin təkidli tələbinə baxmayaraq, Heydər Əliyev Sədr seçilməyə razılıq vermirdi. Məhz bu taleyüklü məqamda Əziz Orucov nəinki Naxçıvanı, bütövlükdə, Azərbaycanı yalnız görkəmli dövlət xadimi Heydər Əliyevin xilas edə biləcəyini bildirmiş və təkidlə ulu öndərimizdən Ali Məclisin Sədri seçilməyə razılıq verməsini xahiş etmişdir. Beləliklə, keçmiş deputat Əziz Orucov dövlətçiliyimizin, müstəqilliyimizin qorunması naminə çox mühüm bir missiyanı yerinə yetirmişdir.
Əziz Orucov indi “Azərxalça” Açıq Səhmdar Cəmiyyətinin Naxçıvan regional yun və boyaq bitkilərinin tədarükü məntəqəsinin rəisi vəzifəsində çalışır. Belə bir Vətən oğluna bu şəraiti yaradanlar minnətdarıq”.
