Ukraynanın paytaxtı Kiyevdə yeni etiraz aksiyaları başlayıb. Baki-xeber.com xəbər verir ki, yüzlərlə nümayişçi Kiyevdə hökumət binaları önündə mövcud iqtisadi duruma və çörək, təbii qaz kimi zəruri mallara qiymətlərin artmasına etiraz edir.
Nümayişçilərin sayının hələlik 2 mindən çox olduğu bildirilir, onların sayının artacağı da istisna edilmir.
Kiyevin mərkəzində 15-27 noyabr tarixləri arasında kütləvi aksiyaların gözlənildiyini açıqlayan Ukrayna polisi təhlükəsizlik tədbirlərini artırıb. Zirehli polis maşınları Kiyevdə hökumət binalarına gedən yolları bağlayıb. Polislər keşikçi itlərlə birlikdə prezident administrasiyası, Milli Bank, parlament binalarının önündə dayanıb. Təhlükəsizliyi təxminən 5 min polis və əsgərin cəlb edildiyi bildirilir.
Bir neçə gün əvvəl isə Ukrayna kəşfiyyat təşkilatı Rusiyanın Ukraynada daxili qarışıqlıq yaratmaq üçün müxalifləri hərəkətə gətirməklə bağlı planları olduğunu iddia etmişdi.
Hökumət indiki nümayişlərdə Kremlin əli olduğunu bildirir. Ukrayna hökumətinin fikrincə, nümayişləri Rusiya idarə edir ki, Ukraynada sabitliyi pozsun.
Nümayişin təşkilatçıları arasında Müxalifət Blokunun liderləri də var. Bu bloku Maydan hərəkatı ilə devrilən Viktor Yanukoviçin partiyasından olanlar və keçmiş baş nazir Yulia Timoşenkonun Batkivşina Partiyası yaradıb. Timoşenko deyir:“ Maydan hərəkatından keçən bu 3 ildən sonra deyə bilərik ki, Ukraynanın klan sistemi yenidən canlanıb. Təəsüf ki, bizim yenə də prezidentimiz ən yüksək səviyyədə oliqarxdır”.
“Azadlıq radiosu” xəbər verir ki, nümayişçilər isə pensiyaların artırılmasını, işığa, qaza qiymətlərin azaldılmasını tələb edir. İflasa uğrayan banklarda pulları batanlar isə Milli Bank sədrinin istefasını tələb edir.
60 yaşlı qadın adının çəkilməməsi şərtilə deyib ki, o, iki rəfiqəsi ilə birlikdə internetdə elanla gəlib. Həmin elanda nümayişdə 5 saat iştiraka görə 5 dollar təklif olunurdu.
Ukraynaın SBU Təhlükəsizlik Xidmətinin rəhbəri Oleksandr Tkaçuk isə təhlükəsizlik tədbirlərinin belə gücləndirilməsini hökumətin ehtiyat etməsi ilə izah edib. Hökumət narahatdır ki, bu nümayiş Kremlin dəstəyi ilə hökuməti laxlatmaq planının başlangıcı ola bilər. “Biz bundan əvvəl də bildirirdik ki,Rusiyanın Ukraynaın daxili siyastinə qarışmaq, fikir ayrılıqlarını kütləvi iğtişaşlara qədər qızışdırmaq planı haqda məlumatımız var” deyə Tkaçuk “Azadlıq radiosu”na bildirib. O, əlavə edir ki, “ancaq bu o demək deyil ki,bu günki nümayişləri bütünlüklə Rusiya təşkil edib”.
TAHİR
