Dünyada gedən qloballaşma prosesi özü ilə saysız-hesabsız problem, aşınmalar gətirib. Əslində, qloballaşma dalğası ilk izlərini salmağa başladıqda dünyanın ağıllı düşünən insanları, ekspertləri buna qarşı çıxdılar və bəyan etdilər ki, qloballaşmanın əsas hədəfi xalqların milli-mənəvi dəyərlərinin, adət-ənənələrinin, mədəniyyətlərinin əridilməsi, məhv edilməsidir. Bəli, o ekspertlər haqlıdır. Doğrudan da qloballaşma öz təsirini dünyanın mənzərəsində əks etdirməkdədir.
Amma qloballaşmanın keçərli olmadığı dövlətlər, cəmiyyətlər də istisandır. Belə cəmiyyətlərə qarşı isə qloballaşdırma layihəsini işləyib dövriyyəyə buraxan beynəlxalq institutlar, şəbəkələr ciddi əndişə keçirirlər və nə yolla olursa-olsun, həmin ölkələri ləkələməyə çalışırlar. Əlbəttə, bu halda onların köməyinə bəzi yerli muzdlu saytlar gəlir. O saytlara oxucu cəlb etmək və pul lazım olduğu üçün həmin institutların istəklərini yerinə yetirir və ölkələrə xas olmayan, həmin ölkələrin adət-ənənəsinə, milli ailə dəyərlərinə yad olan informasiyalar yayırlar.
Bu günlərdə internet saytlarından birində təsadüfən bir yazı ilə rastlaşdım. Məqalə həyat yoldaşını dəyişən cütlüklərdən (swinger) bəhs edirdi. Məqalədə “Swinger nə deməkdir?” sualına belə cavab qeyd edilib: “Swinger hərfi tərcümə ilə "həyatı sürətli yaşayan" deməkdir. Günümüzdə həyat yoldaşı dəyişdirmə kimi istifadə edilsə də, ilk mənası budur.
Aralarında həyat yoldaşı dəyişənlər üçün tez-tez istifadə edilən bu tədbirə, swing hadisəsinə bir çox hallarda həyat yoldaşı olmayan, tək insanlar da daxil olur. Adətən 2 cüt arasında olduğu kimi, daha çox cüt də iştirak edə bilər”.
Məqalədə, həmçinin, “swinger ailələr Azərbaycanda da sürətlə yayılır. Qeyri-rəsmi rəqəmlərə görə, Azərbaycanda 1500-dən çox swinger ailə mövcuddur” - deyə qeyd edilir.
Diqqətimi də əsasən bu rəqəm çəkdi. Birincisi, Azərbaycanda 1500-dən çox belə ailənin olmasını hansı rəy sorğusu, sosial qeydiyyat qurumu üzə çıxarıb? Bəyəm insanlar hansısa təşkilatlara, şəxslərə öz intim həyatları, həyat tərzləri haqqında məlumat verirlər?
Əlbəttə, Azərbaycanda bu cür ailələrin mövcud olması qətiyyən inandırıcı deyil və heç bir reallığı əks etdirmir. Məsələ burasındadır ki, bizim ailə dəyərlərimizə, ailə institutumuza yad olan, onun parametrləri ilə uzlaşmayan bu məsələnin təbliğatına qoşulan bəzi saytlar, müxtəlif şəbəkələr Azərbaycanda ailə institutunu hədəfə almış qara qüvvələrin tapşırığını yerinə yetirirlər. Məlumatdan da açıq görünür ki, xüsusi təşkilatlar Azərbaycanın ailə dəyərlərini ləkələmək üçün belə həqiqətə uyğun olmayan informasiyaların yayılmasına maraq göstərirlər. Azərbaycan ailəsinin əsrlərdən bəri formalaşan ənənələrini bu şəkildə dağıtmaq, məhv etmək sözsüz ki, mümkün deyil.
“Ermənilərə və bir sıra Avropa ailələrinə xas olan bu kimi halların Azərbaycanda mövcud olması qətiyyən həqiqət deyil”
“Vəfa” Sosial İctimai Birliyinin rəhbəri Fatimə Hacıbəyli “Bakı-Xəbər”ə bildirdi ki, bu, Azərbaycan xalqının ailə dəyərlərinə atılan çamurdan başqa bir şey deyil. Onun sözlərinə görə, bu gün dünyanın bir çox ölkəsində belə hallar olsa da, Azərbaycanda belə bir mənzərənin olması qətiyyən real deyil. “Azərbaycan dövlətinin həyata keçirdiyi siyasətin kökündə milli-mənəvi dəyərlərin qorunması, ailə institutumuzun daha da möhkəmlənməsi, ənənələrin qorunması da dayanır. Əsrlərdən bəri formalaşan mili ailə dəyərlərimizə qarşı son illər müxtəlif şəkillərdə hücumlar artıb və sizin toxunduğunuz məsələ də onun tərkib hissəsidir. Bu gün dünyada elə təşkilatlar, institutlar var ki, onların hədəfi konkret dövlətlər, xalqlar və cəmiyyətlərdir. Lakin o institutlar heç zaman öz arzusuna çata bilmirlər. Çünki, dediyim kimi, Azərbaycanda ailə dəyərləri, ailə institutu çox güclüdür və parçalanmazdır. Qeyd edim ki, dünyanın müxtəlif ölkələrində fəaliyyət göstərən və qloballaşmanın mənfi təzahürlərini təbliğ edən bir sıra institutlar “Azərbaycanda 1500-dən artıq svinq ailə var” iddiasını irəli sürməklə bizim ailə dəyərlərimizi ləkələməyə cəhd edirlər. Çünki bu informasiya məqsədli şəkildə yayılır. Məlumatı oxuyan kimi onun harada, necə hazırlandığını dərhal görürsən. Bilirsiniz, Azərbaycan kimi milli dəyərlərə sadiq olan ölkələrdə belə halların olması həqiqət deyil. Onu da deyim ki, Azərbaycanı, onun milli-mənəvi dəyərlərini, ailə institutunu hədəfə alan, ləkələməyə çalışan qara qüvvələr heç zaman öz məqsədlərinə çata bilməzlər”.
Bu məsələdə həmin institutların Ermənistanla Azərbaycanı səhv saldığını deyən F.Hacıbəyli qeyd etdi ki, “svinq ailələr”in sayı Ermənistanda çoxdur və onların sayı get-gedə artır. Hətta bunun müxtəlif beynəlxalq sənədlərdə də əks olunduğunu, informasiya şəklində yayıldığını da deyən F.Hacıbəylinin sözlərinə görə, bunu ermənilər özləri də dəfələrlə təsdiqləyiblər. “Çox təəssüf edirəm ki, Azərbaycan xalqının ailə dəyərlərinə diş qıcayan institutların, təşkilatların sayı çoxalıb. Qloballaşma həvəskarları müxtəlif naqisliklərin bütün dünyaya yayılmasını istəyir, amma Azərbaycanın mənəvi və dövlət sərhədləri elələrinin üzünə bağlıdır. Bir məqamı da deyim ki, təxminən iki-üç il əvvəl Ermənistanda “svinq ailələr”in sayının kütləvi surətdə artığı haqqında məlumatlar yayılmışdı, həmin ailələr özləri də ad və soyadları ilə gündəmə gələrək, məsələni təsdiq etmişdilər. Ermənilərə və bir sıra Avropa ailələrinə xas olan bu kimi halların Azərbaycanda mövcud olması qətiyyən həqiqət deyil” - deyə F.Hacıbəyli qeyd etdi. İradə SARIYEVA
