Rusiyanın Türkiyədəki səfiri Andrey Karlovun qətlinin məqsədi Moskva və Ankara arasındakı münasibətlərə ziyan vurmaq, iki ölkə arasında münasibətlərin normallaşmasına mane olmaqdır. Trend RİA Novostiyə istinadən bildirir ki, bunu Rusiya prezidenti Vladimir Putinin mətbuat katibi Dmitri Peskov deyib.
Açıqlamada deyilir: “Bu, iki ölkə arasında Suriyada siyası həll yolunun tapılması üçün səyləri birləşdirməyə imkan verən münasibətlərə mane olmağa çalışanlara sərf edir. Konkret olaraq kimin olduğunu təhqiqatçılar müəyyən edəcək. Bu hadisənin araşdırılması ilə bağlı hər iki tərəfdən yüksək səviyyəli mütəxəssislər işləyir. Bir qədər səbrli olaq, onlar öz işini görsün”.
“Bu dəqiqə Moskva və Ankaranın həyata keçirəcəyi yeganə məntiqə uyğun addım onların münasibətlərini dağıtmağa çalışanlara qarşı effektiv şəkildə əməkdaşlıq etməkdir”. Bunu da Putinin mətbuat katibi deyib. O, səfirin öldürülməsinin iki ölkə arasında münasibətləri məhv etməyə yönəlmiş bir təxribat olduğunu deyib.
Qeyd edək ki, Rusiyanın Türkiyədəki səfiri Andrey Karlov ötən gün Ankarada Müasir Sənət Mərkəzində rəsm sərgisinin açılışında çıxış edərkən silahlı hücuma məruz qalaraq öldürülüb.
