Prezident İlham Əliyev Goranboy Rayon Mərkəzi Xəstəxanasının açılışında iştirak edərkən virusun qarşısını almaq üçün nəzərdə tutulan tibbi maskaların çatışmazlığına dair fikir səsləndirib: "Mənə verilən məlumata görə, son vaxtlar apteklərdə maskaların çatışmazlığı müşahidə olunur. Buna heç cür izahat tapmaq mümkün deyil".
Dövlət başçısı bildirib ki, hazırda ölkəmizin kifayət qədər maska ehtiyatı var: “Görünür ki, hansısa möhtəkirlər bu vəziyyətdən istifadə edərək öz qanunsuz gəlirlərini artırmaq istəyirlər. Bütün hüquq-mühafizə orqanlarına tapşırıq verilib ki, əgər belə hallar aşkar olunarsa, bu hallara yol verən vətəndaşlara qarşı ən ciddi cəza tədbirləri tətbiq ediləcəkdir. Çünki indiki şəraitdən istifadə edərək, öz tamahını təmin etmək üçün bəd əməllərə üz tutan ünsürlərə qarşı ancaq çox ciddi cəza tədbirləri tətbiq edilməlidir”.
Prezident İlham Əliyev bir daha ictimaiyyəti əmin edib ki, Azərbaycan hökuməti bütün lazımi tədbirləri görür: “Bu günə olan mənzərəyə görə, narahatlığa heç bir ciddi əsas yoxdur. Karantində qalan vətəndaşların mütləq əksəriyyətində hələ ki, heç bir xəstəlik əlaməti aşkarlanmayıb. Əgər onların sağlamlığı normal olarsa, lazımi müddətdən sonra evlərinə buraxılacaqlar. Hesab edirəm ki, bu günə qədər bu məlumat kifayətdir. Eyni zamanda, göstəriş verilib ki, bu məsələ ilə bilavasitə məşğul olan bütün səhiyyə orqanlarının nümayəndələri - Səhiyyə Nazirliyi və İcbari Tibbi Sığorta Agentliyi müntəzəm olaraq vətəndaşları məlumatlandırsınlar”.
Göründüyü kimi, tibbi maskalarla bağlı vəziyyətin şəxsi qazanc məqsədilə gərginləşdirildiyi üzə çıxır. Bu hətta Prezident səviyyəsində bəyan edilirsə, deməli, vəziyyət ciddidir. Belə möhtəkirliklə hansı səviyyədə mübarizə aparılmalıdır?
İlqar Hüseynli: “Onların da sayı barmaqla sayılacaq qədərdir, sahiblərini də hamı tanıyır”
Ekspert İlqar Hüseynli “Bakı-Xəbər”ə açıqlamasında bildirdi ki, bu sahədə vəziyyət çox acınacaqlıdır: “Biz sizinlə müsahibədə də bu məsələyə toxunmuşduq. Goranboydakı açılışda isə Prezident yaranmış vəziyyətdən danışdı. Ortada olan nəticə budur ki, vəziyyətdən istifadə edib, külli miqdarda pul qazanmaq eşqinə düşən möhtəkirlər var. Onlar da öz istəklərini yerinə yetirə bilirlər. Ölkə başçısı bunun araşdırılmasını, hətta təqsirkarların məsuliyyətə cəlb edilməsini dedi. Mən də düşünürəm ki, lazımdır və bunu müəyyən etmək çox asandır. Maskaların qiymətinin qalxmasında aptekləri günahkar saymaq doğru olmazdı. Çünki epidemiya ilə bağlı vəziyyət gərginləşən kimi apteklərə maskalar limitlə verilməyə başladı. Limitlə verildiyini qəbul etmək olar. Ancaq anbarlarda olan malı baha qiymətə satmaq möhtəkirlikdən başqa nəsə deyil. Azərbaycanda aptek şəbəkələrinin dərman təminatını dövlət yox, özəl şirkətlər həyata keçirirlər. Onların da sayı barmaqla sayılacaq qədərdir, sahiblərini də hamı tanıyır. Vəziyyəti gərginləşdirən də məhz onlardır. Çox ucuz qiymətə alıb anbara yığdıqları maskanı necə və hansı əsasla baha satırlar? Son bir ayın araşdırılması aparılsa, bu məlum olar. Eyni zamanda, gömrükdən yoxlamaq lazımdır ki, həmin firma son günlər ərzində ölkəyə maska idxal edibmi? Bunun adı cinayətdir. Burada süni qiymət artımından tutmuş, nəyə kimi desən var. Ən əsası isə vicdan anlayışı pozulur. Deməli, belə çıxır ki, dərman təchizatı ilə məşğul olan şirkətlər xalqın pis vəziyyəti üzərindən pul qazanmağı da özlərinə şərəf bilirlər”.
Məhəmmədəli QƏRİBLİ
