Qəzzada ABŞ-ın dəstəklədiyi yardım fondu fəaliyyətə başladı – Fələstinlilər izlənilmək qorxusundan ehtiyat edirlər
Qəzzaya yardım məqsədilə ABŞ-ın dəstəyi ilə yaradılmış “Qəzza Humanitar Fondu” (GHF) fəaliyyətə başlasa da, əhali bu təşəbbüsə ehtiyatla yanaşır. Yardımı almaq üçün üz tanıma texnologiyasından istifadə olunacağı xəbəri fələstinlilər arasında ciddi narahatlıq yaradıb. baki-xeber.com-un məlumatına görə, bu barədə İsrail bildirib ki, İsveçrədə qeydiyyatdan keçmiş bu fond vasitəsilə yardımlar HƏMAS-la əlaqəsi olmayan şəxslərə çatdırılacaq. Lakin BMT və digər beynəlxalq humanitar təşkilatlar fondu boykot edib. Onlar bu sistemin humanitar yardımın neytrallıq prinsipinə zidd olduğunu bəyan ediblər.
Beynəlxalq Qızıl Xaç Komitəsinin sözçüsü Kristian Kardon məsələ ilə bağlı bildirib:“Humanitar yardım siyasi və hərbi məqsədlər üçün istifadə edilməməlidir.”
HƏMAS təşkilatı da fələstinlilərə xəbərdarlıq edərək, fondun qurduğu yardım məntəqələrinə yaxınlaşmamağa çağırıb. Qurumun yaydığı bəyanatda qeyd olunur ki, İsrail bu mexanizmdən kəşfiyyat məlumatları toplamaq üçün istifadə edir.“Rafaha getməyin. Tələyə düşməyin. Həyatınızı riskə atmayın. Eviniz sizin qalxanınızdır,” – bəyanatda deyilir.Bazar ertəsi yeni yardım məntəqələrinə heç bir müraciət olmasa da, çərşənbə axşamı Rafah şəhərində yerləşən mərkəzlərdən birinə onlarca insan toplaşıb. Lakin bir çoxları biometrik yoxlamalar və HƏMAS-ın xəbərdarlıqları səbəbilə yardım almaqdan imtina edib.55 yaşlı, yeddi uşaq atası Əbu Əhməd belə deyib:“Getmək istəyirəm, çünki uşaqlarım acdır. Amma qorxuram. Deyirlər ki, bu şirkət İsrailindir və muzdlulardır. Üstəlik HƏMAS da ora getməməyi deyib.”Xatırladaq ki, İsrail mart ayının əvvəlində Qəzzaya tam blokada tətbiq etmiş, HƏMAS-ı yardımları ələ keçirərək mövqelərini möhkəmləndirməkdə ittiham etmişdi. HƏMAS isə bu iddiaları rədd edir.Yalnız ötən həftə blokada bir qədər yumşaldılıb və BMT agentliklərinə aid az sayda yardım yük maşını, o cümlədən Ümumdünya Ərzaq Proqramının (WFP) un daşıyan maşınları Qəzzaya buraxılıb. Lakin bu yardım, BMT-nin gündəlik 500-600 yük maşını ehtiyacına nisbətdə çox azdır.Əbu Əhməd qida çatışmazlığını belə ifadə edib:“Müharibədən əvvəl soyuducumda hər şey olurdu – ət, toyuq, süd, içkilər… İndi isə bir tikə çörəyə möhtacam.”Hazırda Qəzzanın böyük hissəsinə nəzarət edən İsrail qüvvələri bölgədə hücumlarını davam etdirir. Qəzza Səhiyyə Nazirliyinin məlumatına görə, mart ayından bəri 3,901 fələstinli həyatını itirib.
Ümumilikdə isə, 7 oktyabr 2023-cü ildə HƏMAS-ın sərhədi keçərək 1,200 israillini öldürdüyü və 251 nəfəri girov götürdüyü hücumdan sonra başlayan müharibədə 54,000-dən çox fələstinli həlak olub.
Abidə Taralova
Azərbaycan Universitetinin
Humanitar və sosial elmlər fakültəsinin l kurs tələbəsi
