25/09/2020 09:59
728 x 90

341 qadınımız İraq və Suriyaya necə aparılıb…

Mehriban Zeynalova: “…məruz qaldıqları təzyiq nəticəsində bu addımı atırlar”

img

Radikal dini-ideoloji fikirlərə əsir olub ya könüllü, ya da aldadılaraq Suriya və İraqa gedərək müxtəlif terror təşkilatlarına qoşulan azərbaycanlı ailələrin acınacaqlı taleyi təkcə onların yaxınları və qohumlarında deyil, azərbaycanlı adını daşıyan hər kəsdə böyük narahatlıq doğurur.

Açıqlanan statistik rəqəmlərə əsasən, terrorçu təşkilatlara qoşulmaq üçün Suriya və İraqa gedənlərin ümumi sayı 1477 nəfər (1136 kişi və 341 qadın) olan Azərbaycan vətəndaşlarından 903 nəfərin (749 kişi və 154 qadın) öldüyü və ya itkin düşdüyü güman edilir. Şimal, cənub və şimal-qərb regionundan Suriya və İraqdakı ekstremist təşkilatlara qoşulmuş yerli sakinlərin ehtimalları göstərir ki, cənub regionundan 22 nəfər olduğu halda, şimal və şimal-qərb regionunlarından olan “döyüşçülərin” (müvafiq olaraq 201 və 114) payı daha yüksəkdir: “Rəqəmlərdəki bu uyğunsuzluq ekstremist ideyaların şimal sərhədləri boyu yayılması ilə əlaqələndirilə bilər. Geri qayıtmış keçmiş “döyüşçülər” tərəfindən ekstremist ideyaların yayılma risqi Azərbaycanın səlahiyyətli orqanları tərəfindən təsdiq edilib və bu təhlükənin qarşısının alınması istiqamətində bir sıra tədbirlər görülüb. Həmin şəxslərdən az sayda terrorçu Azərbaycana qayıdıb və sanksiyalara məruz qalıblar”.

Qeyd etdiyimiz kimi, İraq və Suriyaya aparılanlar arasında 341 qadın var. O qadınların ora necə aparılması və hansı şəraitdə saxlanması müəmmalıdır. Həmin qadınlar arasında elələri var ki, onlar övladları ilə birgə İraq və Suriyaya gediblər.

  • “Psixoloji kompleksləri, yaşam şəraitindən, ailəsindən narazılığı olan qadınların da terror qruplaşmalarına qoşulmaları mümkündür”

"Təmiz Dünya” Qadın İctimai Birliyinin sədri Mehriban Zeynalova bildirdi ki, azərbaycanlı qadınlar daha çox aşpazlıqla məşğul olur və ya camaşırxana xidmətində çalışırlar. İŞİD döyüşçülərinin gündəlik tələbatını qarşılayan məlum kateqoriya arasında azərbaycanlı qadınların da sayı az deyil: “Hətta Suriya və İraqdakı İŞİD dəstələrinə qoşulan azərbaycanlı qadınların önəmli bir qisminin Sumqayıt şəhərindən olduğu da iddia edilirdi”.

Birlik sədrinin sözlərinə görə, Azərbaycan qadınlarının terror təşkilatlarına qoşulmasının müxtəlif səbəbləri var: “İŞİD terror təşkilatına qoşulan qadınların əksəriyyətinin beyinləri ərləri tərəfindən “yuyulur” və ya məruz qaldıqları təzyiq nəticəsində bu addımı atırlar. Bəziləri də maddi gəlir müqabilində terror təşkilatına üzv olurlar. Ancaq bunun üçün də mütləq şəkildə təsiredici qüvvələr olur. Psixoloji kompleksləri, yaşam şəraitindən, ailəsindən narazılığı olan qadınların da terror qruplaşmalarına qoşulmaları mümkündür”.

M.Zeynalova onu da əlavə etdi ki, qadın həssas varlıq olduğu üçün, onu ideoloji təsir altına salmaq asandır: “Qadınlar daha az şübhə çəkdikləri üçün, terror təşkilatları onları öz sıralarına cəlb etməkdə maraqlı olurlar. Dünya üçün qadın sülh, əminamanlıq, humanistlik simvolu hesab edilir. Terror təşkilatları da məhz bunları nəzərə alaraq vasitəçi kimi qadınlardan istifadə edirlər. Bəzən təsir, bəzən təzyiq, bəzən də pulla onları ələ alıb, öz istədiklərini edirlər”.

Günel CƏLİLOVA

Son xəbərlər