“Göstəriş vermişəm, xarici sürücülərə yemək təqdim edilsin ki, onlar idarə etdikləri maşınlardan tez-tez çıxıb ictimai yerlərə getməsinlər”. Bunu Prezident İlham Əliyev Goranboy Rayon Mərkəzi Xəstəxanasının kollektivi ilə görüşdə çıxışı zamanı bildirib.
Ölkə başçısının sözlərinə görə, heç bir dövlət bu günə qədər yükdaşımaların həyata keçirilməsinə məhdudiyyət qoymayıb, o cümlədən, Azərbaycan da: “Bildiyiniz kimi, Azərbaycan tranzit ölkədir və biz uzun illər çalışırdıq ki, öz tranzit potensialımızı genişləndirək, buna nail ola bilmişik. Heç bir tranzit yüklər üçün məhdudiyyət qoyulmur. Ancaq biz bu sahəyə də xüsusi diqqət göstəririk, tranzit yüklərin, xüsusilə cənub istiqamətindən ölkəmizə daxil olan, həm Azərbaycan istehlakçıları, həm də qonşu ölkələrin istehlakçıları üçün lazımi yüklərin çatdırılması ilə bağlı mütəşəkkil qaydada işlər aparılır, müvafiq yük maşınlarından ibarət xüsusi kolonlar formalaşdırılır, polis müşayiəti təmin edilib. Eyni zamanda, göstəriş vermişəm, xarici sürücülərə yemək təqdim edilsin ki, onlar idarə etdikləri maşınlardan tez-tez çıxıb ictimai yerlərə getməsinlər. Yəni hər bir xırdalığa qədər düşünülmüş addımlar atılır, bunun da məqsədi Azərbaycan vətəndaşlarını bu xəstəlikdən qorumaqdır. Bu günə qədər bizim bütün addımlarımız uğurla nəticələnib. Biz daim Ümumdünya Səhiyyə Təşkilatı ilə təmasdayıq və xəstəliyi aşkar etmək üçün testlərin ölkəmizə gətirilməsi ilə bağlı işlər aparılır, bu məsələ öz həllini tapır”.
Görünən odur ki, koronovirusun yayılma risqinin qarşısını almaq üçün ən xırda detallar belə nəzərə alınıb. Bu baxımdan əcnəbi sürücülərlə bağlı tətbiq olunan bu qaydaların əhəmiyyətini ekspertlər necə dəyərləndirirlər?
“Fikrimcə, Prezidentin bu qərarı çox önəmli addımdır”
Məsələyə münasibət bildirən millət vəkili Aydın Hüseynovun sözlərinə görə, əcnəbi sürücülərlə bağlı bu kimi tədbirlərin görülməsi virusun yayılma risqini minimuma endirir: “Ona görə də virusun yayılmasının qarşısını almaq üçün görülən bu kimi tədbirlər öz müsbət nəticəsini verəcək. Nəzərə almaq lazımdır ki, bütövlükdə, Azərbaycanda hökumət tərəfindən bununla bağlı çox önəmli tədbirlər həyata keçirilir. Bütün mümkün vasitələr işə salınır. Belə ki, büdcədən vəsait ayrılıb və ictimai yerlərdə dezinfeksiya tədbirləri görülür. Eyni zamanda, qeyd olunduğu kimi, cənab Prezident xarici sürücülərlə bağlı məqama toxundu. Hesab edirəm ki, bu çox önəmli məsələdir. Yəni onların yeməklə təmin olunması ictimaiyyətlə təmas yaratmalarına şərait yaratmır. Bu da virusun yayılma risqini önləyir. Fikrimcə, Prezidentin bu qərarı çox önəmli addımdır. Bütün bunlarla yanaşı, hər bir vətəndaş öz sağlamlığının qeydinə qalmalıdır. İctimai yerlərdə təmaslar zamanı diqqətli olmaq, lazımi gigiyena qaydalarına əməl etmək lazımdır. Belə olarsa, o zaman təbii ki, virusla bağlı risqlər daha da azalacaq”.
Vidadi ORDAHALLI
