Dekabrın 19-da Ankarada Rusiya səfiri Andrey Karlovu qətlə yetirilən şəxs - polis əməkdaşı Mert Altıntaşla bağlı yeni faktlar ortaya çıxıb. Baki-xeber.com Anadolu Agentliyinə istinadən xəbər verir ki, hazırda Ankara Respublika Prokurorluğunda Rusiyadan gələn istintaq qrupu ilə birgə araşdırmalar davam edir. Səfirin öldürülməsini 120 nəfərlik qrup araşdırır.
İndiyə qədər 11 şübhəli saxlanıb. Qatilin mobil telefonunun da araşdırıldığı istintaqda, Rusiyanın Ankara səfirliyində çalışanların Altıntaşa məlumat verib-vermədiyi də araşdırılır.
Istintaq, əldə edilən ilk məlumatlara görə, Altıntaşın hüquq-mühafizə orqanlarındakı Fetullahci terror təşkilatı (FETÖ) üzvlərinin dəstəyilə təşkilata daxil olması, onlarla birgə hərəkət etməsi ehtimalı üzərində dayanır. Qatilin hadisə günü, ya da başqa vaxtlarda dərman və ya başqa maddə istifadə edib-etmədiyi də araşdırılır.
O da məlum olub ki, Altıntaş müvəqqəti olaraq göndərildiyi Diyarbəkirdə 15 iyul çevriliş cəhdindən əvvəl 2 günlük icazə alıb. Həmin vaxt Ankaraya gəldiyi təsbit edilən Altıntaşın bu müddətdə nələr etdiyi də araşdırılır.
Qatilin hadisə günü, Yenimahalle Onkologiya Xəstəxanasından qarın ağrısı şikayətilə xəstəlik kağızı aldığı, ona kağızı verən həkimin yeznəsinin isə 15 iyul çevriliş cəhdindən sonra hüquq-mühafizə orqanlarından xaric edilən bir polis olduğu müəyyənləşib.
Altıntaş xəstəlik kağızı aldıqdan sonra evinə gedib, hadisədən iki gün əvvəl paltar alıb, 14 dekabrda telefonla yer sifariş verdiyi otelə gedib və burada iki saat qaldıqdan sonra Müasir İncəsənət Mərkəzinə gedib.
Hadisə vaxtı üzərindən 3 ehtiyat maqazin və cibindən 20-25 güllə patronu çıxan qatildə 75 patron olub.
Bundan başqa, İstanbulda FETÖ işi çərçivəsində şahid ifadəsində Altıntaşın da adının keçdiyi məlum olub. Onun dayısı, Aydında FETÖ ilə əlaqəli olduğuna görə bağlanan bir məktəbdə müdiri olub, yaxın yoldaşları da çevriliş cəhdindən sonra işlərindən çıxarılıb.
Istintaq, qatilin sağ ələ keçirilmə ehtimalı olub-olmadığını da araşdırır. Görüntülər və şahid ifadələrinə görə, qatil səfir Karlovu vurduqdan sonra hadisə yerinə ilk gələn təhlükəsizlik əməkdaşlarının "təslim ol" çağırışına atəşlə cavab verib. Sonradan hadisə yerinə gələn xüsusi təyinatlılara da atəşə açan, qatil əvvəl iki ayağından, sonra dizlərindən vurulub. Yerə yıxılan Altıntaş vurulmasına baxmayaraq, xüsusi təyinatlılara atəş açmaqda davam edib. Altıntaşın, onların "təslim ol" çağırışına, "məni sağ ələ keçirə bilməyəcəksiniz" deyə cavab verdiyi, yerə yıxılmasına baxmayaraq, atəş açmaqda davam etdiyi və əlini belinə atdığında isə bomba çıxaracağını düşünən təhlükəsizlik qüvvələri tərəfindən öldürüldüyü ehtimal edilir. Görüntülər və şahid ifadələrinə görə, qatil səfiri vurduqdan təxminən 40 dəqiqə sonra zərərsizləşdirlib.
O da qeyd edilir ki, indiyə kimi qatilin cənazəsini almaq üçün heç bir yaxını müraciət etməyib. Cənazəni yalnız onun birinci dərəcəli qohumu olan yaxınları təslim ala bilər.
TAHİR
