Dünya koronavirus xəstəliyindən əziyyət çəkir. Ölkələr bir-birinə qapılarını bağlayır, kütləvi tədbirlər təxirə salınır, iqtisadi əlaqələr məhdudlaşdırılır.
Məlumat üçün bildirək ki, dünyada koronavirusa yoluxanların sayı 110 min nəfəri keçib. Ümumdünya Səhiyyə Təşkilatının statistikasına görə, virusdan ölənlərin sayı 3831 nəfər olub. Dünya üzrə xəstəlikdən sağalananların sayı isə 62 min 300 nəfəri keçib.
Azərbaycanda da xəstəliyin yayılmasının qarşısını alamaq üçün kompleks şəkildə profilaktik tədbirlər görülür. Koronavirus təhlükəsi ilə əlaqədar ölkəmizdə də qabaqlayıcı tədbirlər həyata keçirilir. Məlum olduğu kimi, təhsil müəssisələrində məlum virusla bağlı dərslər müvəqqəti olaraq dayandırılıb. Bu müddət ərzində ölkənin bütün tədris müəssisələrində dezinfeksiya işləri aparılır. Dezinfeksiya işləri tək təhsil ocaqlarında deyil, iaşə obyektlərində də aparılır.
Dövlət tərəfindən xəstəliyin qarşısının alınması üçün çoxlu sayda iş görülür. Ancaq bəzi şəxslər artıq qazanc əldə etmək üçün koronavirus kimi xəstəlikdən də istifadə edirlər. Danılmaz faktdır ki, bir qrup şəxs Azərbaycanda maska və spirtin qiymətini qaldırdı. İndi də dizenfeksiya işi ilə məşğul olan şirkətlər dezinfeksiya xidmətini də bahalaşdırıblar. Məlumat üçün bildirək ki, təmizlik şirkətlərinin bir kvadratmetr sahənin dezinfeksiyası üçün təklif etdikləri qiymət 50 qəpik - 1 manat olduğu halda, hazırda bu xidmət üçün 3 manat tələb olunur.
Mütəxəssislər isə dezinfeksiyanın təsirli olması üçün istifadə edilən preparatların keyfiyyətli olmasını və bu işin professional şəkildə aparılmasının vacib olduğunu bildirirlər.
Dezinfeksiya işi ilə məşğul olan şirkətlərin qiyməti nə səbəbdən bahalaşdırdığını öyrənmək üçün həmin şirkətlərlə əlaqə saxladıq.
"PAOS" şirkəti: “Qiymətlər bir kvadratmetrə 1 manatdan təklif edilir, dezinfeksiya ediləcək sahə böyük olduqca qiymətdə endirim edirik"
"PAOS" şirkətinin nümayəndəsi bildirdi ki, şirkət lisenziya əsasında fəaliyyət göstərir: "Bizim şirkət Avropa və Amerikanın tanınmış “Pestcontrol” şirkətləri ilə əməkdaşlıq edir və onların istehsal etdiyi pestisidlərdən yararlanır. Qiymətlər bir kvadratmetrə 1 manatdan təklif edilir. Dezinfeksiya ediləcək sahə böyük olduqca qiymətdə endirim edirik".
"Expel Azərbaycan": “Dezinfeksiya üçün qiymətlər fərqlidir, bizdə qiymət 1 kvadratmetrə 50 qəpikdən 3 manatadəkdir”
"Expel Azərbaycan" təmizlik şirkətindən qeyd etdilər ki, dezinfeksiya üçün qiymətlər fərqlidir: "Bizdə qiymət 1 kvadratmetrə 50 qəpikdən 3 manatadəkdir. 3 manata dumanlama işləri də aparırıq. Bu xidmət zamanı virusun qalma ehtimalı demək olar ki, yoxdur. Amma bunun üçün bahalı dezinfeksiyaedici məhlullardan istifadə edirik. İşlətdiyimiz dezinfeksiyaedici məhlullar Almaniya istehsalı olduğundan, bahadır. 1 kvadratmetri 50 qəpiyə təklif edilən dezinfeksiya isə Belarus istehsalı olan ucuz məhlullarla aparılır. Onu da vurğulayaq ki, yaşayış binalarında blokları 100-120 manata dezinfeksiya edirlər”.
Günel CƏLİLOVA
