Məlum olduğu kimi, koronavirus təhlükəsi ilə bağlı Nazirlər Kabineti yanında yaradılan Operativ qərargahın qərarı ilə Azərbaycanda bütün orta və ali məktəblərdə tədris müvəqqəti olaraq dayandırılıb. Koronavirusa görə buraxılmış dərslərin kompensasiya edilməsi üçün Təhsil Nazirliyi teledərslərə başlayıb.
Belə ki, martın 11-dən başlayaraq həftənin 5 günü, saat 10-dan 16-dək Təhsil Nazirliyinin dəstəyilə “Mədəniyyət” kanalında “Dərs vaxtı” adlı teledərslərə artıq start verilib. Bu proqramda teledərslər bütün sinifləri əhatə edəcək, dərs mövzularına dair qısa izah və təlimatlar təqdim olunur.
“İbtidai siniflərin daha çox müəllim dəstəyinə ehtiyacını nəzərə alaraq, 1-4-cü sinif şagirdlərini “Mədəniyyət” kanalının ekranı qarşısında gözləyəcəyik. Artıq müstəqil öyrənmə vərdişləri qazanmış 5-11-ci sinif şagirdləri ilə isə həftədə 2 dəfə görüşəcəyik.
İbtidai siniflərdə “Azərbaycan dili”, “Riyaziyyat”, “Həyat bilgisi”, “Təsviri incəsənət”, “Xarici dil”, 5-11-ci siniflərdə isə “Azərbaycan dili”, “Riyaziyyat”, “Xarici dil”, “Tarix”, “Coğrafiya”, “Kimya”, “Fizika”, “Biologiya” fənləri üzrə qısa videodərslər təqdim ediləcək”. Nazirliyin müraciətində bildirilir.
“Əziz şagirdlər! Dərs cədvəlinə diqqət edin, dərsinizi “Dərs vaxtı”nda öyrənin. Unutmayın ki, öyrənmə yalnız sinif otağında deyi, ekran qarşısında da mümkündür.
“Dərs vaxtı”nda həftənin 5 günü sizinləyik! “Dərs vaxtı”na ekran qarşısında baxa bilməyənlər bu imkanı Təhsil Nazirliyinin elektron resursları ilə qazana bilərlər” tövsiyəsi də nazirliyin yaydığı açıqlamada əks olunub.
Bildiyimiz kimi, artıq teledərslərə start verilib. Qeyd edək ki, bir müddət əvvəl təhsil ekspertləri buraxılmış dərslərin kompensasiya olunması üçün onlayn, distant təhsilin həyata keçirilməsini təklif edirdilər.
Məlahət Mürşüdlü: “Təhsil Nazirliyinin start verdiyi teledərs layihəsinin əhəmiyyəti böyükdür”
Tanınmış təhsil eksperti Məlahət Mürşüdlü “Bakı-Xəbər”ə bildirdi ki, nazirliyin “Dərs saatı” layihəsi çox kreativ, qaydalı bir layihədir və bu, şagirdlərə istiqamət vermək baxımından əhəmiyyətlidir: “Koronavirusa görə dərslərin müvəqqəti olaraq təxirə salınması valideynləri o mənada narahat edirdi ki, şagirdlər tədrisdən geri qalacaqlar. Amma, gördüyünüz kimi, narahatlığa əsas yoxdur və Təhsil Nazirliyi bu məsələ ilə bağlı konkret addım atıb, maraqlı bir layihə təqdim edib. Şagirdlərin elektron resurslar vasitəsilə buraxdıqları dərsləri öyrənməsi onlar üçün çox faydalı olacaq. Doğrudur, teledərslər nəticəsində şagirdlərə mövzu ilə bağlı əhatəli məlumat, bilgi vermək çətindir, amma burada onlara istiqamət verilir. Özü də çox maraqlı izahlarla keçilir teledərslər. Təhsil Nazirliyinin start verdiyi teledərs layihəsinin əhəmiyyəti böyükdür”.
Kamran Əsədov: “Təhsil Nazirliyinin bu addımı təqdirəlayiqdir”
Digər tanınmış təhsil eksperti Kamran Əsədovun da fikrincə, bu layihə əhəmiyyətlidir: “İlk növbədə qeyd edim ki, 3 martdan 27 marta qədər koronovirus təhlükəsinə görə təhsil müəssisələrində tətil elan edildi və 4447 orta məktəbdə təhsil alan 1.5 milyon şagird üçün gündəlik ardıcıl dərs axını pozuldu. Bu boşluğu aradan qaldırmaq üçün Təhsil Nazirliyi bir neçə maraqlı və faydalı addım atıb. “Mədəniyyət” kanalında yayımlanan teledərslər uşaqlarda maraq yaradır. Təhsil TV peyklə yayımlanmalıdır. Səviyyəsiz layihələrə, verilişlərə ayrılan pullar bu cür maarifləndirici layihələrə xərclənsə, cəmiyyət də cahillikdən xilas olar. Təhsil Nazirliyinin bu addımı təqdirəlayiqdir.
“Mədəniyyət” kanalında videodərslər başlayıb. Yəni uşaqların bu dərsləri izləməsinə nəzarət edilir. Əgər dərsləri bu və ya digər səbəbdən ötürsəniz, onları Təhsil Nazirliyinin rəsmi səhifəsindən, “Facebook” səhifəsindən izləyə bilərsiniz. Bu kimi dərslərin keçirilməsi çox təqdirəlayiqdir. Məktəbdən və təhsildən uzaqlaşmış uşaqlar üçün məktəbdə keçirilən dərsləri tam əvəz etməsə də, onlara yol göstərəcək. Sadəcə, valideyn nəzarəti vacibdir. Lakin bir məqam məni narahat edir. Dərslərin müəyyən siniflər və fənlər üzrə ardıcıllığı, cədvəli yoxdur. Məsələn, 5-ci sinif “Azərbaycan dili” dərsindən sonra 1-ci sinif “Riyaziyyat” dərsi başladı. Bəzi müəllimlər çox sürətlə, bəziləri zəif tembrlə danışırlar. Bu kimi qüsurlar da düşünürəm ki, qısa zamanda aradan qaldırılacaq. Hələ ki izlədiyim dərslər arasında bir dənə də olsun rus bölməsində təhsil alanlar üçün dərs keçirilməyib. Rus bölməsi üçün dərslər yoxdursa, bu çox mənfi haldır. Belə ki, rus bölməsində təhsil alanların hüquqlarının pozulması deməkdir. Onlar da bu ölkənin vətəndaşlarıdırlar. Bu cür hal onlara qarşı, ən azı, ayrıseçkilik olacaq. Ümid edirəm ki, bu, nəzərə alınmayıbsa, növbəti günlərdə nəzərə alınacaq. Bütün hallarda, təhsilin əlçatanlığının təmin olunması üçün atılmış bu addımı müsbət və faydalı hesab edirəm”.
İradə SARIYEVA
