Ramin Qafarov: “Turistlər turizmin bu növünə maraq göstərirlər, onlar hoteldə deyil, evlərdə qalmağı seçir”
Müasir və qloballaşan dünyada sosial-iqtisadi inkişaf göstəriciləri arasında turizm ön sıradadır. Turizmin inkişafı ümumilikdə başqa sahələrin də inkişafına təsir göstərir.
Ölkəmizdə keçirilən beynəlxalq konfranslar, yarışlar turist axınını daha da genişləndirdi. Artıq dünyanın bir sıra ölkələrində Azərbaycana maraq artıb. Onlar Azərbaycana gəlmək, sosial-iqtisadi şəraiti ilə yaxından tanış olmaq istəyirlər. Yalnız Bakı ilə kifayətlənməyən qonaqlar regionlara da səfər edirlər. Bu baxımdan şəhər turizmi ilə yanaşı, kənd ev turizmi də inkişaf edir. Hər iki turizm sahəsində perspektivlərin nəzərə alınması bu sahəyə qayğının artmasına səbəb olur.
Məlumat üçün bildirək ki, bu ilin yanvar-may aylarında Azərbaycana turizm məqsədilə gələn əcnəbilər və vətəndaşlığı olmayan şəxslərin ümumi gecələmə sayı 3 milyon 110 min 605 dəfə olub. Bu, ötən ilin eyni dövrü ilə müqayisədə 8,1 % çoxdur.
Açıqlanan statistik məlumatlardan da bəlli olur ki, ölkəmizə səyahət edən turistlərin sayı artır. Qeyd edək ki, turizmin inkişafı ölkə iqtisadiyyatı üçün prioritet elan edilib. Çoxlu sayda turist gəlir deməkdir. Ancaq maraqlı məqam ondan ibarədir ki, ölkəmizə gələn turistlərin əksəriyyəti hotellərdə deyil, kənd evlərində qalmağa üstünlük verir. Belə ki, ən kəskin artım kirayəyə götürülmüş evlərdə gecələmələrin sayında qeydə alınıb. 5 ay ərzində bu göstərici 405 min 753 dəfə olub ki, bu da 1 il əvvələ nisbətən 75,9 % artım deməkdir.
Kirayə evlərdə gecələmələr xüsusilə Hindistandan gələnlər arasında artıb. Onların gecələmələrinin sayı 144 min 408 olub. Bu da illik müqayisədə 2 dəfə çoxdur.
Rusiyadan gələnlər arasında kirayə evlərdə gecələmələrin sayı 53,2 % artaraq 56 min 68 dəfə, Səudiyyə Ərəbistanından gələnlər arasında kirayə evlərdə gecələmələrin sayı isə 28,8 % artaraq 27 min 126 dəfə olub. Hesabat dövründə mehmanxana və mehmanxana tipli obyektlərdə gecələmələrin sayı isə 7,8 % artaraq 1 milyon 12 min 714 dəfəyə çatıb. İl ərzində turistlərin özünə və yaxud ailə üzvlərinə məxsus mənzillərdə gecələməsi halları isə 12,6 % artaraq 1 milyon 124 min 35 nəfər olub. Beləliklə, yanvar-may aylarında ölkədəki gecələmələrin 32,55 %-i hotellərin, 67,45 %-i isə müxtəlif kateqoriyadan olan evlərin payına düşüb. Yəni Azərbaycana gələn turistlərin mühüm hissəsi evlərdə gecələyir.
“Fərdi evlər otellərə nisbətən daha ucuz başa gəlir, sərfəli qiymətlər təklif olunur, bu üsul ev sahiblərinə də sərf edir”
Turizm sahəsi üzrə ekspert Ramin Qafarov “Bakı-Xəbər”ə şərhində bildirdi ki, turistlərin fərdi ev kirayələməsi təcrübəsi dünyada geniş yayılıb: “Xüsusilə bu üsul qardaş Türkiyədə çox yayılıb. Turistlər qrup şəklində gəlirsə, otellərə üstünlük verilir ki, qrup üzvləri hamısı bir yerdə, bir məkanda toplansın. Bir nöqtədən hərəkət edilsin. Amma fərdi qaydada, ailə ilə səyahətə çıxanlar otellərlə yanaşı fərdi evlərdə qalmağı da üstün tutur. Çünki fərdi evlər otellərə nisbətən daha ucuz başa gəlir, sərfəli qiymətlər təklif olunur. Bu üsul ev sahiblərinə də sərf edir. Fərdi evlərdə qalanlar kirayə pulunu gündəlik ödəyir. Bundan həm ev sahibi qazanır, ailə büdcəsinə gəlir əlavə olunur, həm də turist ucuz səyahət etmiş olur. Fərdi ev kirayələnməsi qazancın paylanması, bölüşülməsi, otel isə yalnız bir nəfərin qazancı deməkdir. Bir çox ölkələrdə turizm, istirahət bölgələrində, gözəl təbiət mənzərəsi olan məkanlarda fərdi ev sahibləri büdcə ehtiyaclarını məhz turistlərin hesabına ödəyirlər. Turist üçün də ev şəraiti daha xoşdur, sıxılmır, özünü rahat hiss edir, insanlarla, yerli əhali ilə ünsiyyətdə olur”.
Həmsöhbətimiz onu da əlavə etdi ki, kənd turizmi əsasən kənd yerlərində formalaşan təbiətə, o yerin mədəni və tarixi resurslarına əsaslanan, eyni zamanda turizm məhsullarını formalaşdıran bir sahədir: “Urbanizasiyanın artdığı bir dövrdə kənd yaşıl turizmi, təbiətə meylli turizm trendləri maraq kəsb etməkdədir. Azərbaycanda da kəndlərin inkişafı, icmaların sosial rifahının yaxşılaşdırılması baxımından bu sahə inkişaf etdirilməkdədir. Əlbəttə ki, insanlar, xüsusilə şəhər əhalisi turizmin bu növünə maraq göstərirlər. Onlar gündəlik yaşayış tərzinin fərqli bir mühiti olan kənd həyatına səfərlər etməklə təbiətlə əlaqələrini gücləndirmiş olurlar. Kənd turizmi orada yaşayan əhalinin də rifah səviyyəsinə təsir edir. İsmayıllı, Şəki, Zaqatala, Quba, Qusar, Xaçmaz, Lənkəran, Astara və s. kimi rayonları kənd turizminin inkişaf etdiyi bölgələrə misal göstərmək olar. Kənd evləri bölgələrdə yerləşən otellərin qiymət bahalığı problemində alternativ rol oynayır. Bu, həm turistə, həm də kənd əhalisinə sərf edir. Həmin sahədə daha çox maarifləndirmə işləri aparılmalıdır. Yaxşı olardı ki, Azərbaycanda bu kənd evləri vahid bir portalda birləşərək əhalimizə təqdim olunsun. Bu, insanların istədikləri bölgədə kənd evləri tapmaq işini asanlaşdıracaq”.
Günel CƏLİLOVA
