Bu gün bütün dünya ölkələri kimi, Azərbaycan da koronavirusa qarşı ciddi mübarizə aparır. Bir sıra dövlətlərdən fərqli olaraq, ölkəmizdə bu virusdan itkisiz çıxmaq üçün daha mütəşəkkil işlər görülür. Əlbəttə, burada Azərbaycanda yaradılan müasir səhiyyə infrastrukturunun da rolunu qeyd etməliyik. Azərbaycan Respublikasının Prezidenti İlham Əliyev də qeyd edib ki, Azərbaycan müasir səhiyyə infrastrukturuna malikdir
Azərbaycan Prezidentinin Goranboy Rayon Mərkəzi Xəstəxanasının açılışında iştirakı bir daha göstərir ki, ölkəmizdə müasir səhiyyə infrastrukturu formalaşdırılıb. Eyni zamanda, Azərbaycanda səhiyyənin maddi-texniki bazası ən yüksək səviyyədə qurulur, paytaxt Bakı və bölgələrdə tibb müəssisələri müasir standartlara cavab verir, tibbi avadanlıq dünyanın aparıcı xəstəxanalarında olan avadanlıqlardan fərqlənmir. Son 16 ildə Azərbaycanın ancaq bölgələrində 22 yeni xəstəxana, 15 diaqnostika-müalicə mərkəzi inşa edilib, 28 mərkəzi rayon xəstəxanası əsaslı təmir olunub. Beş xəstəxananın tikintisi isə davam edir. Bölgələrdə 70 müasir tibb ocağı istifadəyə verilib. Son 16 ildə Azərbaycanda 700-dən çox tibb müəssisəsi tikilib və əsaslı təmir olunub. Azərbaycanda əhalinin sağlamlığının qorunması istiqamətində məqsədyönlü siyasət həyata keçirilir. Son illər müayinədən keçən vətəndaşların sayı 5 milyona çatıb. Azərbaycanda səhiyyə sisteminin maddi-texniki bazasının möhkəmləndirilməsi gözlənilməz, fors-major hadisələri də nəzərə alır.
“İllərlə görülən hazırlığın nəticəsidir ki, heç bir problemlə üzləşmədən koronavirusa qarşı mübarizəmizi apara bilirik”
K.Fərəcova adına Elmi-Tədqiqat Pediatriya İnstitutunun direktoru, professor Nəsib Quliyev “Bakı-Xəbər”ə bildirdi ki, Azərbaycan Respublikasının Prezidenti İlham Əliyevin rəhbərliyi ilə Azərbaycanda formalaşdırılan yeni səhiyyə infrastrukturu koronavirus təhlükəsinin qarşısını almaqda böyük imkanlara malikdir. N.Quliyevin sözlərinə görə, ölkəmizin müasir səhiyyə infrastrukturu imkan verir ki, biz bu virusdan itkisiz çıxaq. “Doğrudan da keçən 15 il ərzində Azərbaycan səhiyyəsində inqilabi dəyişikliklər baş verib. Təsəvvür edin ki, qeyd edilən müddətdə 650-dən artıq tibb müəssisəsi ya yenidən tikilib, ya da tamamilə ən müasir avadanlıqlarla təchiz olunmaqla yenidən qurulub. Bu tibb müəssisələrinin də əksəriyyətinin açılışında Prezident İlham Əliyev iştirak edib. Mən bəzən tikilən tibb müəssisələrini ilin həftələrinə bölürəm və hər həftəyə bir tibb müəssisəsi düşür. Bir ildə orta hesabla 50 həftə var. 13 ildə 50 həftəni hesablasaq, bu 650 həftə edir. Dünyada ikinci belə bir ölkə tapa bilməzsiniz ki, səhiyyəsində bu qədər sürətlə işlər görülsün, səhiyyə infrastrukturu bu dərəcədə yenilənsin. Həm tibb müəssisələri inşa olunub, həm də onlar ən müasir avadanlıqlarla təchiz olunub. İkinci məsələ, koronovirusla bağlı dünyanın bir çox ölkəsində əsas ehtiyac olunan məsələ erkən diaqnostika ilə bağlıdır. Yəni vaxtında xəstəlik araşdırılıb diaqnoz qoyulmayıb. Biz də isə bu sahədə də ciddi inkişaf var. Taun Əleyhinə Stansiya (Taun Əleyhinə Dispanser) köhnə yerindən köçürüldü və 8-ci kilometr qəsəbəsində ona müasir standartlara cavab verən gözəl bir bina tikildi. Hazırda dispanser orada fəaliyyət göstərir. Dispanser ABŞ-ın xəstəliklərə qarşı nəzarət təşkilatından, eləcə də Avropa ölkələrindən olan aparıcı mütəxəssislərin iştirakı ilə təchiz və təmin olundu. Bu gün o dispanserdə elə avadanlıqlar var ki, bizi əhatə edən ölkələrin çoxunda heç o yoxdur. Ölkəmizdə Mərkəzi referes laboratoriyanın mövcud olması və ən müasir avadanlıqlarla təmin edilməsi bizə imkan verir ki, zamanında koronavirusun diaqnozunu qoyaq və müalicəsini həyata keçirə bilək. Həmçinin də dərman, tibb ləvazimatları, avadanlıq cəhətdən də heç bir çatışmazlığımız yoxdur. Yəni ölkəmizdə formalaşdırılan səhiyyə infrastrukturu imkan verir ki, biz ən qorxulu xəstəliklərdən belə respublika əhalisini, vətəndaşlarımızı qoruya bilək. Bir tərəfdən illərlə görülən hazırlığın nəticəsidir ki, heç bir problemlə üzləşmədən koronavirusa qarşı mübarizəmizi apara bilirik. Başqa ölkələrə baxsanız, hətta inkişaf etmiş ölkələrin bəziləri də özlərində lazımi infrastruktur olmadığı üçün başqa ölkələrdən kömək istəyirlər. Amma bizim səhiyyəmiz bu virusla mübarizədə heç bir dövlətdən kömək istəmədi. Çünki onun özü bu kimi xəstəliklərlə mübarizəyə hazır oldu. Gördünüz ki, qonşu İranda (düzdür, bu ölkəyə qarşı iqtisadi sanksiyalar tətbiq olunub və s.) koronovirusla mübarizə idarəetmədən çıxdı, bu mübarizə orada çox çətinliklə idarə olunur. Nəyə görə? Ona görə ki, bu virusun qarşısını almaq üçün tələb olunan avadanlıqlar, digər vasitələr yoxdur. Diqqət edin görün ki, əhatəmizdə olan ölkələr, eləcə də İran son 15 ildə neçə yüz tibb müəssisəsi tikib? Yəni bunlar hamısı onu göstərir ki, doğrudan da Prezidentimiz son 15 ildə görülən real işlərin nəticələrini vurğulayıb. Ona görə də biz bu xəstəliyə təşvişlə, həyəcanla yanaşmağa lüzum görmürük. Dövlət səviyyəsində Ümumdünya Səhiyyə Təşkilatının da tövsiyələri nəzərə alınmaqla bütün tədbirlər həyata keçirilməkdədir”.
N.Quliyev qeyd etdi ki, orta və ali təhsil müəssisələrinin, o cümlədən də bağçaların müvəqqəti olaraq bağlanması alqışlanasıdır. Onun sözlərinə görə, bu qərarın xəstəliklə mübarizədə böyük əhəmiyyəti var. Müsahibimiz dedi ki, yoluxma kollektivdə, ictimai yerlərdə, təmas zamanı daha asanlıqla yayıla bilir. “Biz bunun qarşısını aldıq. Uşaqlar artıq evdə valideynlərinin yanındadır və onlar kütləvi yerlərə çıxmırlar. Hətta uşaqlara, şagirdlərə, tələbələrə tövsiyə edildi ki, kütləvi tədbirlərə, ekskursiyalara getməsinlər və s. Bunlar hamısı dövlət tərəfindən vətəndaşlarımızın, o cümlədən də uşaqlarımızın təhlükəsizliyinə, qorunmasına yönəlmiş tədbirlərdir”.
Ölkəmizin bütün qurumlarının təhlükəli virusa qarşı mübarizədə tədbirlər gördüyünü, əlaqəli işlədiyini, KİV-in isə öz üzərinə düşən informasiya təminatını həyata keçirdiyini deyən N.Quliyev hesab edir ki, ölkəmiz bu problemlə mübarizədən qalib çıxacaq. “Ölkəmizdə bununla bağlı heç bir narahatlıq, nigarançılıq yoxdur. Çünki Azərbaycanda bu proseslər çox uğurla idarə olunur. Xüsusilə də Ümumdünya Səhiyyə Təşkilatının Azərbaycan nümayəndəliyindən də müsahibə verdilər ki, Azərbaycanda Ümumdünya Səhiyyə Təşkilatının verdiyi bütün tövsiyələr nəzərə alınır, yerinə yetirilir. Dövlət, səhiyyə və digər qurumlar öz işini görüb, əsas iş isə vətəndaşların üzərinə düşür. Vətəndaşlar da onlara edilən tövsiyələri vaxtlı-vaxtında yerinə yetirməlidirlər. Dövlət mümkün olan hər şeyi edib. Prezident əlavə olaraq bu məsələyə ehtiyat üçün yenə 10 milyon manat vəsait ayırdı. Bizim bu virusla mübarizə üçün dərman preparatlarımız, avadanlıqlarımız, xəstəxanalarımız da var. Əminəm ki, görülən bu tədbirlər də müsbət nəticə verəcək, qısa müddətə, bir-iki aya bu problemə tam olaraq nöqtə qoymuş olacağıq” - deyə N.Quliyev vurğuladı.
İradə SARIYEVA
