Azərbaycan dövlətinin koronavirusla bağlı apardığı mübarizə beynəlxalq təşkilatlar tərəfindən də müsbət qarşılanır. Ölkə başçısının tapşırığı ilə bu istiqamətdə görülən işlər, virusun yayılmaması üçün həyata keçirlən qabaqlayıcı tədbirlər dünyanın da diqqətini çəkir. Azərbaycanda həyata keçirilən antivirus tədbirləri Ümumdünya Səhiyyə Təşkilatının (ÜST) tövsiyələri nəzərə alınmaqla reallaşdırılır.
Qeyd edək ki, təxminən bir həftə əvvəl ÜST Azərbaycanda aparılan antivurus mübarizəsini yüksək qiymətləndirmişdi. Martın 4-də isə ÜST-in Azərbaycandakı nümayəndəsi Hande Harmancı İTV-yə müsahibəsində Azərbaycandakı vəziyyəti təhlil edərək mübarizə tədbirlərini yüksək qiymətləndirib.
“İndiyə kimi Azərbaycanda 3 koronavirusa yoluxmuş şəxs təsbit olunaraq ÜST-ə məlumat verilib. “COVID-19” analiz nəticəsi müsbət olan bu üç şəxs, əslində, xəstə deyil. Onlarda hər hansı bir simptom - öskürək, qızdırma halı yoxdur. Sadəcə, müşahidə altındadırlar və izlənirlər. Həm TƏBİB, həm də Səhiyyə Nazirliyi bu işlə ciddi məşğul olur. Xüsusilə İranla olan sərhəd bölgəsində ciddi nəzarət var. Bildiyimə görə, hazırda 6 xəstəxana koronovirusla bağlı ayrılıb. Bəziləri karantin xəstəxanalarıdır, bəziləri isə xəstəlik aşkar olunarsa, insanların müalicəsi üçün ayrılıb”.
Hande Harmancı xəstəliyin statistikasının insanlardan gizlədilməsi ilə bağlı yayılmış fikirlərə münasibətində bildirib ki, dünyada bəzi hökumətlər insanlar panikaya düşməsin deyə bu yola əl atırlar. Ancaq müşahidələrə əsasən, TƏBİB-in bu mövzuda açıq davrandığını, ilk təşhisdə məlumat verildiyini bildirib: “İnsanların bu kimi hallarda məlumatlandırılması çox vacibdir. Belə davam etdirilməsinə də ümid edirəm. Çünki insanlar dövlət orqanlarına nə qədər çox güvənsə, problem bir o qədər sürətlə həll olunar”.
“Ölkəmizdə antivirus tədbirləri ÜST-in verdiyi bütün tövsiyələr nəzərə alınaraq gerçəkləşdirilir”
Tanınmış səhiyyə mütəxəssisi, professor Adil Qeybulla “Bakı-Xəbər”ə açıqlamasında bildirdi ki, ÜST Azərbaycandakı vəziyyəti daim nəzarət altında saxlayır və ÜST-in Bakı nümayəndəliyi rəhbərinin qiymətləndirməsi də müsbətdir. “Azərbaycanda həyata keçirilən koronavirusla bağlı mübarizə tədbirlərində ÜST-in tövsiyələri ciddi şəkildə nəzərə alınır. Ümumiyyətlə, ÜST Azərbaycandakı bu məsələni nəzarətdə saxlayır, daim müxtəlif səviyyələrdə bu mübarizə tədbirlərinə qiymət verir, münasibət bildirir. ÜST-in Azərbaycan nümayəndəliyi rəhbərinin koronavirusla bağlı Azərbaycanda görülən işləri bu şəkildə qiymətləndirməsi çox müsbət haldır. Qeyd etdiyim kimi, ölkəmizdə antivirus tədbirləri ÜST-in verdiyi bütün tövsiyələr nəzərə alınaraq gerçəkləşdirilir. Bu gün ÜST təmsilçilərinin Azərbaycanda olması, bu məsələni diqqətdə saxlaması müsbətdir. Onu da deyim ki, ÜST Azərbaycan və digər ölkələrdə xüsusi təhlükəli infeksiyaların yayılma təhlükəsi olarkən vəziyyəti nəzarətə alır və lazımi dəstək göstərir” - deyə A.Qeybulla qeyd etdi.
İradə SARIYEVA
