Azərbaycanın Nazirlər Kabineti yanında Operativ qərargah açıqlama yayıb. Açıqlamada deyilir ki, Ümumdünya Səhiyyə Təşkilatı (ÜST) son günlər koronavirus xəstəliyinə yoluxma hallarının artmasını, virusun çoğrafiyasının genişlənməsini nəzərə alaraq, dövlətlər tərəfindən müvafiq preventiv tədbirlərin gücləndirilməsi, eləcə də kütləvi tədbirlərin təxirə salınması təşəbbüsü ilə çıxış edib: "Virusun dünya üzrə əhatə dairəsi genişləndiyindən, ölkəmizdə də müvafiq profilaktik tədbirlər gücləndirilib. Bununla əlaqədar bildiririk ki, Bakı şəhərində və respublikanın müxtəlif regionlarında mart ayında keçirilməli olan ənənəvi Novruz şənlikləri ləğv edilir.
Operativ qərargah mütəxəssislərlə aparılan məsləhətləşmələr və Ümumdünya Səhiyyə Təşkilatının tövsiyələrindən irəli gələrək ayrı-ayrı qurumları yaxın müddətdə hər hansı kütləvi tədbir keçirməməyə, artıq təyin olunan tədbirlərin tarixini isə dəyişdirməyə çağırır. Həmçinin, adamların sıx toplaşdığı məkanlarda virusa yoluxma risqi yüksək olduğundan, qarşıdakı aylarda toy və bu cür məclislərin təxirə salınması, yas mərasimlərinin isə kütləvi keçirilməməsi tövsiyə edilir.
Virusun geniş yayılmasının qarşısının alınması məqsədilə Azərbaycan hökuməti tərəfindən aparılan tədbirlərə dəstək olaraq vətəndaşlarımızı bir daha adamların sıx toplaşdığı yerlərdən, qapalı məkanlardan uzaq durmağa, xarici ölkələrə, eyni zamanda, risq qrupu ölkələrinə səfərlərini təxirə salmağa, vacib səfərlər zamanı isə qoruyucu tədbirlərə maksimum riayət etməyə (qoruyucu tibbi maska, xüsusi qoruyucu eynək, dezinfeksiyaedici vasitələrdən istifadə və s.) çağırırıq".
Göründüyü kimi, hökumət bu xəstəliyin yayılmaması üçün sərt tədbirlər həyata keçirir. Təəssüf ki, bəzi vətəndaşlarımız bunun ciddiliyini dərk etmək istəmirlər. Məsələn, biz bu halı təhsil müəssisələrində dərsin ləğv olunması ilə bağlı verilən qərardan sonra müşahidə etmişik. Bəzi valideynlər bunu “yaxşı” fürsət kimi dəyərləndirib, övladlarını götürüb alış-veriş və əyləncə mərkəzlərinə gedirlər. Proseslərin gedişi və dövlət səviyyəsində verilən qərarlar bir daha sübut edir ki, hökumətin tövsiyələrinə ciddi yanaşıb, əməl etmək lazımdır. Bununla bağlı əlavə hansı tədiblər görülməlidir və tövsiyələrə əməl olunması üçün işin necə aparılması zəruridir?
Elşən Həsənov: “Belə hallarda dövlətlə vətəndaşın birliyi daha sıx olmalıdır”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, bu məsələdə məsuliyyəti yalnız dövlətin üzərinə atmaq olmaz: “Dünyanın hər bir yerində bu virusla mübarizə aparılır. Azərbaycan da buna maksimum çalışır. Hər bir ölkə istəyir ki, bəla ondan yan keçsin. Bizim məsələyə bir qədər də ciddi yanaşmamız əbəs deyil. Çünki qonşumuz olan İranda virus geniş yayılıb. Qoruyucu tədbirləri bir qədər gec tətbiq edəndə biz hökuməti qınayırıq. Hökumətin atdığı addımları isə sanki boykot edirik. Məktəbləri niyə bağlayıblar? Səbəbi bəllidir, virusun maksimum yayılmasını istəmirlər. Hökumət nə etməlidir? Polislərə tapşırıq verməlidir ki, küçələrdə uşaqla gəzintiyə çıxan valideynləri saxlasın? Bu məsələdə məsuliyyət həm də valideynlərin öz üzərinə düşməlidir. Görürük ki, yaradılan Qərargah mühüm dövlət tədbirlərini belə təxirə salıb. Ancaq vətəndaşlara aid hissədə tövsiyə edir ki, toyları təxirə salsınlar, yasları izdihamlı keçirməsinlər. İş adamları da məsuliyyətini yaxşı dərk etməlidirlər. Qazanc naminə belə tövsiyələri qulaqardına vurmamalıdırlar. Vətəndaş toy etmək istəsə belə, buna icazə verilməməlidir. Əgər verilən tövsiyələrə vətəndaşlar tərəfindən ciddi əməl olunmasa, bir qədər inzibati qadağaları da tətbiq etmək mümkündür. Biz tövsiyədən nəticə çıxarmalıyıq. Hökumət bir qədər sərt müdaxiləni vətəndaş haqlarına görə etmirsə, bu o demək deyil ki, hansısa işbaz bundan pul qazanmalıdır. Belə bir atalar misalı var: “El gücü, sel gücü”. Belə hallarda dövlətlə vətəndaşın birliyi daha sıx olmalıdır”.
Məhəmmədəli QƏRİBLİ
