Suriya prezidenti Şaraa devrilmiş lider Bəşər Əsədin məsuliyyətə cəlb edilməsi üçün bütün hüquqi mexanizmlərdən istifadə edəcəklərini, lakin hazırda Əsədə ev sahibliyi edən Rusiya ilə münaqişəyə girməyəcəklərini bəyan edib.
"Bütün bir nəsil böyük psixoloji travma yaşadı. Buna görə də azadlıq dövrü insanların qayıdışı və ölkənin yenidən qurulması üçün yeni bir ümid olmalıdır" - deyə CBS News-a danışan Şaraa bildirib.
Şaraa deyib ki, Prezident Sarayı qurulduğu gündən bəri Suriya xalqına qarşı çox pisliklər edilib: "Suriya ərazisi xaricində heç bir addım atmadıq, rejimdən başqa heç kimi hədəf almadıq. Xalqı cinayətkar rejimin zülmündən azad etdik".
Əsədin taleyinə gəlincə Şaraa deyib ki, onun ədalət qarşısında cavab verməsi üçün bütün mümkün hüquqi vasitələrdən istifadə ediəcək. Ancaq bununla belə, Şaraa əlavə edib ki, hazırda Rusiya ilə münaqişəyə girmək Suriyaya çox baha başa gələr və bu ölkənin maraqlarına da uyğun deyil.
Xatırladaq ki, sentyabrın sonunda Dəməşq məhkəməsi Əsədin qiyabi həbsinə order verib və işi İnterpol vasitəsilə beynəlxalq səviyyəyə çıxarmaq üçün prosesə başlayıb.
Ötən ilin dekabrında Əsədin vəzifədən uzaqlaşdırılmasından dərhal sonra Rusiya Əsəd və onun ailəsinə “humanitar sığınacaq” verdiyini açıqlayıb. 25 ilə yaxındır ölkəyə rəhbərlik edən Bəşər Əsəd 2024-cü ilin sonunda Rusiyaya qaçıb və bununla da 1963-cü ildə başlayan Baas Partiyasının onilliklər boyu davam edən hakimiyyətinə son qoyulub.
Yanvarda ölkədə Şaraanın başçılıq etdiyi yeni keçid hökuməti yaradılıb.
TAHİR
