Elçin Əfəndi: “Digər universitetlərdə də bu cür narazılıq edilərsə, gələcəkdə ali təhsil müəssisələrinə subbakalavrların müraciəti dayandırılar”
“Subbakalavrların ali məktəblərə imtahansız qəbul olunması praktikası ciddi tədris və idarəetmə problemləri yaradır”. Bunu Dövlət İmtahan Mərkəzinin (DİM) sədri Məleykə Abbaszadə bildirib.
O qeyd edib ki, keçən il 5000-dən çox subbakalavr ali məktəblərə imtahansız qəbul olunub: “Ali məktəblərdə subbakalavrların iştirakı ilə bağlı narazılıqlar artmaqdadır. Bu tələbələr dərslərdə iştirak etmirlər, tədris prosesinə qoşulmaqda çətinlik çəkirlər və onlardan nəticə almaq çətindir. Bəzi ali məktəblər artıq bu praktikanı qəbul etmək istəmir. Hazırda sistem belə qurulub ki, bakalavr pilləsi üzrə 200 bal toplayan abituriyentlərlə yanaşı, daha az nəticə göstərmiş – məsələn, 150 bal – subbakalavrlar da eyni ixtisaslara qəbul olunur və bu yerləri doldururlar”.
DİM sədrinin dediyindən belə aydın olur ki, ali məktəblər subbakalavrların qəbulunu istəmir, buna qarşı çıxır. Maraqlıdır, məlum problem necə həll olunmalıdır?
“… subbakalavrların həm akademik göstəricilərinə, həm də ümumi tədris prosesinə mane olur” Təhsil eksperti Elçin Əfəndi “Bakı-Xəbər”ə şərhində bildirdi ki, ali təhsil müəssisələrinin bir qismi subbakalavrların universitetə qəbul olmasını istəmir. Bu da təhsil sistemində müəyyən problemlərə səbəb olur: “Digər universitetlərdə də bu cür narazılıq edilərsə ali təhsil müəssisələrinə subbakalavrların müraciəti dayandırılar. Ancaq Nazirlər Kabinetinin subbakalavrlarla bağlı qərarı hələ qüvvədədir. Bu qərar əsasında 2012-ci ildən bəri orta ixtisas təhsil müəssisələrini bitirən şəxslər subbakalavr prosesində iştirak edə bilir. Bu problemin həlli üçün müəyyən işlər görülməlidir. Məlumdur ki, kollec bitirən şəxslər ixtisaslarına uyğun olaraq ali məktəbə yönləndirilir. Ancaq bu onların həm akademik göstəricilərinə, həm də ümumi tədris prosesinə mane olur. Problemin həlli üçün ilk olaraq kollec istiqamətində formal yox, obyektiv qiymətləndirmə təmin olunmalıdır. Bu qərardan sonra təhsilalanların böyük əksəriyyəti ümumi müvəffəqiyyət göstəricisinə hansısa üsulla təsir etməyə çalışacaq. Məlumdur ki, həmin qiymət göstəricisinə əsasən subbakalavrların ali məktəbə qəbulu mümkün olur. Bu səbəbdən də formal qiymətləndirmə sistemi aradan qaldırılmalıdır. Subbakalavrların aldığı qiymət onların real biliyini əks etdirməlidir. Belə olarsa, kollecdən ali məktəbə qəbul olacaq şəxsin daha hazırlıqlı, bacarıqlı olacağını görərik. Qeyd edilən sahədə hər hansı bir dəyişiklik edilməsə subbakalavrların ali məktəbə qəbulu dayandırıla bilər”.
Günel CƏLİLOVA
