ABŞ prezidenti Barak Obama ABŞ prezident seçki kampaniyasına iddia olunan müdaxiləsi ilə bağlı Rusiyaya qarşı tədbirlər görməyə söz verib. "Biz tədbir görməliyik və edəcəyik", o ABŞ radiostansiyası NPR-a deyib.
Baki-xeber.com xəbər verir ki, ABŞ Rusiyanı Demokratlar partiyası və partiyanın bu il baş tutan prezident seçkilərində əsas namizədi olan Hillari Klintonun köməkçisinin elektron ünvanının haker hücumuna məruz qoymaqda ittiham edir, Kreml isə bu iddiaları qəti şəkildə təkzib edir Yeni seçilmiş prezident, Respublikaçılar partiyasından olan Donald Tramp da iddianı "gülünc" və siyasi motivli adlandırıb.
Xüsusi xidmət orqanları deyirlər ki, onlarda hücumlarının arxasında Kremllə əlaqəsi olan rus hakerlərin dayanması barədə təkzibedilməz sübutlar var. Ağ Evin mətbuat katibi isə bildirib ki, Rusiya prezidenti Vladimir Putin də kiberhücuma cəlb olunub.
Obama isə ABŞ-ın hərəkətə keçmək məcburiyyətində olduğunu deyib: " Heç şübhə yoxdur ki, hərəkətə keçəcəyik. Biz öz seçdiyimiz yerdə və zamanda tədbir görməliyik və görəcəyik. Bəziləri açıq və nəzərə çarpan bir şəkildə ictimaiyyət qarşısında olur, bəziləri isə elə olmaya bilər"
Obama, dünyadakı bütün böyük güclərin bir-birlərilə əlaqədar casusluq etdiklərini və məlumat toplamağa çalışdığını deyib: "Amma bununla, ticarət sirləri oğurlamaq, ya da çinlilərin etdiyinə şahidlik etdiyimiz kimi sənaye casusluğu kimi pis niyyətli kiber hücumlar həyata keçirmək arasında fərq var. Seçkiləri təsir etmək üçün hazırlanmış bir şəkildə fəaliyyətə keçimək fərqli bir şeydir".
Ancaq ABŞ-ın nə kimi tədbir görəcəyi hələ məlum deyil.
Mərkəzi Kəşfiyyat İdarəsi hesab edir ki, Rusiya bu addımı seçkilərin nəticələrini Donald Trampın xeyrinə dəyişmək üçün edib, lakin ictimaiyyətə heç bir fakt təqdim edilməyib. Tramp isə Demokratları seçki məğlubiyyətinə görə utancı gizlətmək üçün Rusiyanın müdaxiləsi ilə bağlı iddiaları uydurmaqda ittiham edib. O, həmçinin, Putinə heyranlıq nümayiş etdirib. Onun dövlət katibi üçün Rusiya lideri ilə sıx əməkdaşlıqla işləyən neft maqnatı Reks Tillersonu seçməsi də narahatlığına səbəb olub.
