Koronavirus xəstəliyi can almaqda davam edir. Bu virusla mübarizə aparmaq üçün ölkəmizdə də lazımi işlər görülür. Azərbaycanda koronavirus xəstəliyinin yayılmasının qarşısının alınması üzrə profilaktik tədbirlər davam etdirilir. Hazırda bununla bağlı müvafiq maarifləndirici, eyni zamanda tibbi baxımdan tədbirlər həyata keçirilir, ictimai məkanlarda dezinfeksiya işləri aparılır və Ümumdünya Səhiyyə Təşkilatının tövsiyələrinə uyğun olaraq digər zəruri addımlar atılır.
Məlumdur ki, Azərbaycan ərazisinə keçən şəxslər, həmçinin ölkə ərazisindəki vətəndaşlarda virusun əlamətləri aşkarlandıqda, təlimata uyğun olaraq, onlar karantinə götürülərək müvafiq xəstəxanalara yerləşdirilir, həmin müddətdə müəyyən testlər və müalicə aparılır. Ancaq bəzi hallarda koronavirus xəstəliyinin əlamətləri olanlar həkim briqadalarına qarşı zor tətbiq edir, karantin zonasını icazəsiz tərk edir və ya müayinə və müalicə olunmaqdan imtina edir.
Koronavirusun yayılması təhlükəsinə qarşı görülən tədbirlərin normal şəraitdə həyata keçirilməsini təmin etmək məqsədilə Nazirlər Kabineti yanında operativ qərargah hüquq-mühafizə orqanlarına belə halların qarşısının alınması ilə bağlı göstəriş verib. Belə ki, karantin normalarını pozan, tibbi heyətin normal iş rejiminə mane olan hər bir şəxsə qarşı qanunun tələblərinə uyğun şəkildə tədbirlər görüləcək.
“Tətbiq olunan tədbirlər əhalinin sağlamlığının qorunmasına yönəldiyindən, karantinə alınmış vətəndaşlar bu tipli tədbirləri anlayışla qarşılayıb, məsuliyyətlə yanaşmalıdırlar”
Hüquqşünas Samir Məmmədov bildirdi ki, karantin bölgəsində saxlanılan şəxslər fövqəladə vəziyyət, hərbi vəziyyət və dini ekstremizm əleyhinə aparılan xüsusi əməliyyat zonasının hüquqi rejimlərinin dövründə tətbiq edilən tədbirlərə, müəyyən olunmuş qaydalara riayət etməlidirlər: “Hərbi və fövqəladə vəziyyət halları və tətbiqi qaydası Azərbaycan Respublikası Konstitusiyasının 111 və 112-ci maddəsi ilə, dini ekstremizm əleyhinə aparılan xüsusi əməliyyat zonasının hüquqi rejimi isə “Dini ekstremizmə qarşı mübarizə haqqında” Qanunla müəyyən edilir. Həmin halların heç biri hazırda mövcud olmadığından, karantin tələblərinin pozulmasına görə qanunla inzibati məsuliyyət tətbiq oluna bilməz".
Ancaq həmsöhbətimiz onu da vurğuladı ki, tətbiq olunan tədbirlər əhalinin sağlamlığının qorunmasına yönəldiyindən və təhlükənin qlobal xarakter almasını nəzərə alaraq, bununla bağlı karantinə alınmış vətəndaşlar bu tipli tədbirləri anlayışla qarşılayıb, məsuliyyətlə yanaşmalıdırlar: "Eyni zamanda əlaqədar səhiyyə qurumları, digər dövlət orqanları karantinə yerləşdirilən vətəndaşlara normal zəruri şərait yaratmalı və karantinə yerləşdirmək adı ilə onların hüquqlarının pozulması hallarına yol verməməlidir".
Günel CƏLİLOVA
