Almaniyanın “Die Zeit” qəzeti Suriyanın keçmiş lideri Bəşər Əsədin 2024-cü ilin dekabrında ölkəsini tərk etdikdən sonra ailəsi ilə birlikdə Rusiyanın paytaxtı Moskvada məskunlaşdığını və dəbdəbəli həyat sürdüyünü yazıb.
Qəzet Əsədin vaxtının çox hissəsini kompüter oyunları oynamaqla keçirdiyini iddia edib.
Xəbərdə Əsəd ailəsinə yaxın mənbəyə istinadən bildirilir ki, Əsəd ailəsi ilə birlikdə Moskvanın lüks göydələnlər bölgəsi “Moscow City”də üç ayrı mənzildə yaşayır. Əsədin vaxtaşırı burada yerləşən ticarət mərkəzinə baş çəkdiyi, gününün böyük hissəsini kompüterin qarşısında keçirdiyi iddia edilir.
Eyni mənbə onu da iddia edib ki, Əsəd ailəsinin “Moscow City”də təxminən iyirmi mənzili və Moskva yaxınlığında şəxsi mühafizə tərəfindən qorunan bağ evi var.
Bəşər Əsəd 2024-cü ilin dekabrında silahlı müxalifət qruplarının Dəməşqə girməsindən sonra Suriyanı tərk edib. Onun qaçışından sonra “Həyat Təhrir əl-Şam”ın (HTŞ) lideri Əhməd əl-Şaraa ölkənin müvəqqəti prezident olub. Rusiya Xarici İşlər Nazirliyi Əsədin Rusiyada olduğunu və təhlükəsizliyinin təmin edildiyini rəsmən təsdiqləyib.
Həmin vaxt “Reuters” agentliyi yazırdı ki, Əsəd Suriyanı tərk etməzdən əvvəl özü ilə 500 min dollar pul, qiymətli əşya və məxfi sənədlər götürüb və bu yükü daşımaq üçün şəxsi təyyarə bir neçə uçuş həyata keçirilib.
Əsəd ailəsinin Moskvada daşınmaz əmlak yatırımları ilə bağlı iddialar ilk dəfə 2019-cu ildə “Financial Times” tərəfindən gündəmə gətirilib. Qəzet iddia edib ki, ailə üzvləri 2013-2019-cu illər arasında “Moscow City”də 40 milyon dollar dəyərində əmlak alıblar.
Kremlin sözçüsü Dmitri Peskov isə bildirib daha ki, onun keçmiş Suriya liderinin qohumlarına məxsus dəbdəbəli mənzillərdən xəbəri yoxdur. Peskov Rusiyada azad bazar şərtlərinin hökm sürdüyünü və əcnəbilərin əmlak əldə etməsinin adi hal olduğunu ifadə edərək, iddiaların “siyasi spekulyasiya”ya əsaslandığını və Kremlin bu məsələdə xüsusi məsuliyyət daşımadığını vurğulayıb.
İllərdir davam edən vətəndaş müharibəsindən sonra Suriyanı tərk etməyə məcbur olan Bəşər Əsədin Rusiyadakı həyat şəraiti və ailəsinin əmlakı beynəlxalq müzakirə mövzusu olmaqda davam edir.
TAHİR
