ABŞ Prezidenti Donald Tramp 33 illik fasilədən sonra Amerika ordusuna nüvə silahları sınaqlarını dərhal bərpa etmək göstərişi verib. Tramp bu göstərişi Çinin Sədri Si Cinpin ilə görüşdən bir neçə dəqiqə əvvəl verib.
“Truth Social”da paylaşımında Tramp bildirib ki, ABŞ dünyanın digər ölkələrindən daha çox nüvə silahına malikdir: “Bu, mənim ilk müddətimdə tamamilə yenilədiyimiz bir şey idi”.
Qərarı “çətin, lakin qaçılmaz” adlandıran Tramp deyib: “Nüvə silahlarının dağıdıcı gücünə görə bundan nifrət edirdim, amma başqa seçimim yox idi”.
Rusiya və Çinin aktiv sınaq proqramlarını davam etdirdiyini xatırladan prezident bildirib ki, digər ölkələr sınaqlar keçirərkən ABŞ-ın kənarda qalması ədalətsizlikdir: “Müdafiə Nazirliyinə nüvə silahlarımızı bərabər şərtlərlə sınaqdan keçirməyə başlamağı tapşırmışam. Proses dərhal başlayacaq”.
ABŞ Prezidenti ölkəsinin nüvə gücləri ilə rəqabət aparması üçün sınaqların zəruri olduğunu bəyan edib.
“Başqalarının sınaqlar apardığı bir şəraitdə düşünürəm ki, bizim də eyni şeyi etməyimiz məqsədəuyğundur”, - deyə Tramp “Air Force One” təyyarəsində bildirib və nüvə sınaqlarının yerlərinin daha sonra müəyyənləşdiriləcəyini əlavə edib.
Dünyanın nüvə silahları ilə bağlı daha riskli bir mərhələyə girib-girmədiyi sualını cavablayan Tramp belə bir təhdidin olması fikrini rədd edib, ABŞ ehtiyatlarının “təhlükəsiz şəkildə qorunduğunu” deyib və vurğulayıb ki, o, bu sahədə tərk-silahı alqışlayardı.
Trampın nüvə silahları sınaqlarını bərpa etmək qərarı son illərdə Çinin nüvə arsenalını sürətlə genişləndirməsindən sonra, həmçinin Rusiyanın nüvə başlığı daşıya bilən və atom enerjisi ilə işləyən kruiz raketinin, eləcə də torpedonun uğurla sınaqdan keçirildiyini elan etməsindən dərhal sonra verilib. Rusiya ilə bağlı bu məlumatları Putin şəxsən özü bir neçə gün əvvəl açıqlayıb
ABŞ-da yerləşən Strateji və Beynəlxalq Araşdırmalar Mərkəzinin məlumatına görə, Pekin nüvə arsenalının həcmini ikiqat artırıb və 2025-ci ildə onun artıq təxminən 600 nüvə silahı var ki, bu da 2020-ci ildəki 300 ədəddən iki dəfə çoxdur. ABŞ hərbçilərinin hesablamalarına görə, Çin 2030-cu ilə qədər 1000-dən çox nüvə silahına malik olacaq. CSIS-in məlumatına görə, sentyabr ayında Qələbə Günü paradında beş nüvə silahı nümayiş etdirilib və bunların hamısı ABŞ-ın kontinental ərazilərinə çata bilər.
Vaşinqtonda yerləşən Silahlara Nəzarət Assosiasiyası ABŞ-ın 5225, Rusiyanın isə 5580 nüvə başlığı ehtiyatına malik olduğunu təxmin edir.
Birləşmiş Ştatlar sonuncu dəfə nüvə silahını 1992-ci ildə sınaqdan keçirib.
ZÜMRÜD
