Bildiyimiz kimi, dünyanı dəhşətə salan koronavirsun ölkəmizdə yayılmasının qarşısının alınması üçün dövlət tərəfindən əhatəli tədbirlər həyata keçirilir. Artıq bir sıra kütləvi tədbirlər, o cümlədən də Novruz bayramı şənlikləri təxirə salınıb. Koronavirus təhlükəsinin qarşısının alınması üçün Azərbaycan Respublikası Nazirlər Kabineti yanında operativ qərargah tərəfindən adamların sıx toplaşdığı məkanlarda virusa yoluxma risqi yüksək olduğundan, qarşıdakı aylarda toy və bu cür məclislərin təxirə salınmasını, yas mərasimlərinin isə kütləvi keçirilməməsini tövsiyə edib.
Qeyd edək ki, “Bakı-Xəbər” qəzeti olaraq hər zaman yas mərasimlərinin təşkilində, ümumiyyətlə bu proses zamanı baş verən neqativliklərə, əyintilərə, israfçılığa, sui-istifadə hallarına, qiymət dəllallığına qarşı mübarizə aparmışıq. Bizi yaxından izləyən oxucularımız yaxşı bilirlər ki, 9 il bundan əvvəl “Bakı-Xəbər” “İslamda yas mərasimləri və əyintilər” mövzusunda layihə həyata keçirib və o layihə çərçivəsində də müsabiqə elan edib. 2011-ci il fevralın 20-də elan edilən müsabiqə avqustun 20-də başa çatıb və qaliblərin mükafatlandırılması həmin ilin sentyabr ayının 20-də baş tutub. Üç ay müddətində davam edən müsabiqəyə 61 yazı təqdim edilib. Onu da vurğulayaq ki, müsabiqədə həm peşəkar, həm də həvəskar jurnalistlər iştirak edib. Hətta həbsxanalardan da müsabiqəyə yazı təqdim edənlər olub. Həmin yazılardan 13-ü seçilərək qalib elan olunub. Müsabiqənin nəticələrinə görə, 1 yerin sahibinə 1000 (min), ikinci yeri qazanan yazının müəllifinə 500 (beş yüz), üçüncü yeri tutanlara isə 300 (üç yüz) manat pul mükafat verilib. Onu da vurğulayaq ki, layihə sırf “Bakı-Xəbər” qəzetinin öz maliyə resursları hesabına həyata keçirilmişdi.
Beynəlxalq Mətbuat Mərkəzində qaliblərin mükafatlandırılması keçirilmişdi və həmin mərasimdə
Qafqaz Müsəlmanları İdarəsinin şöbə müdiri Hacı Mirəziz Seyidzadə, KİV-in İnkişafına Dövlət Dəstəyi Fondunun (KİVDF) icraçı direktoru Vüqar Səfərli, millət vəkili Aqil Abbas, eləcə də digər dövlət və ictiamiyyət nümayəndələri iştirak edərək layihənin məqsədini müsbət qiymətləndiriblər.
Layihə çərçivəsində “Bakı-Xəbər”in öz əməkdaşları da silsilə araşdırma yazıları, müsahibələr təqdim ediblər ki, bu da yas mərasimlərinizin keçirilməsində yol verilən nöqsanların ifşa edilməsi ilə bağlı olub.
“Yas mərasimlərinə insanların kütləvi axın etməsi bu virusun yayılma ehtimallarını artıra bilər, ona görə də yas mərasimlərində kütləvi iştirakın məhdudlaşdırılması ilə bağlı tövsiyəyə hər kəs əməl etməlidir”
Tanınmış ziyalı və “İslamda yas mərasimləri və əyintilər...” mövzusunda qəzetimizin həyata keçirdiyi layihədə aktiv iştirak edən Şəmsəddin Əliyev bizimlə söhbətində bildirdi ki, “Bakı-Xəbər” qəzetinin 9 il əvvəl həyata keçirdiyi layihə, bu layihədə əks olunan problemlər bu gün də aktualdır. “Çox yaxşı yadımdadır ki, “Bakı-Xəbər” qəzeti “İslamda yas mərasimləri və əyintilər” adlı bir layihə həyata keçirmişdi, mən özüm də həmin layihəni tədqir etmişəm, hətta xüsusi yazı ilə də çıxış etmişəm.
“Bakı-Xəbər”in 2011-ci ildə həyata keçirdiyi layihənin mövzusu bu gün də aktualdır və onun cəmiyyət üçün gərəkli olduğu bir daha öz təsdiqini tapır. Deyim ki, islam ilahidən gələn bir din kimi insanlar arasında izzət və hörmət üzərində qurulan ideologiyaya sahibdir. Bu ideologiyanın əsas qayəsi və fəlsəfəsi ədalətdən və haqdan, israfçılıqdan uzaq olmaqdan, Haqq dünyasına qədər nəfsi ilə mübarizədən, yas mərasimlərini dəbdəbədən uzaq təşkilindən, həm də məzarın mümkün qədər sadə olmağından ibarətdir. Yas mərasimlərin verilməsi, dəfn günündən 40 gününə qədər, daha sonra ilin də verilməsi israfçılıqla müşayiət olunmamalıdır”.
Ş.Əliyev vurğuladı ki, yas mərasimlərinin keçirilməsində kütləviliyin məhdudlaşdırılması özü də bu gün çox aktual və vacibdir:”Yas mərasimlərinin bu cür israfçılıqla təşkil olunması, bir sıra məscidlərdə bu mərasimlərin keçirilməsi düzgün deyil. Hesab edirəm ki, Nazirlər Kabineti yanında operativ qərərgahın yas məclislərində kütləviliyinin məhdudlaşdırılması ilə bağlı verdiyi tövsiyəyə əməl olunmalıdır. Bu tövsiyə yerində və məqamında verilən bir tövsiyədir. Çünki bu əhalinin, insanların koronavirusa yoluxması risqini azaldır. Yas mərasimlərinə insanların kütləvi axın etməsi bu virusun yayılma ehtimallarını artıra bilər, ona görə də yas mərasimlərində kütləvi iştirakın məhdudlaşdırılması ilə bağlı tövsiyəyə hər kəs əməl etməlidir. Bu tövsiyənin verilməsində əsas məqsəd əhalinin sağlamlığının qorunması ilə bağlıdır və buna da hər bir vətəndaş ciddi riayət etməlidir. Fikrimcə, bu tövsiyəni heç müzakirə etməyə ehtiyac yoxdur. Hər bir vətəndaş, qurum, məscidlər, yas mərasimlərinin keçirildiyi məkanlar dövlətin ali məqsədinin həyata keçirilməsinə dəstək verməlidir. Vətəndaşlar dövlət qurumlarının verdikləri tövsiyələrə ciddi əməl etməli və həm özlərinin, həm də digər insanların sağlamlığını qorumaq üçün kütləvi tədbirlərdən, yığıncaqlardan uzaq olmalıdırlar. Bilirsiz ki, bizim məscidlərin bir çoxunda, mərasim evlərində yas mərasimlərinin keçirilməsinə böyük meydan verilir. Burada mütləq şəkildə məhdudlaşdırmalar aparılmalıdır”-deyə Ş.Əliyev qeyd etdi.
İradə SARIYEVA
