Dünya üçün böyük təhlükəyə çevrilən və qarşısının alınması üçün milyardlarla vəsait xərclənən koronavirusla mübarizədə Azərbaycan dövləti həyata keçirdiyi tədbirlərlə bir nümunə ortaya qoydu. Ölkəmizdə bu təhlükəli virusa qarşı mübarizə tədbirlərinin həyata keçirilməsi, bu istiqamətdə görülən işlər onu deməyə əsas verir ki, bu proses tam olaraq nəzarətdədir.
Ümumiyyətlə, Çin virusunun yayıldığı bir çox ölkədə baş verən ölüm halları, yoluxanların sayının artması onu göstərir ki, o ölkələrdə bu prosesə zamanında tam nəzarət edilməyib.
Məlum olduğu kimi, Azərbaycan Prezidentinin göstərişi ilə Nazirlər Kabinetinin yanında xüsusi operativ qərargah yaradılıb, lazımi tədbirlərin daha sürətlə həyata keçirilməsi üçün əlavə 10 milyon manat vəsait ayrılıb, İranda qalan Azərbaycan vətəndaşlarının təxliyyə edilməsi üçün xüsusi tədbirlər həyata keçirilir. Onların həm quru sərhəddən, həm də hava nəqliyyatı vasitəsilə Azərbaycana gətirilməsi təmin edilir, İrandan gələn vətəndaşların lazım olan müddət ərzində karantində qalması zəruridir və bu, hər bir şəxs tərəfindən anlaşıqlıqla qarşılanmalıdır, koronavirus infeksiyasının yayılmasının qarşısının alınması və uşaqları, yeniyetmələri qorumaq üçün tədris, təlim-tərbiyə müəssisələri müvəqqəti bağlanıb. Bu günə olan məlumata görə, Azərbaycanda xəstəliyin yayılması ehtimalı o qədər də yüksək olmasa da, gündə bir neçə dəfə bu məsələ ilə bağlı ölkə ərazisində monitorinq aparılır, bütün sərhəd-keçid məntəqələrində xüsusi cihazlar quraşdırılıb, heç bir ölkə yükdaşımaların həyata keçirilməsinə məhdudiyyət qoymayıb və tranzit potensialının gücləndirilməsini qarşısına məqsəd qoymuş Azərbaycan da analoji mövqe nümayiş etdirir.
Bununla yanaşı, xəstəliyin yayılmaması üçün bütün məsələlər hər bir xırdalığa qədər düşünülür və müvafiq addımlar atılır. Azərbaycan hökuməti Ümumdünya Səhiyyə Təşkilatı ilə sıx təmasdadır, xəstəliyi aşkar etmək üçün testlərin ölkəyə gətirilməsi ilə bağlı müvafiq işlər aparılır. Ölkəmizdə kifayət qədər maska var. Bu vəziyyətdən istifadə edərək öz qanunsuz gəlirlərini artırmaq istəyənlərə qarşı ciddi cəza tədbirləri tətbiq ediləcək, koronavirusun yayılmasının qarşısının alınması, əhalinin sağlamlığının mühafizəsi istiqamətində bütün lazımi tədbirləri görülür. Ölkədə əhalinin narahatlığı üçün heç bir ciddi əsas yoxdur, karantində qalan vətəndaşların mütləq əksəriyyətində hələ ki, heç bir xəstəlik əlaməti aşkarlanmayıb. Onların sağlamlığı normal olarsa, lazımi müddətdən sonra evlərinə buraxılacaqlar.
“Bütün görülən işlər, verilən qərarlar onu göstərir ki, Azərbaycan dövləti koronavirus təhlükəsi ilə mübarizədə aktivdir”
Ölkəmizdə koronavirus təhlükəsi ilə bağlı məsələnin tam nəzarətdə olduğunu deyən “Səs” qəzeti və eyni adlı informasiya agentliyinin rəhbəri, siyasi şərhçi Bəhruz Quliyevin sözlərinə görə, Azərbaycandan fərqli olaraq, digər dövlətlərdə koronavirus problemi daha həyəcanla qarşılandı və ajiotaj səviyyəsinə qaldırıldı: “Bəlkə də burada hansısa dövlətin, beynəlxalq təşkilatın ictimai-siyasi marağı da rol oynadı. Yəni bu virusu bu qədər həyəcanla təqdim etməyə zərurət yox idi. Çünki bu yoluxucu xəstəliyin insanlar arasında yayılmasının qarşısının alınması üçün əsaslı addımların atılması daha doğru idi. Zaman-zaman bu kimi viruslar tüğyan edib, “Donuz qripi”, “Quş qripi” kimi daha təhlükəli viruslara qarşı mübarizədə də ölkəmiz çox böyük işlər görmüşdü. Bu kimi virusları qorxulu, təhlükəli bir virus kimi ajiotajla cəmiyyətə çatdırmaq doğru deyil. Çünki insanların heç də hamısı onu eyni cür qəbul edə bilmir, bəziləri bunu böyük təhlükə saysa da, panikaya düşsə də, bəzi insanlar bunu dünya üçün, insanlar üçün elə də qorxulu tendensiya hesab etmir. Dünyanın bir çox ölkəsində əhali koronavirusa görə bayıra çıxa bilmir. Bəzi dünya ölkələrindən fərqli olaraq, Azərbaycanda vəziyyət başqadır. İnsanların şəhərə çıxması, parklarda, ictimai nəqliyyatda, kütləvi yerlərdə görünməsi bəs edir ki, ölkəmizdə bu təhlükənin tam olaraq nəzarətdə olduğunu deyək. Koronavirusun yayıldığı ölkələrdə insanlar xüsusi ağızlıqlardan, geyimlərdən istifadə edirlər. Azərbaycanda isə əhalinin tam əksəriyyəti tam sakitdir, əndişəsizdir. Koronavirsula bağlı Azərbaycan cəmiyyətində, ictimaiyyətində aparılan araşdırmalar da onu göstərir ki, cəmiyyət, əhali dövlətin bu prosesə tam nəzarət etdiyinə əmindir və ona görə heç bir təşviş, qorxu keçirmir. Dövlətə, dövlətin bu sahədə gördüyü məqsədyönlü işlərə, təhlükəsizlik tədbirlərinə güvənən insanlarımızın rahatlığı təbiidir. Bütün görülən işlər, verilən qərarlar onu göstərir ki, Azərbaycan dövləti koronavirus təhlükəsi ilə mübarizədə aktivdir və bu prosesi tam olaraq nəzarətdə saxlayır”.
B.Quliyev qeyd etdi ki, Nazirlər Kabineti yanında operativ qərargah yaradılıb, bu qərargah vasitəsilə bu istiqamətdə görülən işlər barədə mütəmadi olaraq ictimaiyyətə məlumatlar verilir. Onun sözlərinə görə, eyni zamanda da karantində olan xəstələrin müalicə olunması üçün ölkəmizdə lazımi şərait, formalaşdırılan xüsusi palatalar mövcuddur: “Onların sağalması üçün paytaxtla yanaşı, bölgələrdəki xəstəxanalarda da şərait yaradılıb. Bu virusun lokallaşdırılması istiqamətində dövlət genişmiqyaslı işlər görür. Tədrisin dayandırılması, ali, orta məktəblərdə, eləcə də bağçalarda, əhalinin gur olduğu yerlərdə dezinfeksiya işlərinin aparılması da göstərir ki, bu tədbirlər yoluxma hallarının qarşısını alır. Bu virusun lokallaşdırılması prosesini dövlət nəzarətə götürüb. Faktiki olaraq, Azərbaycanda koronavirusla bağlı dünyanın digər ölkələrində olduğu kimi təhlükəli forma yoxdur. Görülən işlər, səhiyyə sistemində həyata keçirilən proseslər onu deməyə əsas verir ki, insanlarımız çox rahatdırlar” - deyə B.Quliyev qeyd etdi.
B.Quliyevin sözlərinə görə, Azərbaycan dövlətinin gördüyü işlər, həyata keçirdiyi tədbirlər əhalini tam əmin edib. O, həmçinin, bildirdi ki, yerli mediada bu istiqamətdə maarifçilik funksiyasını yerinə yetirərək ucuz sensasiya ardınca getmədi. Müsahibimiz hesab edir ki, ölkəmizin bu problemi dəf etməsinə əsas təkan verən amil mətbuatın sensasiya yaratmağa meyl etməməsi, bu virus barədə müxtəlif ajiotaj, panika yaradacaq informasiya verməməsi, dövlətin bu virusu lokallaşdırmaq sahəsində gördüyü işlərdir.
İradə SARIYEVA
